АҚШ Британияга Ассанжнинг экстрадицияси бўйича расмий сўров юборди – ОАВ

АҚШ адлия вазирлиги Буюк Британия ҳукуматига Wikileaks асосчиси Жулиан Ассанжнинг АҚШга экстрадиция қилиниши бўйича расмий сўров юборди. Бу ҳақда Washington Post нашри ўз манбаларига иқтибос келтирган ҳолда хабар берди.

Америкалик юқори лавозимли мансабдор шахс номаълум бўлиб қолиш шарти билан сўров 6 июнда юборилганини маълум қилган. Икки давлат ўртасидаги келишувга кўра, бу сўров Ассанж ҳибсга олингандан кейин 60 кун ичида, яъни 10 июнгача йўлланиши керак эди.

Нашрнинг таъкидлашича, келишувга кўра экстрадиция бўйича сўров юборилгандан кейин АҚШ Ассанжга янги айбловлар билдира олмайди. Аввалроқ Wikileaks АҚШ адлия вазирлиги Ассанжга қарши янги айбловлар тайёрлаганини маълум қилган. 

Ассанж 11 апрелда 2012 йилда судга келмагани учун берилган ордер ва Швеция ҳамда АҚШ ҳукумати талабларига кўра Эквадор элчихонасида ҳибсга олинганди. 1 май куни у гаров пули эвазига озодликка чиқиш шартини бузганлиги учун 11,5 ойлик қамоқ жазосига маҳкум қилинганди.

АҚШ ҳукумати Ассанжга жосуслик ва махфий маълумотни ошкор қилиш айбловларини билдирган. Унга 175 йиллик қамоқ жазоси хавф солмоқда. Британия суди журналистнинг АҚШга экстрадиция қилиниши бўйича қарор қабул қилиши керак бўлади. Ушбу иш бўйича суд жараёни 12 июндан давом эттирилади.