Марказий Осиё давлатлари ташқи ишлар вазирлари Тошкентда учрашади

2019 йилнинг 15 ноябрь куни Тошкент шаҳрида Марказий Осиё давлатлари ташқи ишлар вазирларининг учрашуви бўлиб ўтади.

Ташқи ишлар вазирлиги хабарига кўра, Қозоғистон, Қирғизистон, Тожикистон, Туркманистон ва Ўзбекистон ТИВ раҳбарлари томонидан Тошкент шаҳрида бўлиб ўтадиган Марказий Осиё давлатлари раҳбарларининг иккинчи Маслаҳат учрашувига тайёргарлик жараёни кўриб чиқилади.

Минтақавий ҳамкорликни янада ривожлантириш ва мустаҳкамлаш истиқболларини муҳокама қилиш, шунингдек, халқаро кун тартиби юзасидан фикр алмашиш режалаштирилган.