АҚШ конгресси қуйи палатаси Туркияга қарши санкциялар киритилишини маъқуллади

АҚШ конгресси қуйи палатаси Туркиянинг Суриядаги ҳарбий амалиёти ва Россиядан С-400 зенит-ракета мажмуаларини сотиб олгани билан боғлиқ ҳолда Анқарага қарши санкциялар киритилиши ҳақидаги қонун лойиҳасини қабул қилди.

Қонун лойиҳасини 403 депутат қўллаб-қувватлаган, 16 депутат унга қарши чиққан. У Туркиянинг юқори лавозимли шахсларига, жумладан мудофаа вазирига қарши санкциялар киритилиши ва Halk Bankasi турк банкига қарши чоралар қўлланиши ва активлари блокланишини кўзда тутади.

Бундан ташқари, Туркия президенти Ражаб Тоййиб Эрдўған оиласининг АҚШдаги активлари бўйича қарор қабул қилиш учун улар ҳақидаги маълумотларни кўриб чиқиш кўзда тутилган. Қонун лойиҳаси кучга кириши учун сенатда у бўйича овоз берилиши ва АҚШ президенти томонидан имзоланиши лозим.    
 
Туркия ташқи ишлар вазирлиги қонун лойиҳасининг қабул қилинишига изоҳ бериб, унинг “НАТО руҳига ва АҚШ ҳамда Туркиянинг Сурия бўйича келишувига зидлиги” айтилган. Туркия ҳукумати конгрессменларни “икки томонлама муносабатлар масалаларидан ички сиёсий мақсадларда фойдаланмаслик”ка чақирган.