Жамиятдаги муаммолар ўз вақтида аниқланмаса, уни бартараф этиш чора-тадбирлари тезкорлик билан амалга оширилмаса, вақт ўтиши билан у муаммо тузалмас дардга айланади. Бунинг ортидан эса, аввало, халқ қийналади. Ортиқча вақт, маблағ ва саломатлик кетади. «KUN.UZ» таҳририятига келиб тушган мурожаатлардан бири Қашқадарё вилоятининг Яккабоғ туманидан йўлланган. Унда кўплаб қишлоқларни туман маркази билан боғлаб турувчи йўл жуда аянчли ҳолатга келиб қолгани, автомобиль эгаларига моддий зарар етказаётгани ва энг муҳими, сайёҳларни қизиқтириб келган Амир Темур ғорига мана шу йўл орқали борилиши куюниб ёзилган.
Мактубда шундай дейилади: «Ассалому алайкум. Мен Қашқадарё вилояти, Яккабоғ тумани, Калтакўл қишлоғида туғилганман. Мавзу ҳам айнан шу туман ҳақида. Мен ишим туфайли 22 йилдан буён Тошкент шаҳрида яшайман. Ҳар сафар қишлоғимга борганимда, туман марказидан токи қишлоғимизгача бўлган йўлнинг аҳволини кўриб, шу йўл бўйлаб жойлашган қишлоқларда яшаётган одамларга ич-ичимдан раҳмим келиб, ачиниб қайтаман.
Ушбу йўл таъмирталаб ҳолатда, йўл бўйлаб етарли инфратузилма ташкил қилинса, биринчи навбатда, шу ерда яшаётган аҳолининг яшаш шароити бир қадар енгиллашарди. Иккинчидан, дарё бўйлаб тоғга яқин жойларда дам олиш зоналари ташкил қилинса, у ерга қанча одам келиб ҳордиқ чиқариши, қанча одам иш билан таъминланиши мумкин. Учинчи жиҳати, ҳудудда экотуризм ривожланади. Ҳисор тоғ тизмасида жуда ажойиб табиат гўзалликлари, шаршаралар мавжуд».
Ҳолат билан яқиндан танишишга қарор қилдик.
Яккабоғ туман марказидан ҳудди шу йўлдан юриб, Тошқўрғон қишлоғи, ундан кейин Амир Темур ғорига борилади. Туман марказидан мурожаатчи яшаётган Калтакўл қишлоғигача 30 километрлик йўл бўлиб, шу масофада 10дан ортиқ қишлоқ жойлашган. Йўлнинг 26-27-километрларидан бошлаб, Ҳисор тоғ тизмаси этаклари бошланади. Ана шу йўлдаги ўнқир-чўнқирлар, ваҳимали жарликлар кишини таажжубга солади, беихтиёр ҳайратлантиради. Эски асфальт у ёқда турсин, ҳатто у «йўл» кўринишини ҳам йўқотган. Биз мазкур йўлда ҳаракатланаётган автоулов эгаларини сўзга тортдик. Суратга олмаслигимизни ва исмини сир сақлашимизни илтимос қилган ҳайдовчилар ўз дардларини тўкиб солишди.
