Москва шаҳрида «Яндекс» компаниясининг YaC (Yet Another Conference) анжумани бўлиб ўтгани, “Келажак деталларда” деб номланган бу анжуманда Kun.uz сайти вакиллари ҳам иштирок этгани тўғрисида хабар берган эдик.
Тадбир доирасида компаниянинг бош штаб квартирасидаги экскурсия жараёнида «Яндекс» Ўзбекистон директори Евгений Лукьянчиков билан «Яндекс»нинг юртимиз билан боғлиқ режалари бўйича суҳбатлашдик.
Аввало «Яндекс» ҳақидаги умумий маълумотлар билан танишиб олсак:
Аркадий Волож ва Илья Сегалович асос солган «Яндекс» трансмиллий компанияси қидирув тизими, интернет порталлари ва хизматларига эга. Ҳозирги кунда у 50дан ортиқ хизмат турларини тақдим этади.
Нидерландияда расман рўйхатдан ўтган бўлган бўлишига қарамай «Яндекс»нинг асосий фаолияти Россияда кечади ва йирик офислари ҳам шу давлатда жойлашган.
«Яндекс» қидирув сўровномаларини қайта ишлаш ҳажми бўйича дунёда тўртинчи ўринни эгаллайди ва машҳурлиги бўйича дунё йигирматалигига кирган ҳолда Россияда биринчи ўринни эгаллайди.
«Яндекс» кўплаб давлатлар қаторида Ўзбекистонда ҳам бевосита фаолиятини йўлга қўйган, бугунги суҳбатимиз айнан шу ҳақда.
– Евгений, «Яндекс» Ўзбекистонда тўғридан-тўғри фаолият бошлаганига, яъни фақат қидирув тизими бўлиб қолмай, ўз сервисларини маҳаллий шароитга мослаштириб тақдим этаётганига бир йилдан ошди. Демак дастлабки хулосаларга келишнинг айни вақти.
– Бир сўз билан айтганда, Ўзбекистон айнан биз учун кенг имкониятларга эга, салоҳиятли давлат ҳисобланади. Албатта, бу давлатда етакчи тизим бошқа ва у қайси компания эканлигини ҳаммамиз яхши биламиз. Лекин ҳозир биз эгаллаб турган 22 фоизлик кўрсаткич мунтазам ўсиш натижаси ва яна юқорилашда давом этмоқда. Биз бу йўналишдаги ишларни давом эттирамиз ва хизматлар турини кўпайтираверамиз.
– Ўзбекистонда катта имкониятларга эга бўлиш мумкинлиги тўғрисида гапирдингиз. Бу нималарда намоён бўлади?
