Саудия Арабистонидаги нефть қувурларига дронлар орқали ҳужум қилинди

Фото: almasdarnews.com

Саудия Арабистонидаги “Шарқ-Ғарб” нефть қувурида иккита насос станциясига зарар етказилди, деб маълум қилди мамлакат энергетика ва минерал ресурслар вазири Холид ал-Фалих.

Унинг сўзларига кўра, сешанба куни эрталаб нефть қувурига портловчи моддалар ўрнатилган учувчисиз қурилмалар ёрдамида ҳужум уюштирилган. Оқибатда саккизинчи рақамли станцияда ёнғин келиб чиққан.

Саудиянинг Aramco давлат нефть компанияси етказилган зарарни аниқлаш ва таъмирлаш учун қувур орқали нефть етказиб беришни вақтинча тўхтатган.

Сешанба куни шиа исёнчиларига қарашли “Ал-Масира” телеканали учувчисиз қурилмалар ёрдамида Саудия Арабистони объектларига Яман ҳудудидан ҳужумлар уюштирилишини маълум қилганди.