ЕЧЛда сенсациялар куни. «Бавария» 3 та, «Интер» 4 та ўтказди
|12:394 83914 мин
Сешанба оқшомида Чемпионлар лигаси умумий гуруҳ босқичида 2-тур доирасида 9 учрашув бўлиб ўтди. Норвегиядаги ўйинда Олисенинг тушунарсиз ҳаракатлари «Бавария»га қимматга тушди; «Арсенал» 3 та, «Барса» 4 та гол урди ва турнир жадвалида пешқадам бўлиб олди; Раҳмоналиев «Сабоҳ» билан илк ғалабага эришди; «МЮ»да инқироз давом этмоқда.
Тиғиз тақвимни ҳисобга олган ҳолда Микел Артета ЕЧЛ гуруҳ босқичи ўйинларида аралаш таркибни ташламоқда: «Лилл»га қарши ўйинда Мерино, Йокереш ва Эзе каби футболчиларга имкон берилди, Эдегор, Ҳаверц ва Сака захирада қолдирилди. Ўйиннинг биринчи бўлими биргина Уэданинг бекор қилинган голи билан ёдда қолди. Япониялик ҳужумчи Габриэл блоклаган зарбадан кейин тўпга биринчи бўлиб етиб келганди, аммо у зарба берилиши вақтида офсайдда қолгани ойдинлашди.
Иккинчи бўлимда эса лондонликлар даражадаги фарқни кўрсатиб қўйди: ўнг қанот ҳимоячиси Тимбер рақиб жарима майдонига кириб бориб, ҳақиқий ҳужумчилардек ҳаракат қилди ва тўни ҳимоячи оёқлари орасидан ўтказиб, ўткир бурчакдан кучли зарба берди. Ўша заҳоти Артета ҳужумдаги асосий ижрочиларини майдонга ташлади ва рақибни узил-кесил таслим этди. Аввалига Букайо Сака Эзени голли пас билан таъминлади. Кейин эса Эдегор ва Ҳаверцнинг комбинациясидан кейин у марказий ҳужумчи позициясида пайдо бўлиб, якуний ҳисобни ўрнатди – 3:0.
«Барселона» ўйинда биринчи бўлим гол ўтказиб юборган бўлса-да, яна йирик ҳисобда ғалаба қозонди. Туркларнинг россиялик легионери Алексей Батраков Леаунинг пасидан кейин рақиб жарима майдонида ҳеч қандай қаршиликка учрамасдан ҳисобни очди. Бўлим давомида мезбонлар яна бир бор каталонияликлар дарвозасини ишғол этишди, аммо Осимҳеннинг бошда йўллаган зарбасидан кейин тўп дарвозага бориб тушди, аммо видеотакрордан кейин зарба вақтида офсайдда бўлган Йилмаз дарвозабонни чалғитган деб топилди ва гол бекор қилинди.
Мавзуга оид
Бўлим охирида Канселу яна бир бор катта саҳнага чиқиб, ҳисобни тенглаштирди, иккинчи бўлимда эса Ямал ёрқин ўйин кўрсатди. Унинг икки голли паси ўйин тақдирини ҳал қилди. Иккинчи ассист – тур безагига айланди.
Two special Lamine Yamal assists 😮💨 Who did it best here? 🅰️ @lays_football | #UCLassists https://t.co/imMpJxn7D9
«Галатасарой» стартдаги икки ўйинда ҳам ютқазиб, турнир жадвалининг сўнгги қисмида, «Барселона» эса кетма-кет ғалабалардан кейин турнир жадвалини бошқармоқда.
«Викинг» иккинчи дақиқадаёқ «Бавария» дарвозасини ишғол этиб, тарих ёзди. Нойернинг саломатлигида юзага келган муаммолардан кейин унинг ўрнини эгаллаган Урбиг Стенснесснинг зарбаси қаршисида ожиз қолди. Кейин эса норвегияликлар мюнхенликлар штурмига дош берди ва қарши ҳужумда рақибни жазолаб, танаффусга сенсацион ҳисоб билан йўл олди.
Венсан Компани воқеаларнинг бундай ривожига танаффусда учталик ўзгариш билан реакция қилди ва бу ўз самарасини бериб, 60-дақиқагача ҳисоб тенглашди. Кейн аввалига Лаймер ишлаган пеналтидан ҳисобни қисқартирди, кейин эса Киммиҳнинг узатмасини бошда йўллаган зарбаси билан голга айлантирди. Инглиз ҳужумчисининг ЕЧЛдаги голли серияси тўққиз ўйинга етди. Бўлим давомида Ҳарри тўпни ҳимоячилар ортига ташлаб бериб, бу тўпга етиб борган Лаймер эса Диашни голли узатма билан таъминлади ва сенсацияни бекор қилгандек бўлди.
Аммо шу паллада Олисе «Бавария»ни ноқулай ҳолатда қолдирди. Жамоа етакчиларидан бўлган француз вингери бир дақиқа ичида икки сариқ карточка олди ва майдонни тарк этди: у аввалига тўпни олдиргач, рақибни ушлаб қолди, ўйин тўхтатилганида эса тўп билан рақиб футболчисининг бошига урди.
Қолган вақт мобайнида бир киши кўп бўлиб ўйнаган викинглар сўнгги дақиқаларда ҳисобни тенглаштиришди ва фаворитни қимматли очколардан маҳрум этишди.
Асосий ранглари қора-кўк бўлган бу икки жамоа тўқнашуви кутилган сценарийда кечмади. Биринчи бўлим ўрталаридан ўтганда Ҳоқон Чалхонўғли жарима майдонида фол ишлатди, белгиланган пеналтини эса Тресолди голга айлантирди. Туркиялик яримҳимоячи айбини ювиш учун яхши имкониятга эга бўлганди, аммо унинг жарима майдони ташқарисидан йўллаган зарбасидан кейин тўп тўсинга тегди. Миланликлар барибир бўлим охирида собиқ жамоадоши Зоммерни ажойиб комбинация билан доғда қолдиришди. Бу ҳужум давомида Димарко товони билан пас берди, Лаутаро эса жарима майдони ичида ажойиб ҳаракат қилиб, корпус қўйиш орқали ҳимоячини йўлдан олди ва ўгирилиб, бурчак томон аниқ зарба йўллади.
Иккинчи бўлим бошида эса швейцариялик дарвозабон аргентиналик тўпурарнинг яқин масофадан йўллаган зарбасини қайтариб, ўзига хос реванш олди. Шу куни 9 та сэйв ижро этган Зоммернинг нерадзуррилар дарвозасида қолган меросхўри Хосеп Мартинес эса жамоасини уялтирди. У аввалига тўпга чиқишда хатога йўл қўйди ва Тресолди бўш дарвозани ишғол қилди. Кейинги вазиятда эса ҳужумчининг оёқлари остига тўпни ташлаб берди. Ҳет-трик қайд этган Тресолди Адейемининг рекордини янгилаб, турнирда бир ўйинда уч гол урган энг ёш германияликка (22 ёш-у 54 кунлик) айланди.
«МЮ» фанатлари азобланишда давом этмоқда. Мадридда меҳмон бўлган Кэррик шогирдлари илк сониялардаёқ гол ўтказиб юборишди: Барриос тўпга бир тегинишдаёқ дарвозани ишғол қилди, Ҳевен эса тўпга ета олмади. Шундан кейин «Юнайтед» ташаббусни қўлга олди, аммо вазиятлардан фойдаланишда оқсади. Иккинчи бўлимда эса Йоро қўпол ҳаракати учун қизил карточка олиб, ўйинни қутқариб қолиш вазифасини янада қийинлаштирди. Қизилдан кўп ўтмай Лукман ўйин масаласини ҳал қилди: Ламменснинг сэйвидан кейин тўпга барчадан биринчи бўлиб етиб келди. Бу «Юнайтед» тарихидаги энг ёмон старт бўлмоқда: «қизил иблислар» бунгача ҳеч қачон мавсум стартида тўққиз ўйиндан кейин бунчалик ёмон кўрсаткич қайд этмаганди (икки ғалаба, уч дуранг ва тўрт мағлубият).
ЕЧЛнинг ўтган мавсумини ўта муваффақиятсиз ўтказган ва турнирда қаторасига етти ўйиндан буён ютқазаётган «Вилярреал» бу ўйин олдидан асосий дарвозабони Гулачининг ёрдамидан фойдалана олмаслиги маълум бўлганди, ўйин куни тонгда унинг уйига қуролли ҳужум уюштирилган. Венгриялик посбон ўрнини эгаллаган Жуниор эса стартдаёқ гол ўтказиб юборди, аммо бу вазиятда унга эътироз қилиб бўлмайди. У «Наполи»нинг фахрий ҳимоячиси Рраҳманининг мураккаб зарбасини қайтарганди, аммо такрорий зарба қаршисида ожиз қолди.
Кўпчилик «Вилярреал» ЕЧЛда қаторасига саккизинчи ўйинда ҳам ютқазишини тахмин қила бошлаганди, аммо уч дақиқа ичида барчаси ўзгариб кетди. «Наполи»нинг фахрий футболчиларидан яна бири Политано ўта қўпол хатога йўл қўйди: у тўпни Милинкович-Савичга узатишда сусткашлик қилди ва тўпга эга чиққан Микаутадзе дарвозабонни алдаб ўтиб, ҳисобни тенглаштирди. Кўп ўтмай Сантияго Моуринио жарима майдони ташқарисидан йўллаган зарбаси билан мезбонларни ҳисобда олдинга олиб чиқди. Шундан кейин меҳмонлар ўйинга қайта олишмади, ўйин охирида эса Олувасейи учинчи голни ҳам урди. Шу тариқа, «Вилярреал»нинг турнирдаги мағлубиятлар серияси 8-ўйинда, ғалабасиз серияси 12-ўйинда тўхтади. «Наполи» эса ЕЧЛда қаторасига иккинчи ўйинда ютқазди ва Максимиллиано Аллегрининг курси қимирлай бошлади.
Озарбойжонликлар клуби ЕЧЛга тасодифан чиқиб қолмаганини исботлади: ўзбекистонлик яримҳимоячи Умарали Раҳмоналиев билан бирга бу жамоа «Славия»ни мағлуб этган ҳолда турнирдаги илк очколарини қўлга киритди. Пэррис биринчи бўлимдаёқ ҳисобни очганди, аммо VAR офсайд қайд этиб, голни бекор қилди. Ушбу ямайкалик ҳужумчи иккинчи бўлим бошида барибир ўз мақсадига етишди ва бу сафар голни ҳеч ким бекор қила олмади. Ўйин охирида эса меҳмонлар дарвозабони Маркович тўпга чиқишда хатога йўл қўйди: Миккелс қанотдан бўш дарвоза томон зарба берди – 2:0.
Ҳар қандай серия қачондир якунланади. «Ланс» еврокубокларнинг мунтазам иштирокчиси ҳисобланмаса-да, ушбу жамоа 20 йилдан буён халқаро турнирларда ўз уйидаги учрашувларда иккита гол ўтказиб юбормаганди. ЕЧЛдаги сўнгги уй мағлубияти эса 1998 йилдан буён қайд этилмаганди. Шу куни дарвозада Риссер бўлмааганида, «Спортинг» янада кўпроқ гол урган бўларди. Биринчи бўлимда лиссабонликлар колумбиялик Луис Суареснинг ягона голи билан кифояланишди, у етти гол билан «шерлар»нинг асосий еврокубокдаги энг яхши тўпурари бўлиб олди. Ўйин охирида эса Андерсен Думбияни дарвозабон билан яккама-якка вазиятга чиқариб юборди, бу ҳолатда тўпга биринчи бўлиб етиб келиш учун жарима майдони ташқарисига чиқиб келган Риссерда ҳеч қандай имконият йўқ эди. «Спортинг» қаторасига икки ғалабадан кейин пешқадамлар учлигида жойлашган.
«Лейпциг» ПСВ билан ўйинни кучли бошлади, аммо вазиятларидан фойдалана олмади, бўлим ўрталарида эса Баку жарима майдони ичида тўпни қўл билан ўйнагани учун гол ўтказиб юбориши ҳам мумкин эди. Аммо Вандевордт Перишич ижросидаги пеналтидан кейин бурчакка кетаётган тўпни қайтарди ва «буқалар» жамоаси мухлисларини хурсанд қилди. Иккинчи бўлимда эса Груда жарима майдонидан қайтиб чиққан тўпга зарба бериб, ўйиннинг иккинчи қаҳрамонига айланди. Унинг аниқ зарбаси «Лейпциг»нинг ғалабаси ва клуб рекорди ўрнатилишини таъминлади (жамоа барча турнирлар доирасида қаторасига тўққизинчи уй ўйинида ғалаба қозонмоқда, шундан қаторасига тўрт ўйинда дарвоза дахлсизлиги сақлаб қолинган).
