Ҳукумат 2020 йил ҳосили учун қишлоқ хўжалиги экинларини оқилона жойлаштириш бўйича қарор қабул қилади

Қорақалпоғистон Республикаси ва вилоятларда 2020 йил ҳосили учун талаб этиладиган ва етишмайдиган сабзавот, картошка ҳамда полиз уруғлари ҳисоб-китоби;

Қорақалпоғистон Республикаси ва вилоятларда 2020 йил ҳосили учун етиштириладиган сабзавот, полиз ва картошка маҳсулотлари ҳамда уларнинг ишлатилиши прогноз кўрсаткичлари;

Қорақалпоғистон Республикаси ва вилоятларда 2020 йил ҳосили учун ғўзанинг районлаштирилган ва истиқболли навларини жойлаштирилиши;

Қорақалпоғистон Республикаси ва вилоятларда 2020 йил ҳосили учун кузги бошоқли дон экинларини навлар бўйича жойлаштириш прогноз ҳажмлари, суперэлита уруғлик дон етиштириш ҳажмлари, уруғлик тайёрлаш ҳажмлари;

Қорақалпоғистон Республикаси ва вилоятларда 2020 йил ҳосили учун шоли экин майдонларининг мақсадли параметрлари, юқори сифатли шоли уруғи тайёрлашнинг прогноз кўрсаткичлари тасдиқланади.

Қорақалпоғистон Республикаси Вазирлар Кенгаши, вилоятлар ҳокимликлари, Қишлоқ хўжалиги вазирлиги, Сув хўжалиги вазирлиги, Ер ресурслари, геодезия, картография ва давлат кадастри давлат қўмитаси, Ўзбекистон фермер, деҳқон хўжаликлари ва томорқа ер эгалари кенгаши:

ҳар бир ҳудуднинг ихтисослашуви, тупроқ-иқлим шароити, ерларнинг мелиоратив ҳолати, унумдорлиги, сув билан таъминланганлигини инобатга олган ҳолда қайта ишловчи, тайёрловчи ва экспорт қилувчи ташкилотларнинг талабларидан келиб чиққан ҳолда қишлоқ хўжалиги экинлари контурлар бўйича ўз вақтида тўлиқ экилишини, агротехник тадбирлар ўз вақтида ва сифатли ўтказилишини ташкил этади;

суғориладиган экин майдонларининг мелиоратив ҳолатини яхшилаш, шунингдек, асосий ва такрорий майдонларда экспорт талабларидан келиб чиқиб, қишлоқ хўжалиги экинларини жойлаштириш бўйича илмий асосланган алмашлаб экиш тизимини жорий этади.

Ўзбекистон Республикаси Иқтисодиёт ва саноат вазирлиги, Қишлоқ хўжалиги вазирлиги, Қорақалпоғистон Республикаси Вазирлар Кенгаши, вилоятлар ҳокимликлари, Ўзбекистон фермер, деҳқон хўжаликлари ва томорқа ер эгалари кенгаши, “Ўзбекозиқовқатхолдинг” холдинг компанияси, “Ўзпахтасаноат” АЖ, “Ўздонмаҳсулот” акциядорлик компанияси, «Ўзбекозиқовқатзахира» уюшмаси, “Ўзёғмойсаноат” уюшмаси, Узумчилик ва виночиликни ривожлантириш агентлиги, тайёрлов ва хизмат кўрсатувчи ташкилотлар, тижорат банклари билан биргаликда:

маҳсулот етиштирувчилар билан тайёрлов, таъминотчи, қайта ишлаш ва экспорт қилувчи ташкилотлар, савдо харид ташкилотлари ўртасида маҳсулот етказиб бериш ва харид қилиш бўйича шартнома тузиш ишларини якунлайдилар;

экинларни экиш ва агротехник тадбирларни ўтказиш учун тузилган шартномаларга мувофиқ харид қилинадиган маҳсулот қийматининг 60 фоизидан кам бўлмаган миқдорда олдиндан аванс маблағлар ажратилишини таъминлайдилар.

Қишлоқ хўжалиги вазирлиги, Ўзбекистон фермер, деҳқон хўжаликлари ва томорқа ер эгалари кенгаши, Вазирлар Маҳкамаси ҳузуридаги Ўсимликлар карантини давлат инспекцияси ва Агросаноат мажмуи устидан назорат қилиш инспекцияси, Қорақалпоғистон Республикаси Вазирлар Кенгаши ва вилоятлар ҳокимликлари фермер хўжаликларига қишлоқ хўжалиги экинларининг серҳосил, тезпишар ва экспортбоп навларини танлашда кўмаклашсинлар ва сифатли уруғликлар билан таъминлаш чораларини кўрадилар.

Қорақалпоғистон Республикаси Вазирлар Кенгаши ва вилоятлар ҳокимликлари, замонавий технологиялар асосида кўчат етиштирувчи ташкилотлар, академик М.Мирзаев номидаги боғдорчилик, узумчилик илмий-тадқиқот институти билан биргаликда:

«in-vitro» шароитида вируслардан ҳоли бўлган соғлом мевали дарахт ва ток кўчатлари етиштириш ҳажмларини оширган ҳолда жорий йилда барпо этиладиган интенсив мевали боғ ва токзорлар учун талаб этиладиган кўчатлар шартнома асосида етказиб берилишини;

2020 йилда интенсив мевали боғ ва токзорлар барпо этадиган фермер хўжаликлари талабидан келиб чиққан ҳолда мевали дарахт ва ток кўчатлари турлари рўйхати шакллантирилишини ва буюртмалар беришни ташкил этадилар.

Қорақалпоғистон Республикаси Вазирлар Кенгаши ва вилоятлар ҳокимликлари Ер ресурслари, геодезия, картография ва давлат кадастри давлат қўмитаси, Қишлоқ хўжалиги вазирлиги, Сув хўжалиги вазирлиги, Ўзбекистон фермер, деҳқон хўжаликлари ва томорқа ер эгалари кенгаши билан биргаликда икки ой муддатда 2020 йил учун Қорақалпоғистон Республикаси ва барча вилоятларда самарасиз фойдаланилаётган ва қишлоқ хўжалиги фойдаланишига киритилаётган энг мақбул ерлар ҳисобидан 100 гектар шотут ва 100 гектар балхи тут плантацияларини ташкил этиш учун танласинлар ва уларнинг манзилли рўйхатини шакллантирсинлар ҳамда плантацияларини ташкил этиш ишларининг бориши натижалари тўғрисида ҳар чорак якунида Вазирлар Маҳкамасига ахборот киритиб борадилар.

Ўзбекистон Республикаси Вазирлар Маҳкамаси ҳузуридаги Ўсимликлар карантини давлат инспекцияси чегара олди ҳудудларда ва қўшни давлатларда юзага келган ўсимликлар карантини ҳолати тўғрисида ҳамда ўсимликлар карантини объектлари тарқалган хорижий мамлакатлардан қишлоқ хўжалиги экинлари уруғлари, мевали дарахт ва ток кўчатлари республика ҳудудига кириб келишининг олдини олиш бўйича қатъий назорат ўрнатади.

Ўзбекистон Республикаси Инвестициялар ва ташқи савдо вазирлиги, Иқтисодиёт ва саноат вазирлиги, Ахборот технологиялари ва коммуникацияларини ривожлантириш вазирлиги қишлоқ хўжалиги маҳсулотлари маркетинги бўйича асосий улгуржи бозорларда қишлоқ хўжалиги маҳсулотлари нархлари ва ишлаб чиқариш ҳажмларини акс эттирадиган ишончли маълумотлар базасини шакллантиради ва ҳар ой янгиланиб боришини таъминласин ҳамда маркетинг тадқиқотлари натижалари асосида башоратлаш тизимини йўлга қўяди.

Қорақалпоғистон Республикаси Вазирлар Кенгаши ва вилоятлар ҳокимликлари, Ўзбекистон Республикаси Инвестициялар ва ташқи савдо вазирлиги, Қишлоқ хўжалиги вазирлиги ҳар бир ҳудудда ишлаб чиқариш имкониятлари ва экспорт салоҳиятини тўлиқ намоён қилиш учун қишлоқ хўжалигида фойдаланилмаётган суғориладиган ерларни фойдаланишга киритиш бўйича инвесторларни жалб қилиш ишларини жадаллаштирадилар.

Бунда қишлоқ хўжалигида фойдаланилмаётган суғориладиган ерларни фойдаланишга киритишда иштирок этаётган инвесторларга ушбу ерларни иккиламчи ижарага бериш ва қишлоқ хўжалиги экинларини мустақил жойлаштириш ҳуқуқи берилган.

Қорақалпоғистон Республикаси Вазирлар Кенгаши ва вилоятлар ҳокимликлари, Қишлоқ хўжалиги вазирлиги, Сув хўжалиги вазирлиги, Иқтисодиёт ва саноат вазирлиги, Ер ресурслари, геодезия, картография ва давлат кадастри давлат қўмитаси, Ўрмон хўжалиги давлат қўмитаси, Геология ва минерал ресурслар Давлат қўмитаси геоахборот тизимлари асосида фойдаланишга киритилаётган ерлар бўйича инвесторларни лойиҳаларни электрон кўринишда тақдим этиш имконини берадиган электрон ахборот базасини шакллантирсин ва ушбу база асосида кейинги йилларда қишлоқ хўжалиги экинларини жойлаштириш ишларини автоматлаштириш механизмини жорий этиш зарурлиги белгилаб қўйилади.

Ўзбекистон Республикаси Ер ресурслари, геодезия, картография ва давлат кадастри давлат қўмитаси, Қорақалпоғистон Республикаси Вазирлар Кенгаши, вилоятлар ҳокимликлари билан биргаликда мазкур қарор билан белгиланган асосий ва такрорий майдонларга, боғ ва ток қатор ораларига экилган қишлоқ хўжалиги экинларини экиш мавсумининг якуни билан экинларни ўлчовдан ўтказади ва натижаси бўйича Вазирлар Маҳкамасига ахборот киритиб боради.

Ўзбекистон Республикаси Сув хўжалиги вазирлиги Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда вегетация даврида ажратилган сув лимитлари доирасида қишлоқ хўжалиги экинлари турларининг сувга бўлган талабидан келиб чиққан ҳолда суғориш графиклари асосида ўз вақтида сув билан тўлиқ таъминлайди.

Сув хўжалиги вазирлиги, Қишлоқ хўжалиги вазирлиги, Ўзбекистон фермер, деҳқон хўжаликлари ва томорқа ер эгалари кенгаши, “Ўзтўқимачиликсаноат” уюшмаси ҳамда Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда 2020 йилда 200 минг гектарда пахта хом ашёси ишлаб чиқаришда томчилатиб суғориш тизимини жорий этиш бўйича тегишли чора-тадбирлар режасини ишлаб чиқадилар.

“Ўзагрокимёҳимоя” акциядорлик жамияти, “Ўзкимёсаноат” акциядорлик жамияти, “Ўзбекнефтгаз” акциядорлик жамияти Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда:

фермер хўжаликлари ва бошқа қишлоқ хўжалиги ташкилотларининг белгиланган экин майдонларига минерал ўғит ва ёқилғи-мойлаш материалларини белгиланган тартибда биржа савдолари орқали етказиб беришни;

асосий ва такрорий майдонларга, боғ-ток қатор ораларига экилган қишлоқ хўжалиги экинлари, боғ ва токзорларни касаллик, зараркунанда ва бегона ўтлардан ҳимоя қилиш учун зарурий кимёвий препаратлар захираси яратилишини ва агрокимё хизматлари кўрсатилишини ташкил этадилар.

Қишлоқ хўжалиги вазирлиги, Қишлоқ хўжалиги ва озиқ-овқат таъминоти илмий-ишлаб чиқариш маркази тегишли илмий-тадқиқот институтларини жалб қилган ҳолда қишлоқ хўжалиги экинларини экиш муддатларида дала шароитида кўргазмали семинарлар ўтказиш ва ресурстежовчи инновацион технологиялар асосида агротехник тадбирларни амалга ошириш бўйича тавсиялар ишлаб чиқиб, фермер хўжаликларига етказилишини таъминлайдилар.