Мирзиёев Нукусда учрашув ўтказди. Кўпроқ иш ўринлари яратиш бўйича топшириқ берилди

Ўзбекистон Республикаси президенти Шавкат Мирзиёев раҳбарлигида Нукус шаҳрида бўлиб ўтган учрашувда Қорақалпоғистон иқтисодиётини ривожлантириш масалалари муҳокама қилинди, деб хабар бермоқда давлат раҳбари матбуот хизмати.

Инвестиция муҳити яхшилангани, зарур шарт-шароитлар яратилгани натижасида кейинги икки йилда Қорақалпоғистон ялпи ҳудудий маҳсулотида саноатнинг улуши 36 фоиздан 41 фоизга ошгани қайд этилди, дейилади хабарда.

Қайд этилишича, ҳунармандларни ҳар томонлама қўллаб-қувватлаш бўйича кўрилган чора-тадбирлар самарасида уларнинг сони йил бошидаги 460 тадан 1 минг 480 нафарга кўпайгани таъкидланган.

Давлат раҳбари кўпроқ иш ўринлари яратиш, бунинг учун янги корхоналар ташкил этиш ва мавжудларини кенгайтириш бўйича топшириқлар берди.

2019-2020 йилларда Қорақалпоғистонда саноат, хизмат кўрсатиш ва қишлоқ хўжалиги соҳаларини ривожлантириш бўйича 1 минг 18 та инвестиция лойиҳаси ишлаб чиқилган. Бу мақсадлар учун 11 триллион сўм, жумладан, 895 миллион доллар тўғридан-тўғри хорижий инвестициялар йўналтириш режалаштирилган. 

Масалан, келгуси йили Қораўзак туманида Жанубий Корея билан ҳамкорликда йилига 3,4 миллион тонна цемент ишлаб чиқарадиган завод қурилиши бошланади. Мўйноқ туманида балиқни консервалаш, Тахиатош туманида маккажўхорини қайта ишлаш ва қоғоз ишлаб чиқариш корхоналари ташкил этилади, дея билдирилган матбуот хизмати хабарида.

Эслатиб ўтамиз, аввалроқ Ўзбекистоннинг ҳар бир ҳудудида Президент мактаблари ташкил этилиши хабар берилганди.