Чемпионлар лигаси гуруҳ босқичининг охирги кунидаги энг қизиқарли ўйин кутилганидек Украина пойтахти Киевда эмас, Нидерландия пойтахти Амстердамда бўлиб ўтди. 

«Аякс» – «Бавария» – 3:3
Голлар: Тадич, 61; Тадич, 82-пен; Тальяфико, 90+5 – Левандовски, 13; Левандовски, 87-пен; Коман, 90.
Аякс – Онана, Мазрауи, де Лигт, Вебер, Тальяфико, де Йонг, Блинд, ван де Бек (Дольберг, 78), Зиёш, Тадич, Нерес (Хунтелар, 89).
Бавария – Нойер, Рафинья, Зюле, Боатенг, Алаба, Гнабри (Алькантара, 62), Киммих, Горетцка (Саншеш, 89), Рибери (Коман, 71), Левандовски, Мюллер.
Огоҳлантиришлар: Киммих (28), Рафинья (37), де Лигт (40), Блинд (63), Тальяфико (90).
Четлатишлар: Вебер (67), Мюллер (75).

Охирги тургача кейинги босқич масаласини ҳал қилиб бўлган икки жамоа гуруҳ ғолибини аниқлаш мақсадида майдонга тушишди. Мюнхенликлар биринчи ўринда қолиши учун мағлуб бўлмасликлари керак эди.

Жамоаларнинг биринчи даврада Мюнхенда кечган учрашувида ҳам дуранг ҳисоби қайд этилган, ўшанда амстердамликлар ғалабага ҳақли ўйин кўрсатишганди. 

Бундеслигада омадсиз старт қайд этган ва айни вақтда Дортмунднинг «Боруссия»сидан 9 очко ортда қолиб, турнир жадвалида учинчи ўринда бораётган «Бавария» гуруҳ масаласи ҳал бўлган бўлсада, Амстердамдаги ўйинга жанговар таркибни туширди. Бу таркиб ўйиннинг илк дақиқалариданоқ ташаббусни қўлга олди, Серж Гнабри 10-дақиқагача иккита гол уриши мумкин эди, аммо у ўз имкониятларидан фойдалана олмади. Унинг биринчи зарбасига аниқлик етишмаган бўлса, иккинчи уринишини рақиб дарвозабони Онана бартараф этди. Аммо у бўлим давомида бошқа бир жамоадоши гол уришини таъминлади, унинг ҳимоячилар орасидан ўтказиб берган пасидан кейин Левандовски дарвозабон билан яккама-якка чиқиб бориб, осонлик билан ҳисобни очди.

Танаффусга «Бавария» катта устунлик билан йўл олиши мумкин эди, аммо Рибери ва Левандовски қулай вазиятларни йўққа чиқарди. Бўлим охирида эса «Аякс»да ҳисобни тенглаштириш учун имконият пайдо бўлди, аммо Нойер Зиёшнинг зарбасини қайтарди.

Иккинчи бўлим воқеаларга бой бўлди. Бўлим қаҳрамонлари ўйин ҳаками Клеман Тюрпен ҳамда меҳмонлар ҳимоячиси Жером Боатенг бўлишди. 61-дақиқада Тадич ҳисобни тенглаштирганидан кейин футболчилар қизиша бошлашди. Шундан кейин икки томондан биттадан футболчига қизил карточка кўрсатилди.

Аввалига, 67-дақиқада Макс Вебер Леон Горетцкани йиқитгани учун майдондан четлатилди.