Ҳиндистон жавоб қайтарди: Покистоннинг қирувчи самолёти уриб туширилди

Фото: AFP

Ҳиндистон ҳарбий-ҳаво кучларининг маълум қилишича, Покистонга қарашли бўлган F-16 кўп нишонли қирувчи самолёти уриб туширилган. Бу ҳақда Firstpost нашри ёзмоқда.

Бундан олдин, Покистон ҳарбий-ҳаво кучлари мамлакат ҳаво ҳудудига кириб келган Ҳиндистоннинг иккита ҳарбий самолёти уриб туширилгани ҳақида хабар берганди. ОАВ маълумотларига кўра, икки учувчи ҳалок бўлган, яна бири асирга олинган.

ТАСС’нинг Покистон қуролли кучлари матбуот котиби генерал-майор Асиф Ғофурга асосан хабар қилишича, «Ҳиндистон ҳарбий-ҳаво кучларининг қирувчи самолётлари мамлакат ҳаво ҳудудини бузиб кирган».

Ҳиндистон ва Покистон ўртасидаги муносабатлар 14 февраль куни содир бўлган Кашмирдаги терактдан сўнг кескинлашди. Нью-Деҳли Исломободни ҳужум учун масъулиятни ўз зиммасига олган «Жайиши Муҳаммад» гуруҳини қўллаб-қувватлашда айблади.

Тайёрлаган Отабек Матназаров

#Ҳиндистон #Покистон #Жайиши Муҳаммад

14 февраль куни Покистон ҳудудида ўрнашган «Жайш-э-Муҳаммад» террорчи гуруҳи Кашмирда Ҳиндистон армияси ҳарбийлари колоннаси ўтаётган йўлда теракт содир этиши натижасида 46 нафар ҳинд ҳарбийси ҳалок бўлди. Бу воқеа ортидан Покистон ва Ҳиндистон муносабатларида можаро яна авж олди.