Пентагонга янги раҳбар тайинланди

АҚШ мудофаа вазирининг биринчи ўринбосари Патрик Шанахан 2019 йил 1 январдан Пентагон раҳбари вазифасини вақтинчалик бажарувчи сифатида иш бошлайди. Бу ҳақда твиттерда АҚШ президенти Дональд Трамп хабар қилган.

“Мудофаа вазирининг истеъдодли биринчи ўринбосари Патрик Шанахан 1 январдан Пентагон раҳбари лавозимини вақтинчалик эгаллайди. Патрик ўринбосар бўлиб ишлаганда катта муваффақиятларга эришган”, деб ёзган Трамп.

Пентагоннинг амалдаги раҳбари Жеймс Мэттиснинг истеъфога кетишини 20 декабрда Трамп маълум қилган. Мэттиснинг истеъфога чиқиш ҳақидаги мурожаатида у бу қарорни президент билан қарашлари турлича бўлгани сабабли қабул қилаётгани маълум қилинган.

Шанахан меҳнат фаолиятини 1986 йилда Boeing’да ишлаш билан бошлаган. У компанияда бир қатор раҳбар лавозимларини эгаллаган. 2017 йил ёзида мудофаа вазири ўринбосари лавозимига тасдиқланган.