Бухорода яна боғ можароси. Узоқ йиллар давомида барпо қилинган боғ бузиб ташланди

Яқинда интернет сайтлари ва ижтимоий тармоқларда тарқалган видео кўплаб муҳокамаларга сабаб бўлди. Ушбу видеода Бухоро шаҳридаги мевали дарахтлардан иборат боғ махсус техника ёрдамида аёвсизларча суриб ташланаётгани акс этган.

Бухоро шаҳрида яшовчи фуқаро Хосият Жалолованинг Kun.uz таҳририятига йўллаган, айнан ушбу видеолавҳа билан боғлиқ мурожаати жойида ўрганилиб, ижтимоий тармоқларда кенг муҳокама бўлган ҳолатга имкон қадар ойдинлик киритилди.

Youtube'да кўриш

Mover'да кўриш

Бухоро шаҳридаги «Фурқат» маҳалласи ҳудудидаги аввал яшнаб турган боғ ўрнида ҳозирда қурилиш учун кавланган ер ва мевали дарахтлардан бир уюм ўтин қолган.

Ушбу ҳолат юзасидан Хосият Жалолова қуйидагиларни сўзлаб берди.

«Уйимиз яқинида «Бухороёғэкстракт» очиқ акциядорлик жамиятига тегишли клуб бор эди. Анча йиллар аввал клубнинг атрофи чиқиндиларга тўла, ташландиқ жой эди. Шу ерни кўкаламзорлаштириш мақсадида шаҳар ҳокимига мурожаат қилган эдим. 2009 йилда рухсат беришди. Неча йиллардан буён меҳнат қилиб, бу ерни унумдор ерга айлантирдим. 500 тупдан ортиқ мевали дарахт экиб, боғ яратдим. Энди эса шаҳар ҳокимлиги бу ерни мендан тортиб олди ва бир кунда келиб, боғни аёвсизларча бузиб ташлашди. Шунча меҳнатим ва боғимга ачинаман. Неча йиллардан буён қанчадан-қанча маблағ сарфлагандим бу ерга. Бу ерга уй қурилади, дейишди. Ахир, ўша уй қурмоқчи бўлганларнинг ўзлари боғ қилишимга рухсат беришганди-ку?! Ўз вақтида огоҳлантиришганда мен шунча меҳнатимга, сарф-харажатга куйиб қолмасдим. Ҳаттоки, боғ бузилишидан кейин дарахтлардан қолган ўтинни ҳам менга раво кўришмади ва сотиб юборишди. Менга етказилган зарар қопланишини сўрайман», – дейди Хосият Жалолова.

Ўрганишлар давомида маълум бўлишича, Хосият Жалолова 2009 йилда ушбу ерни ободонлаштириш учун шаҳар ҳокимлигига ариза билан мурожаат қилган.

«Бухороёғэкстракт» ОАЖ касаба уюшмаси қўмитасининг 2008 йил 29 декабрдаги 10-сонли қарори билан Хосият Жалоловага клубнинг ўнг томонидаги бўш ер майдонини кўкаламзорлаштириш учун рухсат берилган. Бухоро шаҳар архитектура ва қурилиш бошқармаси томонидан 2009 йил 21 майдаги 923-сонли хат билан ушбу ҳудудда кўкаламзорлаштириш ишларини олиб боришга эътироз йўқлиги маълум қилинган.

Бухоро шаҳар ҳокимининг 2010 йил 26 мартдаги 363-сонли «Ер майдонларини захирага олиш тўғрисида»ги қарори асосида «Бухороёғэкстракт» ОАЖ Когон туманига кўчирилиши муносабати билан унинг балансида бўлган жами 109666 кв.м. ер майдони Бухоро шаҳар ҳокимлиги балансига ўтказилган.

Хосият Жалолова боғга ниҳоллар қадаб, уларни парваришлашда давом этган. Ўз ҳисобидан маблағ ажратиб, бу ерларни обод жойга айлантирган.

Ушбу масала юзасидан Бухоро шаҳар ҳокимлиги мутасаддилари билан суҳбатлашдик.

«Бухоро шаҳар ҳокимининг 2016 йил 15 августдаги 1488-сонли қарори билан «Электрпайванд-инвест» хусусий корхонасига шаҳарнинг А.Ғиждувоний кўчасида жойлашган «Дилкушои Бирун» массиви (собиқ «Бухороёғэкстракт» АЖ ҳудуди) паст қаватли турар жой биноси қуриш учун ажратиб берилган. Шаҳарнинг тасдиқланган бош режасига асосан боғ ўрнида ҳам уй қурилиши лозим. Аммо фуқаронинг қаршилиги туфайли бу ерда қурилиш ишлари шу кунгача бошланмаган эди», – дейди Бухоро шаҳар ҳокимлиги қурилиш бўлими бош мутахассиси Илёс Зокиров.

Бухоро шаҳар ҳокимининг қурилиш масалаларига масъул ўринбосари  Қаҳрамон Дўстовнинг таъкидлашича, боғ ўрни суд қарорига асосан, фуқародан қонуний асосларда олинган.

Маълум бўлишича, қурилиш ишларини амалга ошира олмаётган «Электрпайванд-инвест» хусусий корхонаси ушбу ҳолатни бартараф этиш, қурилиш ишларини амалга оширишда ҳуқуқий ва амалий ёрдам сўраб Бухоро шаҳар ҳокимлигига йўллаган мурожаати асосида Бухоро шаҳар ҳокимлиги томонидан Фуқаролик ишлари бўйича Бухоро туманлараро судига 2018 йил 12 июнда даъво аризаси киритилган.

Мазкур даъво аризаси ФИБ Пешкў туманлараро судида кўриб чиқилиб,  2018 йил 18 сентябрдаги ҳал қилув қарори асосида даъво талаблари қаноатлантирилиб, фуқаро Х.Жалоловани Бухоро шаҳар А.Ғиждувоний кўчаси ёқасида жойлашган паст қаватли турар жой биноси қуриш учун мўлжалланган 500 кв.м. ер майдонидан мажбурий тартибда чиқариш белгиланган. Шунингдек, суд қарори билан Х.Жалоловага қурилиш ишларига тўсқинлик қилмаслик мажбурияти юклатилган.

Шаҳар ҳокими ўринбосари Қаҳрамон Дўстовнинг таъкидлашича, фуқаро бир неча марта судга чақирилишига қарамай, суд мажлисларига келмаган. Аммо Хосият Жалолова бу гапни тасдиқламади.

Бухоро шаҳар ҳокимлиги ва фуқаро ўртасида шундай тушунмовчилик юзага келган. Мурожаатчи кўп йиллик меҳнати синган боғ бузиб юборилганидан норози бўлиб, ўзига етказилган зарар қопланиши лозимлигини билдирмоқда. Ҳокимликнинг фикрига кўра, барчаси қонун доирасида амалга оширилган. Таҳририят ким ҳақ ва ким ноҳақ эканлиги ҳақида фикр билдиришдан йироқ бўлгани ҳолда хулоса чиқаришни жамоатчилик ихтиёрига қолдиради.

Бундан олдинроқ Бухоро вилояти, Вобкент туманида ҳам 20 минг мевали дарахтдан иборат боғлар бузилиш арафасида экани ҳақида хабар берилганди.

Бардошбек САМАД ўғли,
Kun.uz мухбири.