Naked Science нашрининг ёзишича, Visual Capitalist тайёрлаган рейтинг ОПЕКнинг 2026 йилги йиллик статистик бюллетени маълумотларига асосланган.
Ҳисоб-китобларга хом нефт, жумладан, газ конденсати ҳамда нефт маҳсулотлари киритилган. Кўрсаткичлар ялпи экспортни акс эттиради — улардан импорт ҳажми чегирилмаган. Шу сабабли умумий ҳажмларга реэкспорт ва транзитдаги нефт ҳам кириши мумкин.
Энг йирик беш экспортчи
Рейтингдаги етакчи давлатларнинг кунлик экспорт ҳажми қуйидагича:
— АҚШ — 10,7 миллион баррел;
— Саудия Арабистони — 7,9 миллион баррел;
— Россия — 6,6 миллион баррел;
— Канада — 4,1 миллион баррел;
— Бирлашган Араб Амирликлари — 3,9 миллион баррел.
АҚШ ва Саудия Арабистони биргаликда жаҳон нефт экспортининг қарийб чорагини таъминлаган. Дастлабки уч давлатнинг умумий улуши эса 33 фоизга етган.
Нашр АҚШнинг етакчилигини кўп жиҳатдан сланец нефти қазиб олишнинг жадал ривожланиши билан изоҳлаган. Горизонтал бурғилаш ва қатламни гидравлик ёриш технологиялари зич тоғ жинсларидан кўпроқ нефт олиш имконини берган. 2015 йилда нефт экспортига қўйилган аксарият чекловларнинг бекор қилиниши эса америкалик ишлаб чиқарувчиларнинг ташқи бозорларга чиқишини кенгайтирган.
Рейтингда нефт маҳсулотлари ҳам ҳисобга олингани учун йирик нефт қайта ишлаш ва савдо марказлари юқори ўринларни эгаллаши мумкин. Нидерландия ва Сингапурнинг йирик экспортчилар қаторига кириши қисман шу омил билан изоҳланади.
Минтақалар орасида Яқин Шарқ етакчи
Яқин Шарқнинг нефт ва нефт маҳсулотлари экспорти кунига 22,4 миллион баррелни ташкил этган. Бу жаҳон экспортининг 29,2 фоизига тенг.
Кейинги ўринда Европа бўлиб, унинг кунлик экспорти 16,1 миллион баррелга, жаҳон ҳажмидаги улуши эса 21 фоизга етган. Шимолий Америкада бу кўрсаткичлар мос равишда 15,7 миллион баррел ва 20,5 фоизни ташкил этган.
