Россия президенти Владимир Путин Санкт-Петербург губернатори Георгий Полтавченконинг истеъфосини қабул қилди ва Александр Бегловни шаҳар ҳокими вазифасини бажарувчи этиб тайинлади. Бу ҳақда президент матбуот хизмати хабар берди.
«Санкт-Петербург губернатори Георгий Полтавченконинг ўз хоҳишига кўра истеъфоси қабул қилинсин. Александр Дмитриевич Беглов Санкт-Петербург губернатори вазифасини вақтинчалик бажарувчи лавозимига тайинлансин», - дейилади хабарда.
Эслатиб ўтамиз, аввалроқ Россияда қатор губернаторлар лавозимидан кетганди.
Липецк области губернатори Олег Королев «ёшларга йўл бериш мақсадида» истеъфога чиқишини маълум қилди. Унинг ўрнига Игорь Артамонов губернаторлик вазифасини вақтинча бажарувчи этиб тайинланган. Шунингдек, Курган области губернатори ўрнига Вадим Шумков вақтинчалик бажарувчи этиб тайинланган.
Бу Россияда кейинги кунларда юз бераётган биринчи истеъфо эмас. Губернаторларнинг истеъфога чиқишлари 26 сентябрда бошланди. Ўша куни Кабарда-Балкария ва Астрахан области раҳбарлари Юрий Коков ва Александр Жилкин истеъфога чиқарилди. Сахалин области губернатори Олег Кожемяко эса лавозимидан озод этилган Приморье губернатори Андрей Тарасенко ўрнига келди.
