Сенат Раиси: Тошкент «ақл»ни экспорт қиладиган шаҳар бўлиши керак

18 сентябрь куни халқ депутатлари Тошкент шаҳар кенгашининг 58-сессияси бўлиб ўтди. Унда Тошкент шаҳрида кичик бизнес ва хусусий тадбиркорликни янада ривожлантириш масаласи муҳокама қилинди. Кенгаш йиғилишида иштирок этган Сенат Раиси Танзила Норбоева Тошкент шаҳрининг ўзига хослиги ва имкониятлари хусусида фикр билдирди.

“Тошкент чин маънодаги “ақлли шаҳар”га айланиши керак. Пойтахтни “ақлларни экспорт қиладиган марказ”га айлантиришимиз лозим. Тошкентда пахта, ғалла йўқ. Бу ерда ҳеч ким мева-чева етиштирмайди. Фақатгина бизнесни ривожлантириш, интеллектуал салоҳиятни ошириш орқали шаҳарни тараққий эттириш мумкин.  Шаҳар ҳокимининг тадбиркор эканлиги ҳам бекорга эмас”, ─ дейди Танзила Норбоева. 

Шунингдек, Норбоева Сенатнинг 22-ялпи мажлисида маъқулланган “Тўй-ҳашамларни тартибга солиш тўғрисида”ги қонуннинг аҳамияти хусусида тўхталиб ўтди.

“Тўй-ҳашамларни тартибга солиш тўғрисида”ги қонун биринчи навбатда Тошкент шаҳрига тааллуқли. Чунки ҳамма исрофгарчилик, дабдабабозлик шу ердан бошланади. Янги тартибнинг амалиётга жорий қилинишини биринчи навбатда Тошкент шаҳри ўз намунасида кўрсатиб бериши лозим.  Тўйларда исрофгарчиликка йўл қўймасликнинг моҳияти нимада? Одамлар ҳам ижтимоий тармоқларда ёзяпти. Намунали тўйларни биринчи галда раҳбарлар ўз мисолида кўрсатиб бериши керак. Агар қонунларга биринчи галда ўзимиз амал қилмасак, карикатура учун мавзу бўлганимиз қолади”, ─ дейди Сенат Раиси.