Афғонлараро мулоқот бўйича Самарқанд учрашувининг аниқ санаси қачон эълон қилиниши очиқланди

Ўзбекистон Доҳадаги афғонлараро конференция қарорини ва унинг иштирокчилари томонидан қабул қилинган Тинчлик тўғрисидаги қўшма резолюцияни қўллаб қувватлайди. Бу ҳақда Ташқи ишлар вазирлиги баёнотида айтилган.

Қайд этилишича, Ўзбекистон томони инклюзив афғонлараро мулоқотнинг навбатдаги раундини Самарқанд шаҳрида ўтказиш учун зарур шарт-шароитларни яратишга тайёрлигини яна бир бор тасдиқлайди ва бўлажак музокаралар муваффақиятли бўлишига умид билдиради.

Самарқанд учрашуви ўтказилишининг аниқ вақти афғонлараро музокараларнинг барча иштирокчилари билан келишилганидан сўнг эълон қилиниши айтилади.

Ўзбекистон томони Афғонистондаги сиёсий жараён фақат афғон халқи ва унинг раҳбарлигида амалга оширилиши зарурлиги тўғрисидаги ўзининг принципиал мавқеини тасдиқлаган.

Бундан олдин, «Толибон» Ўзбекистондаги афғонлараро учрашувга таклифнома олмагани хабар қилинганди.