Ҳафта ўйинлари анонси: Испания ва Германияда чемпионлик ўйинлари
|02:00 / 06.04.201913 52412 мин
Келаси ҳафта Европа Чемпионлар Лигасида чорак финал ўйинлари бошланади. Чигалёзди сифатида эса, дам олиш кунлари эътиборингизга кучли бешликда навбатдаги тур ўйинлари бўлиб ўтади. Бу ҳафта Италияда расман, Испанияда амалий томондан чемпион номи аниқланиши ҳам мумкин. Германияда эса, «Олтин учрашув» мақомига мос келадиган қизиқарли ўйин кутиб турибди.
САУТҲЭМПТОН – ЛИВЕРПУЛЬ (5 апрель, 23:55)
Шанба-якшанба кунлари Англия Кубогида ярим финал ўйинлари ташкил этилиши муносабати билан, навбатдаги тур ҳафта бўйича сочиб юборилган ва баъзи ўйинлар сешанба-чоршанба кунлари ҳам бўлиб ўтди. Бугун эса, «Ливерпуль» қайсидир маънода ўзига «фарм клуб» ҳисобланган «Саутҳэмптон» майдонига сафар қилади. Чемпионлик пойгасида ҳар бир йўқотилган очко якунда совринсиз қолишга сабаб бўлишини инобатга олсак, бу ўйин жуда кескин ўтишини тахмин қилса бўлади.
Биринчидан, «Саутҳэмптон»нинг турнир жадвалидаги аҳволи ҳам яхши эмас. Жамоа 33 очко билан 16-ўринда боряпти ва хавфли зонадан узоқлашиб кетгани йўқ. Иккинчидан, саутҳэмптонликлар «Ливерпуль» учун анча ноқулай рақиб саналишади. Тўғри, жамоа «Ливерпуль»га қарши тўрт ўйиндан бери гол ура олмаяпти, лекин масалан, икки йил олдин айнан «Саутҳэмптон» Лига кубогида «қизиллар»ни чиқариб юборганди. Умуман, жамоа турнир жадвалида қайси ўринда боришидан қатъи назар топ-клубларга қарши муносиб тўп суришини таъкидлаш керак. Масалан, ўз майдонида «Арсенал», «Тоттенҳэм» устидан қозонилган ғалабалар, «Манчестер Юнайтед» билан ҳар икки ўйинда ғалабага яқин бўлганликлари, «Стемфорд Бриж»даги дуранг кўп нарсадан далолат беради.
Ва албатта, юқорида эсланганидек, Саутҳэмптондан жуда кўп футболчилар Ливерпулга кўчиб ўтишган: бугун улардан Мане, Лаллана, Клайн каби футболчилар собиқ мухлислари қаршисида тўп суришлари мумкин. Мезбонлар сафида эса, Ингз собиқ жамоасига қарши ўзини кўрсатишга уриниб кўради.
ЮВЕНТУС – МИЛАН (6 апрель, 21:00)
Туринликлар Италияда янги рекорд ўрнатишлари, яъни 7 апрелдаёқ расман чемпионга айланишлари мумкин. Тўғри, бу воқеа «Ювентус» – «Милан» ўйинида рўй бермайди, чунки жамоа «Наполи»дан етарлича ўзиб кетиши учун, эртасига, «Наполи» «Женоа»га ютқазиши талаб этилади.
Шундай бўлса-да, «Ювентус» бу ўйинда ғалаба учун майдонга тушиши ва имкон қадар тезроқ ички совринларнинг эгасига айланиб олиши муҳим. Шу тариқа, бор имкониятини 22 йиллик орзу – Чемпионлар Лигасини қўлга киритишга қаратса бўлади. Рақиб «Милан» эканини эътиборга олсак, бу ўйин жуда кескин курашлар остида ўтиши табиий. Баъзи қўшимча ҳолатлар бу ўйинда томонларнинг имкониятларини тенглаштиради.
Мавзуга оид
Биринчидан, турнир эътибори билан миланликларда мотивация каттароқ. «Милан»га ЕЧЛ ўринлари учун курашда очколар муҳим. 2019 йилни жуда яхши бошлаб, қаторасига ғалабаларга эришган «Милан»да сўнгги пайтларда пасайиш кузатилди ва Женнаро Гаттузо шогирдлари уч ўйиндан бери ғалаба нималигини билишмаяпти. Милан дербисидаги мағлубиятни тушуниш мумкиндир, аммо «Сампдория»дан мағлубият ва ўз майдонида «Удинезе»ни енга олмасликни тушуниш қийин. Натижада, «Милан»га «Аталанта» яқинлашиб олди ва агар миланликлар яна очко йўқотадиган бўлса, бу фарқ минимал даражага етади.
Иккинчидан, «Ювентус» таркибида муаммолар бор. Криштиану Роналду жароҳат туфайли ўйнай олмаяпти ва ЕЧЛдаги муҳим ўйин олдидан бу ўйинда ҳам таваккалчиликка борилмаса керак. Умуман, келаси ҳафтадаги еврокубоклар туфайли, «Ювентус» бу ўйинга анча кучсизланган таркибни тушириши эҳтимоли катта. А Сериядаги 18 очколик фарқ барибир якунда туринликларга навбатдаги чемпионликни олиб бериши шубҳасиз.
Шу билан биргаликда, айнан Роналдунинг сафда бўлмагани бошқа ёш иқтидор – Мойзе Кинга йўл очди. Ушбу 19 ёшли ҳужумчи 4 ўйиндан бери гол урмоқда. Табиийки, Кин – Пёнтек дуэлини кўриш мухлислар учун қизиқ бўлса керак.
Роналдудан ташқари, мезбонлар таркибида Дуглас Коста, Андреа Барзальи, Хуан Куардадо ва Сами Хедира каби футболчилар жамоага ёрдам бера олишмайди. «Милан»да эса, Жакомо Бонавентура мавсум охиригача сафдан чиққан.
Ўзаро ўйинларга қаралса, «Ювентус» 7 ўйиндан бери миланликлар устидан ғалаба қозониб келмоқда.
БАРСЕЛОНА – АТЛЕТИКО (6 апрель, 23:45)
Испанияда ҳам турнир жадвалини бошқариб турган икки жамоа ўзаро орани очиқ қилишади. Аммо немислардан фарқли равишда, бу ерда очколар фарқи каттароқ – 8 очко. Шундай бўлса-да, каталонияликлар хотиржамликка берилмасликлари керак. Сабаби, мағлубият орадаги фарқни янада қисқартиради ва «Атлетико»нинг еврокубокларда қатнашмаётгани эътиборга олинса, «Барселона» учун қўшимча курашнинг пайдо бўлиши анча ноқулайлик туғдириши мумкин.
Бунинг устига, Ла Лигадаги кейинги рақиблар – Ла Лигада қолиш учун курашаётган «Уэска», «Сельта» ва «Леванте», ҳамда Чемпионлар Лигасидаги ўринлар учун даъвогар бўлган «Алавес» ва «Хетафе»дир. Бундай рақибларга қарши ўйнаш қийин, охирги дақиқаларгача курашишга тўғри келади. Масалан, лигадаги ўрин учун курашаётган «Вильярреал» пешқадамга қандай муаммо туғдирганини кўрдик. 2:0 ҳисобида ҳисобда олдинга чиқиб олиб, хотиржамликка берилган «Барселона» ўз дарвозасидан 4та гол олиб чиқди. Демак, Чемпионлар Лигаси билан параллел тарзда, ички чемпионат хотиржамроқ ўтишини истаса, «Барселона» бу ўйинда ҳеч бўлмаса дуранг ўйнаши керак. Ғалаба эса, амалий тарафдан Испаниядаги чемпионлик масаласига нуқта қўяди.
Ўйин «Камп Ноу»да бўлса-да, бу стадионда мадридликлар анча муносиб ўйнай олишади, масалан, охирги 8 ўйиннинг 4тасида дуранг натижа қайд этган. Бу дуранглар ҳам оддий бўлмаган – бир марта шу дуранг ёрдамида «Атлетико» мезбонлардан чемпионликни тортиб олган бўлса, бир мартасида айнан дуранг натижа каталонияликларни Чемпионлар Лигаси чорак финалида қолдириб кетган.
Бошқа тарафдан эса, «Атлетико» Испаниядаги мусобақаларда «Барселона» устидан ғалаба қозона олмаганига анча бўлди. Охирги марта мадридликлар «Барселона»ни енгишганида, «Атлетико»нинг бир голини Диего Форлан урган, каталонияликлар сафида эса, Златан Ибраҳимович гол муаллифи бўлган. Бу ўйинга тўққиз йилдан кўп вақт бўлди.
Дарвоқе, Вальверде жамоаси келаси ҳафта Чемпионлар Лигаси доирасида Манчестерга сафар қилиши керак. Ўша ўйиннинг янада муҳимроқ эканидан келиб чиқиб, мураббий баъзи футболчиларга дам бериши, ротацияда давом этиши мумкин. Бошқа тарафдан, бундай ўзгаришлар, айниқса, Мессининг майдонга тушмаслиги қандай оқибатларга олиб келиши мумкинлигини ўтган турда, юқорида эсланган «Вильярреал»га қарши ўйинда кўрдик.
БАВАРИЯ – БОРУССИЯ Д (7 апрель, 21:30)
Кучли бешлик чемпионатлари ичида фақат Германия ва Англияда чемпионлик кураши қизғин давом этмоқда. Агар Англияда ўзаро ўйин январда ўтиб бўлган ва томонлар фақат сиртқи кураш олиб бораётган бўлишса, Бундеслигада мавсум тақдирини ҳал қилиши мумкин бўлган ўйин бўлиб ўтади. Минимал фарқ билан соврин учун курашаётган икки жамоа рўбару келади.
Ҳар икки жамоа чорак финалда еврокубоклардан чиқиб кетди. Агар ёш дортмундликлар учун бу позиция у қадар фожиали бўлмаса, «Бавария»да ички чемпионатнинг ҳам бой берилишини жуда оғир қабул қилишади. Ўтган турда «Фрайбург» билан ўйиндаги дурангдан кейин эса мюнхенликлар дортмундликлардан яна 2 очко ортда қола бошлади. Демак, бу ўйинда мезбонларни фақат ва фақат ғалаба қониқтиради.
Бундеслига доирасидаги ўйинларда «Бавария» ўз майдонидаги охирги беш ўйинда Дортмунд устидан ғалаба қозонган. Булардан учтаси йирик ҳисобда бўлган ва масалан, ўтган мавсумда 6:0 ҳисоби қайд этилган. Умуман, ушбу мавсумдаги илк ўйинни ҳам «Бавария» устунлик билан бошлаганди. Аммо иккинчи бўлимда дортмундликлар ўйинда бурилиш ясаб, 3:2 ҳисобида ғалаба қозонганди.
Таркиблар борасида ҳар икки томондаям йўқотишлар бор. Мезбонларга Роббен, Толиссо, Алаба ва Нойер ёрдам бера олишмайди. «Боруссия» таркибида эса, Диалло, Ҳакими, Пулишич, Пишчек ва Максимилиан Филипп сафдан чиққан.
ЭВЕРТОН – АРСЕНАЛ (7 апрель, 18:05)
Топ-6 жамоалари ичида таркиб ва амбициялар борасидаги фарқ, мураббийнинг ўзгаргани ва сўнгги икки йилдаги кўрсаткичларга биноан, «Арсенал» аутсайдердек кўринган бўлса-да, аслида ундай бўлиб чиқмади. Ҳозирда икки ЕЧЛ ўрни учун курашаётган тўрт жамоа ичида ҳар томонлама яхши имкониятга эга бўлгани айнан Эмери жамоасидир.
«Арсенал» мавсум охиригача бирорта ҳам топ-6 вакилига қарши ўйин олиб боришмайди. Аммо бошқа тарафдан, «Арсенал» сафар ўйинларини «Эвертон», «Уотфорд», «Вулверҳэмптон», «Лестер» ва «Бёрнли»га қарши ўтказади. Яъни, кучли ўнликка яқин бўлган ва айнан топ клубларга қарши муносиб қаршилик кўрсата оладиган рақиблар. Уларнинг ичида «Эвертон» албатта, топларга энг яқин бўлганидир.
Жамоа мавсумни анча беқарор бошлаган бўлса-да, айниқса, сўнгги турларда айнан топ рақибларга қарши муносиб қаршилик кўрсата оляпти. Масалан, «Эвертон» ўз майдонида «Ливерпуль»га мағлубиятга учрамади ва ҳатто иккинчи бўлимда устунлик қилди. Худди шу сценарийда ўтган «Челси»га қарши ўйинда эса, «Эвертон» 2:0 ҳисобида ғалаба қозонди. Демак, «Арсенал»га ҳам бу ўйинда осон бўлмаслиги тайин.
Сўнгги йилларда ҳам «Эвертон» вақти-вақти билан «Арсенал» устидан ғалаба қозониб туришини, масалан, 2014 йилда ҳатто йирик ҳисоб қайд этилганини эслаш мумкин. Жорий мавсумнинг биринчи даврасидаги ўйинда эса мезбонлар 2:0 ҳисобига ғалаба қозонганди.
Таркиблардаги йўқотишлар. «Эвертон» сафида фақат Йери Мина жамоага ёрдам бера олмайди. Унинг сафга қайтиши ойнинг ўрталарига мўлжалланган. Меҳмонларда эса йўқотишлар жуда кўп. Аарон Рэмзи, Гранит Жака, Лоран Косьелни каби муҳим футболчилар учрашувга тайёр эмас. Эктор Беллерин ва Данни Уэлбек эса, мавсум охиригача сафдан чиққан.
Шунингдек, мезбонлар таркибида Тео Уолкоттнинг собиқ жамоасига қарши ўйини мухлислар учун қизиқ бўлса керак.
