«Сиёсий қотиллик» – россиялик сиёсатчи АҚШнинг Венесуэладаги ишларга аралашувига шундай ном берди

АҚШнинг Венесуэлада бўлаётган воқеаларга аралашуви сиёсий қотиллик ҳисобланади. Бу ҳақда Россия Думасининг халқаро ишлар бўйича Қўмитаси аъзоси Адальби Шхагошев «L!FE» нашрига берган интервьюсида айтиб ўтди.

«Биринчидан, АҚШнинг ҳаракатларини сиёсий қотиллик деб биламан. Бу бутун дунё бўйлаб давом этаётган «рангли инқилоб» доирасида содир бўлмоқда. Улар (АҚШ назарда тутилмоқда) «рангли инқилоб»нинг бундай кўринишдаги намойишларини ўзлари жисмонан аралашиш имконига эга бўлган ҳар қандай давлатда қила оладилар. Такрорлайман, улар жисмоний ва ҳарбий жиҳатдан аралашишга қурби етадиган ҳар қандай давлатда бундай ишларни қила олишади»,- дейди сиёсатчи.

Эслатиб ўтамиз, 23 январь куни Венесуэлада мухолифот етакчиси Хуан Гуайдо ўзини вақтинчалик президент деб эълон қилди ва уни биринчилардан бўлиб АҚШ президенти Дональд Трамп тан олди.

Россия етакчиси Владимир Путин эса Венесуэланинг қонуний ҳукуматини, хусусан Николас Мадурони қўллаб-қувватлашини маълум қилди.