Россия АҚШ билан урушга тайёрланаётганини тасдиқлади

Россия уруш қилишга тайёрланаётган АҚШдан фарқли ўлароқ, ўз ҳудуди ва манфаатларини ҳимоя қилади. Бу ҳақда БМТ Бош ассамблеясининг биринчи қўмитаси йиғилишида Россия ташқи ишлар вазирлигининг қуролларни тарқатмаслик ва назорат қилиш масалалари бўйича департаменти раҳбари ўринбосари Андрей Белоусов айтиб ўтди.

“Яқинда ўтган йиғилишда АҚШ Россия урушга тайёрланаётганини айтди. Ҳа, Россия урушга тайёргарлик кўрмоқда, буни тасдиқлайман. Биз ватанимизни, ҳудудий яхлитлигимизни, принципларимиз ва одамларимизни ҳимоя қилишга тайёрланмоқдамиз. Биз шундай урушга тайёрланмоқдамиз”, деб айтган Белоусов.

Дипломат БМТда Москва томонидан ўрта ва кичик масофаларга мўлжалланган ракеталарни йўқ қилиш келишувини қўллаб-қувватлаш бўйича киритилган резолюцияга қарши овоз берилгандан кейин бу ҳақда айтган. 

Белоусовнинг айтишича, Россия ва АҚШ ўртасида катта тафовут бор. “Тил борасида ҳам бу фарқ хоҳ рус тилида, хоҳ инглиз тилида бўлсин бир сўздангина иборат: Россия урушга тайёрланмоқда, АҚШ эса уруш қилишга тайёрланмоқда”, деб таъкидлаб ўтган россиялик дипломат.

“Акс ҳолда АҚШга келишувдан чиқиб, ядровий салоҳиятини оширишга, ядровий қурол қўлланиши даражасини пасайтирувчи янги ядровий доктринани қабул қилишидан қандай наф бор? Мана бу ҳамма учун савол”, деб айтган Белоусов.  

25 октябрда БМТда Россия киритган резолюцияга қарши овоз берилган. Унга 55 давлат қарши чиққан, 31 давлат қўллаб-қувватлаган, 53 давлат бетарафлик билдирган.  

20 октябрда Дональд Трамп Россияни ўрта ва кичик масофаларга мўлжалланган ракеталарни йўқ қилиш келишуви бандларини бузаётганликда айблаб, АҚШ бу келишувдан чиқишини ва янги қурол яратишни бошлашини маълум қилган. Россия бунга жавобан тегишли, жумладан ҳарбий кўринишдаги чоралар кўрилиши мумкинлигини айтган.