Шароф Рашидов туманида яшовчи келинчак сув билан куйдирилгани, суваракларга қарши ишлатиладиган дорини ичишга мажбурлангани ва ёлғиз, хонада қамаб қўйилганини айтмоқда. Унинг танасида 6-8 фоиз майдонни қамраб олган 2-3А даражали куйишлар борлиги маълум қилинган. Ҳолат юзасидан жиноят иши қўзғатилган. Иккинчи томон айбловларни рад этиб, ҳодиса оилавий маиший жанжал эканини айтмоқда.
Kun.uz мухбири воқеа иштирокчилари билан суҳбатлашиб, оилада нима содир бўлганини ўрганишга ҳаракат қилди.
Ҳозирги вақтда аёл шифохонада даволанмоқда. Ички ишлар органлари маълумотига кўра, унда тана юзасининг 6-8 фоизини қамраб олган 2-3А даражали куйишлар аниқланган. Ҳолат юзасидан суд-тиббий экспертизаси тайинланган, воқеа жойи кўздан кечирилиб, ашёвий далиллар олинган.
8 сентябрь куни Шароф Рашидов тумани ИИБ ҳузуридаги Тергов бўлими томонидан Жиноят кодексининг 109-моддаси 1-қисми билан жиноят иши қўзғатилган. Тергов давом этмоқда.
Меҳрибоннинг айтишича, у турмуш ўртоғи билан бир йилдан бери бирга яшаб келган. Уларнинг бир нафар қиз фарзанди бор. Бироқ эркак никоҳи ва фарзанди ҳақида яқинларига аввал айтмаган.
Меҳрибоннинг сўзларига кўра, эри 2026 йил 21 май куни қамоққа тушганидан кейин оиласига хотини ва фарзанди борлигини маълум қилган ҳамда яқинларидан Меҳрибонга қараб туришларини сўраган.
“Келинимиз билан ўртамизда муаммо бўлмаган...”
Эркакнинг опаси Зарнигор Йўлдошева Меҳрибон ва унинг қизини олиб, улар билан алоҳида квартирада яшай бошлаган.
Меҳрибон қайнонаси унинг ҳужжатларини кўрсатиб, кредитга бир қанча қимматбаҳо тақинчоқлар, маҳсулотлар олганини айтмоқда.
Зарнигорнинг ўзи Kun.uz'га укаси қамоққа тушганидан кейин унинг фарзанди борлигини билганини айтди. Унинг сўзларига кўра, Меҳрибон ва фарзандини июн ойида уйига олиб келган. Бирга яшаган даврда уларнинг ўрталарида жиддий келишмовчилик бўлмаган.
«Биз яхши яшаганмиз. Уруш, жанжал, ҳеч нарса бўлмаган», - деди Зарнигор.
Зарнигорнинг айтишича, Меҳрибон билан унинг турмуш қурмаган синглиси Рухшона ўртасида келишмовчилик бўлган.
Унинг таъкидлашича, бу можаро вақтида Меҳрибон ва Рухшона бир-бирини куйдирган. Бироқ бу ҳақда у воқеа содир бўлган пайтда билмаган. Кейин икки аёл ўзаро ярашиб олганини айтган.
