АПЛда «Ливерпуль» «Челси»га қарши, Ла Лигада иккита дерби, Италия ва Францияда «олтин учрашувлар» – ҳафта ўйинлари анонси
|22:11 / 12.04.201920 68114 мин
Tribuna.uz ўз анъанасига мувофиқ дам олишлари кучли бешликда кутилаётган энг қизғин ва интригали тўқнашувлар анонси билан таништиради.
МИЛАН – ЛАЦИО (13 апрель, 23:30)
Италияда Чемпионлар Лигаси йўлланмаси учун курашаётган икки жамоа ўзаро ўйинда орани очиқ қиладилар.
Йилни жуда ишончли бошлаган “Милан” охирги тўрт ўйинда ғалаба қозона олмади ва турнир жадвалидаги ўрнини хавф остида қолдирди. “Интер”, “Ювентус” ва “Сампдория”дан мағлубият ва “Удинезе” билан мағлубиятга тенг дуранг натижасида, Гаттузо шогирдлари “”Аталанта” ва “Рома”ни жуда яқинлаштириб қўйишди.
Ҳозирда “Милан” ва “Аталанта”да 52 тадан, “Рома”да 51 очко бор. Шунингдек, “Лацио” 49 очко жамғарган бўлса-да, у бошқалардан бир ўйин кам ўтказган. Демак, жуда зич жойлашган мана шу 4 жамоа биргина ЕЧЛ йўлланмаси учун сўнгги турларгача кураш олиб боришса керак. Бу ўйин эса, мана шу пойга нуқтайи назаридан жуда муҳимдир. Яъни, мағлубият “Милан”ни амалий тарафдан 7 ўринга тушиб кетиши мумкин.
Жамоалар ўртасидаги ўйинлар доимо қизғин ва тенг курашлар остида кечганига аҳамият бериш керак. Масалан, сўнгги 22 ўйиннинг 11 таси дуранг билан якунланган, 6 ўйинда “Милан” ғалаба қозонган. Охирги тўрт ўйин ҳам дуранг билан якунланган. Қизиғи, бу ўйинларнинг учтасида ҳисоб очилмаган ҳам экан.
СЕВИЛЬЯ – БЕТИС (13 апрель, 23:45)
Испанияда бу ҳафта иккита қизиқарли дерби бўлиб ўтади. “Санчес Писхуан”да бўлиб ўтадиган Андалусия дербиси доимгидек кескин ва курашларга бой ўтиши шубҳасиз. Худди шу стадионда бўлиб ўтган олдинги дерби ҳам кўпчиликнинг ёдида бўлса керак. Ўшанда “Бетис” анча номдор рақибидан ҳайиқмай, 5:3 ҳисобида ғалаба қозонганди. Умуман олганда, охирги уч Андалус дербисияда “Севилья” ғалаба қозона олмай келмоқда. Унгача қаторасига беш ўйинда севильяликларнинг қўли баланд келганди.
Бу ўйин турнир эътибори билан ҳам жуда аҳамиятлидир. “Бетис” хавфли зонадан анча узоқлашиб, дастлабки ўнликда жойлашиб олган ва балким, еврокубоклар учун ҳаракат қилиб кўриш имкониятига эга. Жамоани олтинчи ўрин билан атиги 3 очко ажратиб турганини таъкидлаш лозим. Аммо бусиз ҳам Кике Сетьен шогирдлари қўшниларнинг орзусини чиппакка чиқаришга уриниб кўриши табиий. “Севилья” Чемпионлар лигаси йўлланмасини берувчи 4-ўрин учун “Хетафе” ва “Валенсия” билан аёвсиз кураш олиб бормоқда. Ҳозирда жамоа “Хетафе”дан бир очко кам жамғарган ҳолда, бешинчи ўринда турибди.
Мавзуга оид
“Бетис” рақибига етарлича қаршилик кўрсатиши шубҳасиз. Зеро айнан юқори ўринлардаги жамоаларга қарши Кике жамоасини яхши тайёрлай олмоқда. Бу мавсумда “Бетис” “Барселона”ни ҳам (сафарда), “Атлетико”ни ҳам мағлубиятга учрата олгани кўп нарсадан дарак беради.
Таркиблар борасида сезиларли муаммолар йўқ. Мезбонлар сафида Уебер, Нолито ҳамда Месалар майдонга туша олишмаса, “Бетис” Гуареро ва Фирпонинг хизматидан фойдалана олмайди. Фирпо сўнгги ҳафталарда машғулотларни бошлаганини таъкидлаб ўтамиз.
ЛИВЕРПУЛЬ – ЧЕЛСИ (14 апрель, 20:30)
АПЛ тарихида “Ливерпуль” ҳали бирор марта ҳам чемпион бўла олмаган. Аммо бу совринга улар қачон энг яқин келганликларини ҳам яхши биласиз. Агар “Ливерпуль” 2014 йилнинг сўнгги 4 ўйинида ғалаба қозонганида, чемпионга айланарди. Ўша ўйинларнинг дастлабкиси “Челси”га қарши “Энфилд”да бўлиб ўтгани эсингизга тушдими? Жерарднинг кутилмаганда йиқилиб тушиши ва Демба Банинг ҳисобни очиши билан бошланган ўйин 2:0 ҳисобида меҳмонларнинг ғалабаси билан якунланган ва “Ливерпуль” чемпионликдан қуруқ қолганди. Ўшанда “Челси” ЕЧЛ ярим финалида “Атлетико”га қарши ўйнаши керак бўлган ва Жозе Моуриньо “Энфилд”да аралаш таркибни туширишга мажбур бўлганди.
Бу сафарги ҳолат бироз тескари – ҳа, яна “Ливерпуль” бу ўйинда очко йўқотишга ҳаққи йўқ, аммо Чемпионлар лигасида айнан Клопп шогирдлари қатнашишмоқда. Бу ўйиндан уч кун ўтиб ҳам, “Ливерпуль” Португалияга сафар қилади ва “Порту” билан ярим финалга чиқиш учун иккинчи ўйинини ўтказади. Ўз навбатида, “Челси” ҳам еврокубоклардан холи эмас, лондонликлар “Славия” майдонидан минимал ҳисобдаги ғалаба билан қайтдилар.
Умуман, юқорида эсланган беш йил олдинги учрашувдан фарқли равишда, бу сафар ҳар икки жамоа ҳам очко йўқота олмайди. “Челси” ЕЧЛ йўлланмасини берувчи ўринлар учун қаттиқ кураш олиб бормоқда ва бу ўйин мавсум сўнгидаги энг қийин вазифалардан биридир. Демак, еврокубоклардаги муҳим чорак финаллар ўртасида турган ҳар иккала жамоа ҳам бу ўйинда ўта жиддий қарашга мажбур, иккинчи таркиблар ҳақида гап бўлиши мумкин эмас.
5 ўйиндан бери “Ливерпуль” “Челси” устидан ғалаба қозона олмаётганини айтиб ўтиш лозим. Бу ўйинларнинг учтасида, жумладан, ушбу мавсумнинг биринчи даврасидаги ўйинда ҳам, бир хил – 1:1 ҳисоби қайд этилган. Шунингдек, Клопп ва Сарри бу мавсумда Лига кубоги ўйинларида ҳам тўқнаш келишди, бу ўйинда “Челси” сафарда 2:1 ҳисобида устун келди. Лондонликлар якунда ушбу турнир финалигача борганликларини ва “Манчестер Сити”га имкониятни бой берганликларини биласиз.
Рақибларнинг спорт формасига қарасак, “Ливерпуль” январь ойида АПЛда ва Англия кубогида икки марта қаторасига мағлубиятга учраганди – шундан буён Клопп жамоаси мағлубият нималигини билмай келмоқда. Жумладан, охирги олти ўйинда қаторасига ғалаба қозонилди. “Челси”да ҳам 4 ўйиндан иборат ғалабали серия бор ва бу ўйинларда жамоа атиги 1 марта гол ўтказиб юборди холос. Қизиғи, ҳар икки жамоанинг ҳам очко йўқотган сўнгги ўйини “Гудисон Парк”даги “Эвертон”га қарши баҳс бўлиб турибди.
ВАЛЕНСИЯ – ЛЕВАНТЕ (14 апрель, 23:45)
Бу турдаги иккинчи дерби “Месталья”да бўлиб ўтади. Чемпионлар лигаси ўринлари учун кураш олиб бораётган “Валенсия” ўз майдонида ашаддий рақиби “Леванте”ни қабул қилади. Бу сафаргиси янада қизғин бўлиши шубҳасиз, чунки ҳар икки жамоа турнир вазифаларини бажариш учун ғалаба қозонишлари шарт.
“Валенсия” Испания чемпионатида 12, барча мусобақаларда эса, 17 ўйиндан иборат мағлубиятсиз серияни ўтказди ва натижада кучли тўртликка яқинлашиб олишга муваффақ бўлганди. Бу ўйинлар ичида “Севилья” билан сафарда, “Реал” билан ўз майдонида эришилган ажойиб ғалабалар ҳам бор эди. Аммо кутилмаганда “Райо Вальекано” майдонидаги мағлубият серияни ҳам тўхтатди, “Валенсия”нинг кучли тўртлик учун имкониятини ҳам бироз пасайтирди. Энди “кўршапалаклар” “Хетафе”дан 4, “Севилья”дан 3 очко кам очко жамғарган ҳолда, 6-ўринда бормоқдалар.
“Леванте”нинг ҳам ўз кураши бор. Пако Лопес шогирдлари 33 очко жамғарган ҳолда, 16-ўринни эгаллаб туришибди ва уларни хавфли зонадан атиги 3 очко ажратиб турибди холос. Пастки ўринлардаги “Сельта”, “Вальядолид” ва “Вильяреал” “ўлик” эмас, лигада қолиш учун бор имкониятни ишга солаётганликларини эътиборга олсак, “Леванте”нинг ҳам бўшашишга ҳаққи йўқ. Сўнгги етти ўйинда ғалаба нашидасини сурмаган “Леванте” учун энди ортга йўл йўқ.
Валенсия дербилари мезбонларнинг яққол устунлиги билан ажралиб туради. Масалан, “Валенсия” ўз майдонидаги сўнгги тўрт ўйинни барчасини ишончли ғалаба билан якунлаган бўлса, “Леванте” ҳам уй ўйинларида “Валенсия”ни қийнаган – 4 ғалаба ва 2 дуранг. Шу томондан ўйинда “Валенсия”нинг имкониятини юқорироқ баҳолаш мумкиндир, аммо юқорида айтилганидек, “Леванте”га ҳам қолган ҳар бир ўйин финалга тенгдир. Бунинг устига “Валенсия” бу мавсумда уй учрашувларида у қадар ишончли кўринмаяпти – 16 ўйиндан атиги 5тасида ғалаба қозонилган, 10 ўйин дуранг билан ниҳояланган.
УОТФОРД – АРСЕНАЛ (15 апрель, 23:55)
Барибир, УЕФАга қойил қолиш керак. Европа Чемпионлар лигаси деган шундай бир ажойиб турнир ўйлаб топилганки, айнан шу туфайли, лигаларда мавсум охиригача интригалар сақланиб келмоқда. Мана бугун ҳикоя қилинаётган бешинчи учрашувда ҳам айнан ЕЧЛ йўлланмаси диққат марказида бўлиб турибди.
Бир пайтлар ўзи жуда ёқтирган тўртинчи учун курашда “Арсенал” навбатдаги қийин учрашувларидан бирини ўтказади. Лондонликлар март ойи бошларида ўз майдонида “Манчестер Юнайтед” устидан ғалаба қозонгач, кўпчилик, тўртлик учун курашда Эмери жамоаси бошқаларга қараганда фаворит эканини айта бошлаганди. Бунинг асосий сабаби, ўша ўйин “Арсенал” учун сўнгги топ-учрашув бўлганди. Лекин вазиятга чуқурроқ қарасак, “Арсенал” биз ўйлагандан анча қийинроқ ва ноқулай тақвимга эга эканини кўрамиз. Биринчидан, қолган ўйинларнинг аксарият қисмини жамоа сафарда ўтказади. Рақиблар ҳам “Уотфорд”, “Вулверҳэмптон”, “Лестер”, “Бёрнли” каби муросасиз жамоалардир.
Иккинчидан, “Арсенал” айнан сафардаги ўйинларда жуда ёмон натижалар кўрсатмоқда. Ўз майдонидаги ўйинлар бўйича “Ливерпуль” билан бир хил натижа кўрсатган Эмери жамоаси сафар ўйинларида “Ливерпуль”дан икки баробар кам – атиги 19 очко жамғарган. Сафардаги 15 ўйиндан фақат 5таси ғалаба билан якунланган, тўплар нисбати бўйича ҳам минус кўрсаткич. Бу борада “Арсенал” лигада 10-ўринда бормоқда ва бу сафарги рақиби “Уотфорд”дан ҳам ёмонроқ кўрсаткич қайд этган. Шунингдек, барча сафар ўйинларида гол ўтказиб юборган АПЛ даги ягона клуб ҳам айнан “Арсенал”дир.
Бу статистикалар, ҳамда “Эвертон”га қарши сўнгги ўйиндаги мағлубият ҳам, Эмери жамоасининг муаммоларини тасдиқлайди ва “Уотфорд”да ғалаба қозониш учун имконият етарли эканидан далолат қилади. Хусусан, бу рақибларнинг “Уотфорд”да ўтган сўнгги ўйинида ҳам мезбонлар 2:1 ҳисобида иродали ғалабага эришгандилар.
Бундан ташқари, “Арсенал” пайшанба оқшомида “Наполи”га қарши Европа Лигаси ўйинида ҳам майдонга тушди. Кучли тўртлик учун кураш ўз йўлига, аммо бу мусобақага ҳам қўл силташ ярамайди. Чунки Европа Лигасида ғолиб чиқиш орқали ҳам ЕЧЛ йўлланмасига эга бўлиш мумкинлигини биламиз. “Арсенал” ўтган йили ҳам шу йўлдан бориб кўрган, лекин ярим финалда “Атлетико”га имкониятни бой берганди. Бу учрашув душанба оқшомида бўлиб ўтади, Эмери шогирдларида тикланиб олиш учун уч кун вақт бор, лекин шундай бўлса-да, рақибларнинг жисмоний ҳолати бу ўйинда тенг бўлмаслиги тайин.
“ОЛТИН” УЧРАШУВЛАР
Асосан Чемпионлар лигаси йўлланмаларини ҳал қиладиган ўйинлар ҳақида гаплашдик. Шу билан бирга, икки чемпионатда айнан шу турда чемпионлик масаласи расман ҳал бўлишини ҳам эслатиб ўтишимиз даркор. Италияда “Ювентус”, Францияда эса “ПСЖ” апрель ойининг ўртасидаёқ мамлакат чемпионларига айланишлари мумкин.
Шанба куни соат 18:00да “Ювентус” сафарда А Серияда қолиш учун курашаётган СПАЛ билан ўйнайди ва бу ўйин Италияда тур ўйинларини очиб беради. Бу ўйинда агар “Ювентус” ғалаба қозонадиган ёки дуранг қайд этадиган бўлса, қаторасига саккизинчи марта Италия чемпионига айланади. Мағлубият ҳам туринликларни шу турда чемпионга айлантириши мумкин, фақат бу ҳолатда “Наполи” ҳам очко йўқотиши керак бўлади.
Парижликлар эса, аслида ўтган турдаёқ масалани узил-кесил ҳал қилишлари мумкин эди. “ПСЖ” “Страсбур” билан 2:2 дуранг ўйнади, Эрик Шупо-Моттинг эса, очиқ дарвозага ура олмай, интернет тармоқларида ҳамманинг кулгисига сабаб бўлди. Ўша гол парижликларни чемпионга айлантирар эди.
“ПСЖ” бу турда энг яқин таъқибчиси “Лилль” меҳмони бўлади ва бу ўйиндаги дуранг ҳам жамоани расман чемпионга айлантиради. Ўйин якшанба куни 23:55да бошланади.
