Ўзбекистон Республикаси ҳудудлари, хусусан, Қорақалпоғистон ҳудуди ижтимоий-иқтисодий мавқеини юксалтириш мақсадида, Нукус аэропортида «Очиқ осмон» режими жорий этилмоқда. Бу ҳақда Дававианазорат матбуот хизмати хабар берди.
Ушбу режимга мувофиқ, ҳаво қатнови тўғрисидаги ҳукуматлараро Битимлар асосида тайинланган хорижий авиакомпанияларга парвозлар сонини
Нукус аэропортига чекловсиз амалга ошириш имкони берилади.
Парвозлар ҳавонинг 5-эркинлик ҳуқуқисиз қайд этилган Битимлар доирасида Нукус аэропорти техник имкониятларини ҳисобга олган ҳолда амалга оширилади.
Нукус аэропортида «Очиқ осмон» режими ИАТА (Ҳаво транспорти халқаро ассоциацияси) «2019 йил-Ёз мавсуми»дан бошлаб ИАТАнинг «2021-2022-Қиш мавсуми»гача амал қилади.
Ушбу масала бўйича Парвозлар хавфсизлигини назорат қилиш давлат инспекциясининг Ўзбекистон Республикаси билан ҳаво қатнови соҳасида халқаро шартномалар имзолаган хорижий давлатларнинг авиация маъмуриятларига дипломатик каналлар орқали тегишли билдиришномалари юборилган.
