Reuters агентлигининг тармоқдаги тўртта манбасига таяниб хабар беришича, 17 сентябр куни Ярославлдаги ЯНОС нефтни қайта ишлаш заводи хом нефтни қайта ишлашни тўхтатган.
Бунга заводга қилинган дрон ҳужуми оқибатида АВТ-3 бирламчи нефтни қайта ишлаш қурилмасининг шикастланиши сабаб бўлган. Унинг қуввати суткасига 17,1 минг тонна бўлиб, корхона умумий қайта ишлаш қувватининг тахминан 40 фоизини ташкил этади.
Ярославл вилояти губернатори Михаил Евраев заводда шикастланиш ва ёнғин юз берганини маълум қилган. Ёнғинни ўчириш ишлари бир неча соат давом этган. Қурбонлар ва жабрланганлар ҳақида хабар берилмаган.
Заводдаги яна бир асосий қурилма — АВТ-4 ҳам 28 августдаги аввалги дрон ҳужумидан кейин таъмирланаётган эди. У корхона қувватининг 33 фоизини таъминлайди. Шу тариқа, заводнинг умумий қувватининг катта қисмини ташкил этувчи икки асосий қурилма бир вақтнинг ўзида ишдан ташқарида қолган.
Reuters манбаларига кўра, ҳужумдан кейин Ярославл заводида ишлаб чиқарилган ёқилғи Россия ички товар биржасида сотувга қўйилмаган.
ЯНОС Россиядаги йирик нефтни қайта ишлаш корхоналаридан бири ҳисобланади. Унинг лойиҳавий қуввати йилига 15 млн тонна ёки суткасига қарийб 300 минг баррел нефтни ташкил қилади. 2024 йилда завод 14,9 млн тонна нефтни қайта ишлаган, жумладан, 2,6 млн тонна бензин ва 4 млн тонна дизел ёнилғиси ишлаб чиқарган.
Корхона Москва вилоятини ҳам ёнилғи билан таъминлаб келган.
Сентябр ойида бу Россиянинг мазкур қисмида дрон ҳужумлари оқибатида ишини тўхтатган иккинчи йирик нефтни қайта ишлаш заводи бўлди. DW маълумотига кўра, 6 сентябрдан Рязандаги НҚЗ ҳам ёнилғи жўнатишни тўхтатган.
