«Суонси» яримҳимоячиси Дэниэл Жеймс «Манчестер Юнайтед»нинг ёзги трансфер мавсумидаги биринчи хариди бўлиши тўғрисидаги хабарлар тасдиқланди.
«МЮ»нинг Instagram`даги расмий саҳифасида маълум қилинишича, айни пайтга келиб 21 ёшли уэльслик вингер трансфери бўйича келишувга эришилган. Келишув шартлари ҳозирча номаълум.
Аввалроқ харид қиймати 15 млн фунт бўлиши тахмин қилинаётган эди.
«Суонси» расмий сайтига кўра, битим халқаро трансфер ойнаси очиладиган 11 июндан кейин расмийлаштирилади.
ОАВдаги маълумотларга қараганда, келишув ҳақида мавсум якунланиши биланоқ эълон қилиниши кутилаётганди. Аммо бу май ойида Дэниэлнинг отаси вафот этгани сабаб кечиктирилган, манкунианликлар унинг оиласига вақт беришга қарор қилган.
Жеймс ўтган мавсумда Чемпионшипнинг 33та ўйинида майдонга тушиб, 4+7 самарадорлик натижасини қайд этган. «Суонси» эса 24 жамоа орасида 10-ўринни эгаллаган.
Қайд этиш керак, Даниэл январда «Лидс Юнайтед»га ўтишга яқин бўлган ва ҳатто янги жамоада тиббий кўрикдан ҳам ўтганди. Аммо трансфер ойнаси ёпилишига бир неча соат қолганда харид бекор қилинган.
У 2018 йил кузида Уэльс миллий жамоасида дебют қилиб, 2019 йил мартида Словакия билан учрашувда (1:0) ғалаба голини урган ва бу ўйиннинг энг яхши футболчиси деб топилган.
