Forbes рўйхатидаги машҳурлар фарзандларига нимани ўргатишади?

Болаларни қандай қилиб тўғри тарбиялаш мумкин? Интернетда тажрибали ота-оналарнинг маслаҳатлари асосида яратилган минглаб китобларни топасиз. Бироқ оддий ўртача статистик болани шакллантиришнинг нима кераги бор? Бадавлат оталар фарзандлари камида ўзлари каби муваффақиятга эришиши учун нималарни ўргатишаётгани ҳақида маълумот олиш анча қизиқроқ.

Сайёранинг энг бадавлат кишилари рўйхатини ўрганиб, бутун дунёдаги машҳур корпорация ворисларини тарбиялаш борасидаги айрим фактларга ойдинлик киритдик. Балки улардан баъзилари сизга ҳам асқотар.

Рокфеллерлар сулоласи, Rockefeller & Co бошқарувчилари

Рокфеллерлар оиласининг энг қадимий анъаналаридан бири  - оилавий учрашувлар. Бундай йиғилишлар йилига икки марта ташкил этилади. Битта хонада 100 дан ортиқ одам тўпланади. Банк соҳасининг етук вакиллари сулоласида 21 ёшдан катта оила аъзолари учун форумлар ўтказиш ҳам одат тусига кирган. Ушбу тадбирларда муҳим масалалар, жумладан бизнесга оид бўлганлари ҳам муҳокама қилинади.

Ротшильдлар оиласи, N M Rothschild & Sons компанияси эгалари

Бу сулоладаги анъаналар қонунлар тўпламини ёдга солади. Масалан, бизнесдаги муҳим лавозимларни фақат оила аъзолари эгаллаши мумкин, ёлланма ишчиларга бундай ваколат берилмайди. Ишга фақат эркаклар киришишлари мумкин, бевосита меросхўрлар ҳам айнан улар саналади.  

Мари Шанталь, Duty Free империяси меросхўри, ва Греция тахти шаҳзодаси Павел

Мари Шанталь бола тарбиясида интизом муҳим деб ҳисоблайди. Дастлаб дарслар, кейин сайр, ундан кейин эса уйга ўз вақтида қайтиш керак. Болалар доим тартибли, озода кўринишда бўлиши лозим. Тозаликка нафақат ташқи кўринишда, балки хоналарда ҳам риоя этилиши муҳим. Ёш миллионерлар ўз хоналарини ўзлари тартибга келтиришларини айтиб ўтиш ҳам ортиқчалик қилмайди.

Билл ва Мелинда Гейтс

«Биз Мелинда билан катта пул ўрнига болаларимизнинг қобилиятларини кашф этишда ёрдам берадиган яхши таълим олишлари муҳим дея қарор қилдик. Улар ота-онасининг миллиардларига ишонишлари эмас, ҳаётдаги ўринларини ўзлари топишлари лозим”- дейди Билл Гейтс интервьюлардан бирида. Ўзининг барча бойлигини ота-оналар Билл ва Мелинда Гейтс жамғармасига ўтказишади. Бу тиббиётни ривожлантириш ва қашшоқликка қарши курашиш бўйича йирик компания.

Жефф Безос, Amazon асосчиси, ва унинг собиқ рафиқаси, ёзувчи Маккензи Безос

Бу жуфтлик болалар ва ўзларини ҳар томонлама ривожлантиришга интилишади. Улар биргаликда янги таомлар тайёрлашади, фермада жўжаларнинг тухумни очиб чиқиш жараёнини кузатишади, сингапурча дастур бўйича математика билан шуғулланишади, таълим клубларига боришади ва қўшни болалар билан спорт ўйинларини уюштиришади.

Марк Цукерберг, The Facebook асосчиси ва Присцилла Чан

Марк Цукерберг фарзандларини ўз ота-онасининг услубига кўра тарбия қилади. У болани жисмоний жазолаш мумкин эмас, ахир болага ҳар доим нима яхши ва нима ёмонлигини тушунтиришнинг иложи бор деб ҳисоблайди. У кичкинтойларни ўзларини муносиб тутишга ўргатади, чунки жамиятда амал қилиниши керак бўлган муайян чекловлар мавжуд

Шунингдек, Марк ва Присцилла бола ҳар томонлама ривожланиши лозим деб ҳисоблашади. Тўгарак, курслар бу – яхши, бироқ бола ўйнаши ҳам муҳим.

Амансио Ортега, Zara дўконлар тармоғи, Massimo Dutti ва бошқа масс-маркет брендларига эгалик қилувчи Inditex испан компанияси президенти

У қизи Марта 18 ёшга тўлиб, касб танлашга тўғри келганида уни Лондондаги Bershka дўконига сотувчи-маслаҳатчи қилиб жўнатди. Кейин эса қиз Барселонадаги харидлар бўлими ходими ва Шанхайдаги ишлаб чиқариш тармоғида ходим бўлди. Корпорация фаолиятининг энг қуйи поғонасидан бошлаб барча жиҳатларини ўргангач, Марта Inditex компанияси бошқарувини ўз қўлига олди. Айтганча, Марта бренднинг ягона меросхўри ҳисобланади.

Антуан Арно, LVMH компанияси меросхўри ва Наталья Водянова

Бу бадавлат ота-оналар полиглотларни тарбиялашмоқда. Дастлабки уч фарзанднинг она тилиси – инглиз тили, кичик Максим Францияда туғилгани сабаб,  илк сўзларини француз тилида талаффуз қилган. Арно оиласининг барча аъзолари ана шу тилда сўзлайди, чунки улар Парижда яшаб, маҳаллий мактабда ўқишади. Бироқ бу болаларга русча нутқни ҳам аъло даражада тушунишда халақит қилмайди. Чунки Наталья болалар ота-оналарининг она тилларини билиши лозим деб ҳисоблайди.

Франсуа-Анри Пино, Kering холдинги ижрочи директори (Alexander McQueen, Balenciaga, Gucci, Puma брендларини бирлаштиради) ва Сальма Хайек

Юлдуз она Сальма Хайек ва унинг турмуш ўртоғи фарзандларга ҳаётни безакларсиз кўрсатиш истагидаги машҳурлардан.

Актриса қизини янги ҳодисалар билан таништириш мақсадида учинчи дунё мамлакатларига саёҳат қилишни режалаштирмоқда. Шу тариқа Сальма фарзандига ҳаёт жуда мураккаб бўлиши ва кўпинча Голливудда кузатилганидан анча фарқ қилишини тушунтиради.

Уоррен Баффетт, Berkshire Hathaway раҳбари

Уоррен болани пул ёрдамида бошқариш, уларни ўзлари истамаган соҳада ишлашга мажбур қилиш мумкин эмас деб ҳисоблайди. Болага ўзи қизиққан машғулот билан шуғулланиш имконини беринг. Ана ўшанда унинг истеъдодига гувоҳ бўласиз.

Ларри Эллисон, Oracle асосчиси

“Фарзандларим катта пулнинг ижобий ва салбий жиҳатларини қанча эрта англаса, шунча яхши”, - дейди Эллисон Мэтью Softwar китоби муаллифига.

Юқоридагилардан кўриниб турибдики, бадавлат кишилар ҳам ўз фарзандларида етакчилик, мустақиллик каби кўникмаларни шакллантиришга ҳаракат қилишади. Бунинг учун эса ўзларида бор билим ва тажрибаларини фарзандлари билан ўртоқлашадилар.