12 ноябрь куни Қурилиш вазирлигида 2019 йилда соҳада амалга оширилган ишлар юзасидан матбуот анжумани бўлиб ўтди. Вазирлик раҳбарияти, ҳамкор ташкилот ва идораларнинг мутасаддилари иштирок этган тадбирда жорий йилнинг 10 ойи мобайнида қилинган ишлар, галдаги режалар ва кутилаётган янгиликлар ҳақида батафсил маълумот берилди.
Журналистлар шаҳар ва қишлоқларда қурилаётган уйларни лойиҳалашда қандай методлардан фойдаланилаётгани, уйлар бир-бирига ўхшаб қолмаслиги учун нималар қилинаётгани, бу борада хориж тажрибасидан қай тарзда фойдаланилаётгани билан қизиқишди.
Қурилиш вазирининг ўринбосари Шуҳратхўжа Ҳошимовнинг айтишича, қурилаётган объектларнинг архитектуравий ва конструктив ечимлари илғор хорижий тажриба асосида қайтадан кўриб чиқилган.
«Уйларни қуришда энергосамарадор ва ресурстежайдиган технологияларни қўллаяпмиз. Умуман, лойиҳалаштиришда ҳозир босқичма-босқич бинт технологиялари асосида шу уйларнинг лойиҳаларини қиляпмиз. Мисол тариқасида айтишим мумкин, биз анъанавий ғиштдан биноларни қуришга ўрганиб қолганмиз, мана бугунги кунда қурилаётган биноларга эътибор берадиган бўлсак, президентимиз уй-жойларнинг нарх-навосини арзонлаштириш бўйича вазифа берган. Биноларнинг деворларини пенобетон, газобетондан кўтариб, унинг иссиқлик изоляциясини материаллар билан қоплаш орқали бугунги кунда пойдеворнинг параметрларини камайтиришга эришяпмиз.
Бу дегани бетон кам кетади, арматура ҳам шунга яраша кам сарф бўлади, Демак, бинонинг юқори қисми умуман устувор конструкциялари бўйича бу сарф-харажатни камайтиради, бинонинг ичида ишлатилаётган энергоресурсларни ҳам тежашга эришилади», деган Ҳошимовнинг сўзларини келтирмоқда Kun.uz мухбири.
Қурилиш вазири ўринбосарига кўра, янги технологияларни қўллаган ҳолда биноларнинг баландлигини кўтариш устида иш олиб борилмоқда. Уй-жойларни қуришда урбанизация жараёни ҳисобга олинмоқда, яъни бугунги кунда республикадаги ер ресурсларидан унумли фойдаланиш учун керакли муҳандислик инфрастуктураси бор жойларда 16 ва ундан кўп қаватли уй-жойларни қуриш, уларни комлекс равишда ривожлантириш (болалар боғчаси, мактаб, поликлиника ва бошқа объектларни ҳам бирга )га урғу берилмоқда.
Тадбирда Шуҳратхўжа Ҳошимов журналистларнинг саволига жавобан уй-жойларнинг нархини арзонлаштириш мақсадида қурилиш маҳсулотларининг, хусусан, бетон, арматуранинг тежалиши уйларнинг мустаҳкамлигига қандай таъсир қилиши ҳақидаги саволга ҳам жавоб бериб ўтди.
