Ўзбекистон президенти Шавкат Мирзиёев ва АҚШ давлат котиби Марко Рубио иштирокидаги тадбирда президент администрацияси раҳбари Саида Мирзиёева янги Кенгаш амалий натижа берадиган механизм бўлиши кераклигини таъкидлади.
Унинг айтишича, ташаббусга Шавкат Мирзиёевнинг Вашингтонда АҚШ президенти Доналд Трамп билан учрашуви чоғида асос солинган. Шундан сўнг Ўзбекистон президенти Кенгаш олдига «Натижа бўлсин!» деган қисқа ва аниқ вазифа қўйган.
«АҚШ маъмуриятининг ҳам, бизнинг жамоамизнинг ҳам иш услуби айнан шундай: камроқ сўз, кўпроқ амалий натижа. Биз Америка томонига шунчаки навбатдаги бир қўмита эмас, балки амалда ишлайдиган механизм яратишни ваъда қилган эдик», — деди Саида Мирзиёева.
У июн ойида Тошкентга қарийб 200 та Америка компанияси ташриф буюрганини рекорд сифатида қайд этди. Тўрт ойдан сўнг эса давлат котиби бошчилигида яна 100 га яқин АҚШ компанияси келганини таъкидлади.
Саида Мирзиёева бизнес учун тушунарли қоидалар, очиқ мулоқот ва мурожаатларга тезкор жавоб муҳимлигини айтди.
«Бизнес қоидалар аниқ, эшиклар очиқ ва қўнғироқларга дарҳол жавоб бериладиган жойга интилади. Шу боис биз доимо алоқада бўладиган ва мурожаатларни жавобсиз қолдирмайдиган ҳамкор бўлишга интилмоқдамиз», — деди у.
Шу муносабат билан йиғилишдаги ҳар бир компанияга бевосита мулоқот учун масъул шахс бириктирилиши, тадбиркорлар кўтарган бирор муаммо Кенгаш ҳамраислари эътиборидан четда қолмаслиги ваъда қилинди.
Саида Мирзиёева тадбиркорлар сўровлари асосида қоидалар ўзгартирилганини ҳам билдирди. Унинг сўзларига кўра, Ўзбекистон инвестициялари АҚШда янги иш ўринлари яратишга, Америка маҳсулотларининг хариди эса саноат корхоналари фаолиятини қўллаб-қувватлашга хизмат қилмоқда. У шерикликдан ҳар икки томон манфаат кўриши кераклигини таъкидлади.
Нутқда Жексон–Веник тузатиши масаласи ҳам тилга олинди. Саида Мирзиёева Рубио уни «Совуқ уруш сарқити» деб атаганини эслатиб, Ўзбекистон бу чекловнинг тезроқ бекор қилинишини кутаётганини билдирди.
Тадбир аввалида у Марко Рубионинг Марказий Осиёга илк ташрифини Ўзбекистондан бошлаганини катта эҳтиром сифатида баҳолади. Апрел ойидаги Вашингтон учрашувини эслар экан, ўзбек меҳмондўстлиги ҳақида ҳазил ҳам қилди: меҳмонлар кўпинча режалаштирганидан узоқроқ қолиб кетади. У Америка бизнеси учун ҳам Ўзбекистон шундай қадрдон масканга айланишига умид билдирди.
