Гувоҳлар Асакадаги ЙТҲ тафсилотларини сўзлаб беришди

16 май куни соат тахминан 8:00да Андижон вилоят, Асака тумани «Дастурхончи» МФЙ ҳудудидан ўтган Андижон-Шаҳрихон йўлида «Кобальт» русумли автомашина йўл четидаги гулларни суғораётган уч аёлни уриб кетди. Дастлаб тарқалган хабарларда аёлларнинг барчаси воқеа жойида ҳалок бўлгани, бу аёллар вилоятдаги йўлларни тозалашга ва йўллар четидаги гулларни суғоришга мажбурий равишда жалб этилгани, ҳайдовчи воқеа жойидан қочиб кетгани айтилганди.

17 май куни Бош прокуратура матбуот хизмати ҳодиса юзасидан маълумот бериб, аёллардан бири воқеа жойида вафот этгани, бири касалхонада жон бергани, яна бири касалхонада қолаётгани маълум қилинди.

Kun.uz мухбири бўлиб ўтган воқеа тафсилотларини ўрганиш учун Асака туманида бўлди.

Асака туманининг «Дастурхончи» қишлоғи Андижон-Шаҳрихон магистраль йўли бўйида жойлашган.

Ўша куни эрталабки соат 8:45да Дастурхончи маҳалласида яшовчи уч аёл - Омадхон Парпиева, Пазилатхон Тожибоева ва Барчиной Казакова катта йўл бўйидаги шаклли гулзорга (маҳаллий аҳоли уни – «ландшафт гулхона», деб атайди) сув қуяётганида фожиа рўй берган.

Мазкур йўл транспорт ҳодисасига шу ерлик боғбонлар гувоҳ бўлишган.

«Мен Зокиржон Аҳмедов, боғбонман. Шу ерда мева етиштирамиз. Мана бу гулзор уларга бириктирилган бўлса керак, ҳар куни эрталаб сув қуйишар эди. Ўша куни, жуда катта тезликда келаётган «Кобальт» олдидаги «Исузу»ни ўнг томондан қувиб ўтмоқчи бўлиб бошқарувни эплолмай, йўл четига чиқиб кетди. Бир ғилдираги йўл четидаги лотокка тушиб, гулзор ёнида сув қуяётган уч аёлни уриб ташлади. Бири машина зарбидан узоққа отилиб кетган. Иккинчиси ҳар қалай ўзини олиб қочиб қаттиқ зарба емади. Учинчисини катта тезликдаги машина 30 метрларгача судраб борди. Ҳайдовчи шокда бўлса керак, нима бўлаётганини англамай қолди шекилли, ёрдам беришга чақирсак ҳам машинани ташлаб кетиб қолди», дейди гувоҳлардан бири.

Ўша пайтда шу ерда бўлган яна бир боғбон Мирзамаҳмуд ота эса шундай деди: «Қарасак, уч аёл ерда ётибди. Бири қимирламай қўйган, бири нафас олар, яна бирининг аҳволи оғир эди. Йўловчи машиналарни тўхтатиб, касалхонага жўнатдик. Уларни уриб юборган йигит икки соатлардан кейин қайтиб келиб, ички ишлар ходимлари саволларига жавоб берди».

Асака ички ишлар бўлими томонидан олинган маълумотларга кўра, йўл-транспорт ҳодисаси содир этган 60О 190DА давлат рақамли «Кобальт» ҳайдовчиси Андижон туман, «Заврақ» МФЙда яшовчи 1995 йилда туғилган А.С бўлган. Айни пайтда унинг устидан терговга қадар текширув ишлари олиб борилмоқда.

Ҳодиса оқибатида Пазилатхон Тожибоева ва Омадхон Парпиева вафот этган. Барчиной Казакова эса тан жароҳати олиб, касалхонага ётқизилган. Айни пайтда унинг ҳолати яхшиланган.

Асака туман ҳокимлигига бориб, туман ҳокими ва мутасаддилар билан суҳбатлашдик ва уч аёлнинг фалокат жойига қандай бориб қолгани сабабларини суриштирдик.

Асака туман ҳокимлиги Ободонлаштириш бошқармаси техника хавфсизлиги муҳандиси Икромжон Абдуллаев уч аёл туман Бандликка кўмаклашувчи марказ йўлланмаси асосида ишга киргани қайд этилган ҳужжатларни тақдим этди.

Мутасадди марҳум икки аёл ва тан жароҳати олган аёлларнинг ишга киргани ҳақидаги буйруқ билан биргаликда ой учун иш ҳақи ёзилган қайдномани ҳам кўрсатди.

Уларнинг тасдиқлашича, уч аёл ҳам 16 май куни доимгидек ўзларига бириктирилган жойда иш олиб бораётган бўлган.

«Фалокат оёқ остида», деймиз, «Кўргилиги шу экан», деган гапимиз билан ҳам ғам эгаларини юпатмоқчи бўламиз. Пазилат опанинг бир нафар, жон берган шеригининг эса икки нафар фарзанди бор экан. Энди улар она соғинчи билан, она меҳрисиз ўсишга мажбур.

Ўзбекистонда ҳар куни инсонлар ўлими билан якунланадиган мудҳиш йўл-транспорт ҳодисалари содир бўлиши давом этмоқда. Лекин йўллардаги қонунбузарликлар, «ўпкаси йўқ» ҳайдовчиларнинг бемазагарчиликларига эътиборсизлигимиз ҳам бор.

Балки ҳайдовчиларнинг қонунбузарлигига чек қўйиш учун жазони кучайтириш зарурдир. Балки йўл четидаги гулхоналарда иш олиб борилаётганда хавфсизлик техникаси қоидаларига риоя қилиш, балки улар иш олиб бораётган жойларга вақтинчалик кўчма йўл белгиси қўйилишини жиддий назорат қилиш керакдир. Балки йўл қоидасини бузиш инсон умрига завол бўлиши ҳақида тарғиботни янги босқичга олиб чиқиш керакдир. Умид қиламизки, мутасаддилар рўй берган даҳшатли фожиадан тегишлича хулосалар чиқариб, амалий ҳаракатларга ўтишади.

Элмурод Эрматов, Андижон
Kun.uz мухбири