Туркия АҚШ санкцияларига қарамасдан Суриядаги операциядан воз кечмаслигини билдирди

Фото: AP Photo/Lefteris Pitarakis

Туркия АҚШ жорий этган санкцияларга қарамасдан Суриядаги ҳарбий операциядан асло воз кечмайди. Бу ҳақда Туркия парламенти спикери Мустафо Шонтўп маълум қилди.

"Асло <...> Туркия чегара яқинида террорчи тузилмалар учун йўлак яратилишига йўл қўймайди", - деди Шонтўп.

У курд тузилмалари Туркия чегараси атрофида "коалиция кучлари сояси остида мухтор ҳудуд ташкил этишга уринаётган террорчи ташкилот" эканлигини таъкидлади.

Шонтўп шунингдек, АҚШ томонидан киритилган санкциялар Туркия учун кутилмаган ҳол бўлмаганини айтди.

"Бу кутилмаган ҳол эмас, чунки бу АҚШда аллақачон муҳокама қилинганди. Улар санкция киритиш орқали халқаро сиёсатни бошқара оламиз деб ўйлашади, аммо улар ноҳақ. Санкциялар – жаҳон тажрибасидан келиб чиқадиган бўлсак, халқаро сиёсатда натижага эришиш йўли эмас", - деди у.

Тайёрлаган Дилшод Аскаров

#Туркия #Сурия

Туркия 9 октябрь куни Сурия шимолидаги курдларга қарши қуруқликдаги ҳарбий кампания бошлади. «Тинчлик булоғи» номли амалиётдан мақсад - Туркия чегаралари яқинида террорчилар учун йўлак қолдирмаслик ҳисобланади