Украина президентлигига номзод Владимир Зеленский ўзига нисбатан жиноий иш қўзғатилганини маълум қилди

Украина президентлигига номзод Владимир Зеленский ҳукуматни босим кўрсатишда айблади ва ўзига нисбатан жиноий иш қўзғатилганини маълум қилди.

"Ҳукумат паст кетмоқда. Биринчидан, менинг офисимни эшитишмоқда, иккинчидан менга ва "95-квартал"га қарши қандайдир товламачилик бўйича жиноий иш қўзғатишди. Учинчидан, хабарларга қараганда, махсус одамлар менинг сиёсий билбордларимни ўрнатиш учун ЛХРдан одам қидиришмоқда", - деди у Facebook саҳифасидаги видеомурожаатида.

Зеленскийнинг айтишича, бундан ташқари, яқин вақт ичида у гўёки "2002 йилда Чернигов областида одам уриб юборганлиги" ҳақида яна бир иш очилиши мумкин.

Зеленскийга нисбатан жиноий иш қўзғатилгани ҳақида ҳозирча расмий хабарлар йўқ.

Аввалроқ Киев полицияси Владимир Зеленскийнинг офиси яқинида яширин эшитиш ускуналари топилганлиги бўйича суриштирув ишлари олиб борилаётгани ҳақида хабар қилганди.

Украинада президент сайлови 31 мартда бўлиб ўтади. Сўровлар натижаларига кўра, рейтингда Владимир Зеленский етакчилик қилмоқда, иккинчи ва учинчи ўринларда амалдаги президент Пётр Порошенко ва "Батькившчина" партияси раҳбари Юлия Тимошенко бормоқда.