Роналдунинг навбатдаги голи, иродали «Интер», «Рома»нинг инқирози - Италияда тур воқеалари

Италия А Сериясида 5-тур ўйинлари ўтказилди. Унда эътиборга молик бир қанча воқеалар юз берди.

Тур ўйинида «Наполи» сафарда «Торино»ни енгди

«Наполи» сафарда «Торино» билан беллашди. Ўйин меҳмонларнинг тўлиқ устунлиги остида ўтди. 4-дақиқадаёқ Инсинье ҳисобни очишга муваффақ бўлди. Бу «Наполи»га қўшимча куч бағишлаган бўлса, «Торино»ни бироз саросимага солди. Якунда неаполликлар 3:1 ҳисобида ғалаба қозониб, 12 очко билан мусобақа жадвалида 2-ўринга чиқиб олишди.

Ўйиндан сўнг, «Наполи» бош мураббийи Карло Анчелотти янги тактикаси мева бераётганини айтди.

«Инсиньени марказга яқин жойда ўйната бошладим, бу эса самара берди. Айнан у ўйиннинг энг муҳим футболчиси бўлди. 4-4-2 тактикасида Верди ва Кальехонни қанотларда ўйнатмоқдаман. Инсинье ва Мертенс ҳужумда тўп тепмоқда. Натижада «Наполи» янада ишончли ўйин намойиш қиляпти» - деди Анчелотти.

Торино – Наполи 1:3 (0:2, 1:1)
23 сентябрь, «Олимпико ди Торино»
Голлар: 0:1 – 4 Инсинье, 0:2 – 20 Верди, 1:2 – 51, пенальти Белотти, 1:3 – 59 Инсинье.
Торино – Сиригу, Иццо, Нкулу, Моретти, Айна (Париджини, 77), Базелли (Эдера, 87), Ринкон, Мейте (Сориано, 62), Беренгер, Дзадза, Белотти.
Наполи – Оспина, Хюсай, Альбиоль, Кулибали, Луперто (Максимович, 74), Рог (Аллан, 60), Ҳамшик, Кальехон, Инсинье, Верди (Зелиньски, 54), Мертенс.
Огоҳлантиришлар: Кулибали (23), Ринкон (31), Рог (37), Иццо (43), Альбиоль (52).

Роналдунинг навбатдаги голи ва «Ювентус»нинг муаммоли ғалабаси

«Ювентус» сафарда камтарона «Фрозиноне» билан беллашди ва 2:0 ҳисобида ғалаба қозонди. Бироқ, туринликлар сўнгги 10 дақиқа ичида рақиб қаршилигини синдира олишди холос. 81-дақиқада ҳимоячилар хатосидан фойдаланган Роналду тўпни дарвозага йўллаб, ҳисобни очди. Сўнгги сонияларда Бернардески якуний ҳисобни ўрнатди. Бу ғалабадан сўнг, «Ювентус» 100% натижа билан жадвалда пешқадам бўлиб турибди.

Ўйиндан кейин «Ювентус» бош мураббийи Массимилиано Аллегри қийин ғалабанинг сабабини тушунтирди.

«Биз «Фрозиноне»дан шундай ўйинни кутган эдик. Аввалги турда жамоа 5та гол ўтказиб, ютқазди, биз эса чоршанба куни «Валенсия»га қарши 70 дақиқа камчилик бўлиб ўйнадик. Биз сабрли бўлишимиз керак. Кўплаб зарбалар, тезкор қарши ҳужумлар ва узатмалардан сўнг, ниятимизга етдик», - деди Массимилиано Аллегри.

Фрозиноне – Ювентус 0:2 (0:0, 0:2)
Голлар: 0:1 – 81 Роналду, 0:2 – 90 Бернардески.

«Интер»нинг иродали ва жуда муҳим ғалабаси

«Интер» сафарда «Сампдория» билан беллашди ва 1:0 ҳисобида ғалаба қозонди. Қизиғи шундаки, бу ўйинда «Интер»нинг 2та голи VAR тизими орқали бекор қилинди. Шунга қарамай, «кўк-қоралар» кучли ирода намойиш қилиб, сўнгги дақиқаларда ғалаба келтирувчи голни уришга муваффақ бўлишди. Марсело Брозович жамоасига жуда муҳим ғалабани келтирди. Бу натижадан сўнг, «Интер» 7 очко билан 9-ўринга кўтарилди.

Ўйиндан сўнг, Брозович тез орада ҳақиқий «Интер»нинг кучи намоён бўлишини айтди.

«Бу жуда қийин ўйин бўлди, аммо биз ғалаба қозона олдик. Биз бахтиёрмиз ва шу руҳда давом этмоқчимиз. Менимча, мазкур ҳафта биз учун мавсумда бурилиш ясайди. Олдинда кўплаб қийин ўйинлар бор, бироқ, умид қиламанки энди ҳамма ҳақиқий «Интер»ни кўради У исталган рақибни мағлуб эта олади», - деди Брозович.

Сампдория – Интер 0:1 (0:0, 0:1)
22 сентябрь, «Луижи Феррарис» стадиони
Гол: 0:1 – 90+4 Брозович.

«Лацио»нинг йирик ғалабаси ва Иммобиле дубли

«Лацио» ўз майдонида «Женоа»ни қабул қилиб, 4:1 ҳисобидаги йирик ғалабани қўлга киритди. Мезбонлар ҳужумчиси Чиро Иммобиле ўйинда 2та гол уришга муваффақ бўлди. Бу «Лацио»нинг қаторасига 3-ғалабаси эди. Натижада, римликлар 9 очко жамғариб, мусобақа жадвалида 5-ўринга чиқиб олишди. Қайд қилиш жоизки, «Женоа»нинг ягона голи Кшиштоф Пёнтек ҳисобига ёзилди. Ҳужумчи 5та гол билан тўпурарлар рўйхатини бошқариб келмоқда.

Лацио – Женоа 4:1 (2:0, 2:1)
23 сентябрь, «Стадио Олимпико»
Голлар: 1:0 – 7 Кайседо, 2:0 – 23 Иммобиле, 2:1 – 46 Пёнтек, 3:1 – 53 Милинкович-Савич, 4:1 – 89 Иммобиле.

«Рома»нинг Болоньядаги инқирози

«Рома» сафарда «Болонья» билан беллашиб, кутилмаганда яққол аутсайдерлардан бирига ютқазди. Мезбонлар номдор рақиб дарвозасига жавобсиз 2та тўп йўлладилар. «Рома»нинг лоақал 1та гол уриш учун бўлган барча ҳаракатлари зое кетди. Бу натижадан сўнг, «Рома» 5 очко билан 14-ўринда бормоқда.

Болонья – Рома 2:0 (1:0, 1:0)
23 сентябрь, «Ренато Далль'Ара»
Голлар: 1:0 – 36 Маттьелло, 2:0 – 59 Сантандер.  

«Милан» яна «қоқилди»

«Милан» барқарор ўйини билан боғлиқ муаммоларни ҳал қила олмаяпти. Жамоа ўз майдонида «Аталанта»ни қабул қилди ва икки марта ҳисобда олдинда боришига қарамай, ғалабани қўлдан чиқарди. Қайд қилиш жоизки, «қизил-қоралар» сўнгги сонияларда гол ўтказиб юбориб, тайёр ғалабадан маҳрум бўлишди. Бу натижадан сўнг, «Милан» 5 очко билан 13-ўринда бормоқда.

Ўйиндан кейин, бош мураббий Женнаро Гаттузо муваффақиятсизлик сабабларига тўхталиб ўтди.

«Бу жамоанинг иккита юзи бор. Биринчи бўлимни зўр ўтказдик, аммо сўнгги ярим соатда муаммоларга дуч келдик. Бу 4та турдан бери давом этяпти, биз 90 дақиқа давомида барқарор ўйнай олмаяпмиз. Биз кўпроқ ишлашимиз керак» - деди Гаттузо.

Милан – Аталанта 2:2 (1:0, 1:2)
Голлар: 1:0 – 2 Игуаин, 1:1 – 54 Гомес, 2:1 – 61 Бонавентура, 2:2 – 90+4 Ригони.

5-турнинг барча натижалари
23 сентябрь

Милан – Аталанта 2:2 (1:0, 1:2)
Голлар: 1:0 – 2 Игуаин, 1:1 – 54 Гомес, 2:1 – 61 Бонавентура, 2:2 – 90+4 Ригони.

Фрозиноне – Ювентус 0:2 (0:0, 0:2)
Голлар: 0:1 – 81 Роналду, 0:2 – 90 Бернардески.

Торино – Наполи 1:3 (0:2, 1:1)
Голлар: 0:1 – 4 Инсинье, 0:2 – 20 Верди, 1:2 – 51, пенальти Белотти, 1:3 – 59 Инсинье.

Лацио – Женоа 4:1 (2:0, 2:1)
Голлар: 1:0 – 7 Кайседо, 2:0 – 23 Иммобиле, 2:1 – 46 Пентек, 3:1 – 53 Милинкович-Савич, 4:1 – 89 Иммобиле.

Кьево – Удинезе 0:2 (0:0, 0:2)
Голлар: 0:1 – 76 де Пауль, 0:2 – 90 Лазанья.

Болонья – Рома 2:0 (1:0, 1:0)
Голлар: 1:0 – 36 Маттьелло, 2:0 – 59 Сантандер.

22 сентябрь
Парма – Кальяри 2:0 (1:0, 1:0)
Голлар: 1:0 – 20 Инглезе, 2:0 – 47 Жервиньо.

Фиорентина – СПАЛ 3:0 (2:0, 1:0)
Голлар: 1:0 – 18 Пьяца, 2:0 – 28 Миленкович, 3:0 – 56 Кьеза.

Сампдория – Интер 0:1 (0:0, 0:1)
Гол: 0:1 – 90+4 Брозович.

21 сентябрь
Сассуоло – Эмполи 3:1 (1:1, 2:0)
Голлар: 0:1 – 1 Капуто, 1:1 – 13 Боатенг, 2:1 – 57 Феррари, 3:1 – 85 Ди Франческо.

5-турдан сўнг, мусобақа жадвали

Тўпурарлар рўйхати:

5 - Кшиштоф Пёнтек (Женоа)

4 - Родриго Де Пауль (Удинезе, 1), Лоренцо Инсинье (Наполи), Грегоре Дефрель (Сампдория)

Рақиби юзига тупурган Дуглас Коста жазосини олди

«Ювентус» яримҳимоячиси Дуглас Коста А Серия интизом қўмитаси томонидан 4та ўйинга дисквалификация қилинди, деб хабар беради Football Italia.

Футболчи 4-турдан ўрин олган «Сассуоло»га (2:1) қарши баҳсда рақиб ҳимоячиси Федерико Ди Франческони тирсаги билан уриб, унга боши билан енгил зарба берган ва сариқ карта олган эди. Бироз ўтгач, у Федериконинг юзига туфлади ва бош ҳакам томонидан майдондан четлатилди. Энди Коста «Фрозиноне», «Болонья», «Наполи» ва «Удинезе»га қарши ўйинларни ўтказиб юборади.

Ҳафта иқтибоси -  «Месси ва Роналду Италияда 50та гол уролмайди»

«Фрозиноне» ҳужумчиси Эмил Ҳадлвредссон ҳужумчилар Лионель Месси ва Криштиану Роналдунинг Италияда қандай сермаҳсулликни намойиш қилиши мумкинлиги ҳақида фикр юритди.

«Италияда гол уриш жуда мушкул. Агар Месси ва Роналду Италияга келса, худди Испаниядаги каби 50та гол уролмайди. Чунки Италия клублари яхшироқ ҳимояланишади».

Ҳафта рақами - 10 миллион

Криштиану Роналдунинг «Ювентус»га трансфери клубнинг ижтимоий тармоқлардаги мухлислари сонини 10 миллионга оширди, деб хабар беради Calciomercato. 33 ёшли португалияликнинг келишидан сўнг, «бьянконери»нинг Facebook, Instagram, Twitter ва YouTube ижтимоий тармоқлардаги ўқувчиларининг умумий сони 49,7 дан 59,5 миллионга етган.

Ҳафта қаҳрамони - Кшиштоф Пёнтек (Женоа)

«Женоа» ҳужумчиси Кшиштоф Пёнтек «Лацио»га (1:4) қарши ўйинда рақиб дарвозасини ишғол этди. Натижада, польшалик футболчи дастлабки 4та турда 5та гол уришга муваффақ бўлди ва у «Милан»нинг собиқ ҳужумчиси Андрей Шевченко томонидан 1999 йилда ўрнатилган рекордни такрорлади.

23 ёшли Пёнтек ёзда «Краковия» клубидан «Женоа»га 4,5 миллион евро эвазига ўтган эди.