“Менинг фикрим” жамоавий мурожаатлар порталида Нукус шаҳрида болалар кардиохирургия марказини ташкил этиш ҳақида петиция эълон қилинди.
Қайд этилишича, бугунги кунда болалар туғма юрак пороги кўп учрамоқда. Ҳозирда ушбу жарроҳлик амалиётини Нукус шаҳрида амалга оширишнинг имкони йўқ. Ушбу имкониятдан фойдаланиш учун катта сарф-харажатлар қилиб, Тошкент шаҳрига ёки бошқа чет давлатларга боришга тўғри келмоқда. Агар боришнинг иложи бўлмаса, чет элдан профессор-шифокорларнинг Ўзбекистонга келишини кутишга мажбур бўлинмоқда. Бу эса кўп вақтни талаб этади.
“Амалдаги ҳолат ва имкониятларни инобатга олган ҳолда, Нукус шаҳрида болалар юрак жарроҳлик (кардиохирургия) амалиётларини олиб бориш имкониятини берувчи Болалар кардиохирургия марказини ташкил этишни таклиф қиламиз”, - деб ёзади мурожаат муаллифи.
