Австралия лайнери фуқаро авиацияси тарихидаги энг узоқ парвозни амалга оширди

Австралиянинг Qantas авиакомпанияси самолёти Лондон – Сидней йўналиши бўйича парвоз қилиб фуқаро авиацияси тарихидаги энг узоқ давом этган тўхтовсиз учишни амалга оширди. Бу ҳақда CNN телеканали хабар берди.

Boeing 787-9 Dreamliner самолёти синов парвози давомида ҳавода 19 соат 19 дақиқа бўлди ва бу вақт ичида 17,8 минг километрни босиб ўтди. Шундай қилиб, бирданига иккита жаҳон рекорди ўрнатилди: парвоз масофа ва вақт бўйича энг узун тижорат рейси деб топилди.

Самолёт Лондондаги Хитроу аэропортидан 14 ноябрь куни эрталаб соат олтида ҳавога кўтарилди. У парвоз давомида Германия, Россия, Польша, Беларусь, Қозоғистон ва Хитой устидан учиб ўтди. Сўнгра жанубга бурилди ва Филиппин ҳамда Индонезия узра учиб ўтди.

Boeing 787-9 256 нафаргача йўловчига мўлжалланган бўлса-да, унинг бортида 50 киши, жумладан, тўрт нафар учувчи бўлди. Қайд этилишича, йўловчилар парвоз давомида тонг отишини икки марта кузатишган.