«Реал» яна бир йўқотишга учради

«Реал» ҳимоячиси Дани Карвахаль ЦСКАга қарши баҳсда жароҳат олиб, 42-дақиқада Альваро Одриосолага алмаштирилган эди.

Клуб матбуот хизматининг маълум қилишича, ўтказилган тиббий текширувлар унинг чап оёғининг тиззадан пастки орқа қисми мушаклари лат еганини кўрсатган. Хабарда унинг қачон сафга қайтиши мумкинлигига аниқлик киритилмаган.

Бу 26 ёшли футболчининг мавсумдаги илк жароҳати эмас. У ўтган ойда шу сабаб билан «Эспаньол»га қарши ўйинни ўтказиб юборган эди.

Шу тариқа, «Қироллик клуби»да йўқотишлар давом этди. Бунгача ҳимоя чизиғининг бошқа бир вакили – Марсело ноябрга қадар сафдан чиққанди, жамоа яримҳимоячи Иско эса кўричакка йўлиққани ортидан тахминан шунча муддат жамоага ёрдам бера олмайди.

Аввалроқ «Атлетико»га қарши баҳсда майдонни эрта тарк этган вингер Гарет Бэйлнинг ҳолати борасида хавотирга ўрин йўқлиги хабар қилинган эди. Лекин у ЕЧЛ доирасида ЦСКАга қарши кечган учрашувда майдонга тушмади.

Маълумот ўрнида, «қаймоқранглилар»ни октябрь ойида Ла Лиганинг «Алавес», «Леванте» ва «Барселона»га қарши («Эль-Класико» 28 октябрда) ўйинлар кутиб турибди. Бу ой, жамоа, шунингдек, ЕЧЛнинг 3-турида Чехиянинг «Виктория Пльзень» клубини қабул қилади.