Азов денгизида Украинанинг «Донбасс» ва «Корец» кемалари ўтишига раҳбарлик қилган биринчи рангдаги капитан Дмитрий Коваленконинг сўзларига кўра, украиналик денгизчилар россиялик чегарачилар билан жанг қилишга тайёр турибди. Бу ҳақда у «Укринформ»га берган интервьюсида маълум қилди.
Унинг айтишича, Керч бўғозидан ўтиш вақтида жуда асабий ҳолат бўлган. Шу билан бирга, Коваленконинг таъкидлашича, украиналик денгизчилар ҳарбий тўқнашувга тайёр турган.
«Жанговар гуруҳлар, пулемётлар - ҳаммаси тайёр турганди. Икки киши тўлиқ экипировкада кўпчилик кўрадиган жойда турган - руслар кўриши учун. Тўлиқ қуролланган бошқа барча ҳам исталган дақиқада чиқиб келишга тайёр эди», - дея айтиб ўтди украиналик капитан.
Шунингдек, Коваленконинг қўшимча қилишича, россиялик чегарачилар билан жангга киришиш учун кемада ҳаммаси шай ҳолатда бўлган.
Эслатиб ўтамиз, аввалроқ Украина ташқи ишлар вазири Павел Климкин Россия Қримда ядро қуролини жойлаштирган бўлиши мумкин эканини айтганди.
