Украина минтақавий ривожланиш, қурилиш ва уй-жой коммунал хўжалиги вазири Геннадий Зубко Беларусь ҳамда Украина минтақалари форуми вақтида унинг иштирокчиларини рус тилида гапирмасликка чақирди. Бу ҳақда «РИА Новости» хабар бермоқда.
Икки мамлакат минтақаларининг форуми 25 ва 26 октябрь кунлари Беларуснинг Гомель шаҳрида бўлиб ўтяпти. Тахминларга кўра, тадбирда Беларусь президенти Александр Лукашенко ва унинг украиналик ҳамкасби Пётр Порошенко иштирок этади.
Зубконинг ўз чиқишида эслатишича, икки ҳафта аввал Украина-Беларусь савдо-иқтисодий ҳамкорлик бўйича комиссиясининг биринчи йиғилишини ўтказилди. Унинг таъкидлашича, ўшанда «жуда конструктив мулоқот» бўлиб ўтган.
«Ўшанда рус тили йиғилишнинг ишчи тили сифатида танланганди. Бугун форумда Украина ва Беларусь вакиллари бор. Мен украин тилида чиқиш қиляпман ва беларуслик ҳамкасбларимни уларнинг тилида тинглашдан хурсанд бўламан», - дея қайд этиб ўтди Зубко.
Унинг сўзларига кўра, иштирокчилар «минтақалар ўртасидаги ҳамкорликни мустаҳкамлаш» учун украин ва беларус тилида гаплашишлари керак.
Таъкидланишича, форумнинг беларуслик иштирокчилари украиналик амалдорнинг талабига жавоб беришмаган ва рус тилида гапиришда давом этишган.
Эслатиб ўтамиз, аввалроқ Украина Азов денгизидаги флотни энг катта қўриқлаш кемаси билан кучайтирганди.
