Дастлабки маълумотлар бўйича, 2019 йилнинг январь-август ойларида республика корхоналари томонидан 204,1 трлн. сўмлик саноат маҳсулотлари ишлаб чиқарилган бўлиб, ўтган йилнинг тегишли даврига нисбатан саноат ишлаб чиқаришининг физик ҳажм индекси 106,8 %ни ташкил этди.
Давлат статистика қўмитаси хабарига кўра, 2018 йилнинг мос даврига нисбатан меҳнат унумдорлиги 5,8 фоизга, саноатда банд бўлган бир кишига саноат маҳсулоти ишлаб чиқариш 113097,3 минг сўмни ташкил этди.
Жами саноат ишлаб чиқариш физик ҳажми ўсишининг асосий омили бўлиб, тоғ-кон саноати ва очиқ конларни ишлаш – 2,3 %га, ишлаб чиқарадиган (қайта ишлаш) саноат - 8,4 %га, электр, газ, буғ билан таъминлаш ва ҳавони кондициялаш - 2,2 %га ва сув билан таъминлаш, канализация тизими, чиқиндиларни утилизация қилиш – 3,8 %га ўсиши ҳисобланади.
Тоғ-кон саноати ва очиқ конларни ишлаш корхоналари томонидан 2019 йилнинг январь-август ойларида ишлаб чиқарилган маҳсулотлари ҳажми 26,7 трлн. сўмни ёки жами ишлаб чиқарилган саноат маҳсулотлари ҳажмининг 13,1 %ни ташкил этди.
2019 йилнинг январь-август ойларида ишлаб чиқарадиган саноат корхоналари томонидан ишлаб чиқарилган маҳсулотлар ҳажми 163,3 трлн. сўмни ёки жами саноат маҳсулотларининг 80,0 %ни ташкил этди.
Электр, газ, буғ билан таъминлаш ва ҳавони кондициялаш корхоналари томонидан ишлаб чиқарилган маҳсулотлар ҳажми 12,7 трлн. сўмни (жами ишлаб чиқарилган саноат маҳсулотлари ҳажмининг 6,2 %ни) ташкил этди.
Сув билан таъминлаш, канализация тизими, чиқиндиларни йиғиш ва утилизация қилиш корхоналари томонидан ишлаб чиқарилган маҳсулотлар ҳажми 1,5 трлн. сўмни (жами ишлаб чиқарилган саноат маҳсулотлари ҳажмининг 0,7 %ни) ташкил этди.
Тайёр маҳсулотлар турларини кенгайтириш ва ишлаб чиқарилишини қўллаб-қувватлаш бўйича амалга ошириб келинаётган чора-тадбирлар натижасида истеъмол товарлар ишлаб чиқариш ҳажми 69,1 трлн. сўмни ташкил этди ва 2018 йилнинг мос даврига нисбатан 16,8 %га ўсишни таъминлади, жами саноатдаги улуши эса 33,9 %ни ташкил этди.
Ҳисобот даврида хорижий инвестициялар иштирокидаги корхоналар томонидан 61,3 трлн. сўмлик маҳсулот ишлаб чиқарилди. Ҳисобот даврида хорижий инвестициялар иштирокидаги корхоналарнинг умумий ишлаб чиқаришдаги улуши 30,0 %ни ташкил этди.
Андижон (2018 йил январь-август ойларига нисбатан 119,8 %), Хоразм (111,5 %), Тошкент (108,7 %), Наманган (109,5 %), Самарқанд (110,0 %), Бухоро (106,3 %) ва Фарғона (105,6 %) вилоятларида саноат ишлаб чиқариш ҳажмлари сезиларли даражада ошди. Шу билан бирга, Андижон (2018 йил январь-август ойларига нисбатан 140,5 %), Хоразм (125,8 %), Наманган (112,7 %), Сирдарё (109,1 %), Бухоро (108,7 %), Фарғона (108,2 %), Сурхондарё (105,1 %) вилоятларида ва Қорақалпоғистон Республикасида (107,4 %) истеъмол товарларини ишлаб чиқариш сезиларли даражада ошди.
Аҳоли жон бошига саноат маҳсулотлари ишлаб чиқаришнинг тақсимланиш таҳлили Навоий вилоятида (27664,1 минг сўм), Тошкент шаҳрида (13430,2 минг сўм), Тошкент (11731,0 минг сўм) ва Андижон (6934,5 минг сўм) вилоятларида ўртача республика даражаси кўрсаткичидан (6113,9 минг сўм) анча юқорилигини кўрсатмоқда. Республика бўйича аҳоли жон бошига истеъмол товарлари ишлаб чиқарилиши 2070,5 минг сўм бўлгани ҳолда Тошкент шаҳрида - 6000,4 минг сўмни, Андижон вилоятида - 5463,0 минг сўмни, Тошкент вилоятида - 2142,5 минг сўмни ташкил этди.
Ҳисобот даврида кичик тадбиркорлик субъектлари томонидан 68,8 трлн. сўмлик маҳсулот ишлаб чиқарилди. Кичик бизнеснинг умумий ишлаб чиқаришдаги улуши 33,7 %ни ташкил этди.
Бугунги кунда республикада 67,8 мингта саноат корхоналари фаолият кўрсатмоқда, шундан 14,6 мингтаси (фаолият юритаётган корхоналар умумий сонининг 21,6 %) Тошкент шаҳрига, 7,4 мингтаси (11,0 %) Фарғона вилоятига ва 7,1 мингтаси (10,5 %) Тошкент вилоятига тўғри келмоқда.
