Бандихон туманини комплекс ривожлантириш дастури лойиҳаси эълон қилинди
|14:57 / 14.12.201913 1048 мин
Сурхондарё вилояти таркибида Бандихон тумани ҳокимлиги ташкил этилади ҳамда 2020-2022 йилларда Бандихон туманини комплекс ижтимоий-иқтисодий ривожлантириш дастури тасдиқланади.
Президентнинг тегишли қарори лойиҳасида Ўзбекистон Республикаси Олий Мажлиси Қонунчилик палатасининг 2019 йил 30 ноябрдаги 2932-III-сон ҳамда Ўзбекистон Республикаси Сенатининг 2019 йил 30 ноябрдаги “Сурхондарё вилояти таркибида Бандихон туманини ташкил этиш ҳамда Қизириқ, Бойсун ва Қумқўрғон туманлари чегараларини ўзгартириш тўғрисида”ги СҚ-539-Ш-сон қарори маълумот учун келтирилган.
Сурхондарё вилояти таркибида Бандихон тумани ҳокимлиги ташкил этилади.
Сурхондарё вилояти таркибида Бандихон тумани ҳокимлигини ташкил этиш билан боғлиқ ташкилий масалаларни ҳал этиш бўйича республика комиссияси тасдиқланади.
Республика комиссияси (А.Ж. Раматов):
Сурхондарё вилояти таркибида Бандихон тумани ҳокимлигини ташкил этиш билан боғлиқ зарур ташкилий техник тадбирлар комплексини ишлаб чиқади ва белгиланган муддатларда амалга оширилишини таъминлайди;
Сурхондарё вилояти ҳокимлиги билан биргаликда Бандихон туманини ташкил этиш даврида иқтисодиёт тармоқларининг аниқ, барқарор ва бир маромда ишлашини, шунингдек юзага келадиган ижтимоий масалаларнинг ўз вақтида ҳал этилишини таъминлайди;
Сурхондарё вилояти ҳокимлиги Ўзбекистон Республикаси Бандлик ва меҳнат муносабатлари вазирлиги билан биргаликда Сурхондарё вилояти таркибида Бандихон туманини ташкил этилиши муносабати билан янгидан ташкил этилаётган давлат ва хўжалик бошқаруви органлари ҳудудий тузилмаларини кўп йиллик тажрибага эга бўлган малакали кадрлар билан тўлдириш чора-тадбирларини кўради.
Ўзбекистон Республикаси Қурилиш вазирлиги (Зокиров), Сурхондарё вилояти ҳокимлиги (Боболов) билан биргаликда 2020 йил 1 октябрга қадар Бандихон тумани марказининг 2030 йилгача бўлган бош режасини ишлаб чиқиб, белгиланган тартибда тасдиқлашни таъминлайди.
Иқтисодиёт ва саноат вазирлиги, Инвестициялар ва ташқи савдо вазирлиги, Сурхондарё вилояти ҳокимлиги ва бошқа манфаатдор вазирлик ва идоралар томонидан ишлаб чиқилган “2020-2022 йилларда Сурхондарё вилояти Бандихон туманини комплекс ижтимоий-иқтисодий ривожлантириш дастури” маъқулланади.
Мавзуга оид
Дастурнинг асосий устувор йўналишлари этиб қуйидагилар белгиланади:
ҳудудни комплекс ижтимоий-иқтисодий, транспорт ва логистик жиҳатдан ривожлантириш аҳолининг, хусусан ёшларнинг бандлигини таъминлаш, ишлаб чиқариш ва хизмат кўрсатиш корхоналарини ишга тушириш;
Бандихон туманини ривожлантириш ва ободонлаштириш, унинг меъморий қиёфасини тубдан ўзгартириш, шаҳарсозлик қоидаларига мувофиқлаштириш, шунингдек, кўп қаватли уй-жойлар қуриш ҳамда зарур ташқи муҳандислик коммуникация тармоқлари билан таъминлаш;
ижтимоий ва йўл инфратузилмасини ривожлантириш, хусусан ички йўлларни ва ижтимоий соҳа объектларини реконструкция қилиш ва қайта таъмирлаш;
ерларнинг мелиоратив ҳолатини яхшилаш, қишлоқ хўжалиги маҳсулотлари етиштиришни кўпайтириш ва уларни қайта ишлаш даражасини ошириш шунингдек, хорижий тажриба асосида чорвачилик, қўй ва эчкичиликни ривожлантириш.
Сурхондарё вилояти Бандихон туманидаги мавжуд имкониятлардан самарали фойдаланиш мақсадида:
Қишлоқ хўжалиги вазирлиги, Сув хўжалиги вазирлиги, Инновацион ривожланиш вазирлиги, Сурхондарё вилояти ҳокимлиги билан биргаликда икки ой муддатда Бандихон туманида Илмий-тажриба институтлари томонидан иқлим шароитини ва тупроқ унумдорлигини инобатга олган ҳолда экспортбоп мева-сабзавот маҳсулотларини етиштиришни кўпайтириш мақсадида уларни экиш ва навларни танлаш бўйича илмий ишланмалар ишлаб чиқилишини;
“Ўзбекипаксаноат” уюшмаси, Қишлоқ хўжалиги вазирлиги Сурхондарё вилояти ҳокимлиги билан биргаликда 2020-2022 йилларда Бандихон туманида пиллачилик тармоғини ривожлантириш бўйича чора-тадбирлар дастурини ишлаб чиқсин ва амалга оширилишини;
Ветеринария ва чорвачиликни ривожлантириш давлат қўмитаси, “Ўзбекчорванасл” агентлиги, Халқ банки, Сурхондарё вилояти ҳокимлиги билан биргаликда Бандихон туманида мавжуд яйлов ерлардан самарали фойдаланиш мақсадида 2020 йилда 2 та ва 2021-2022 йилларда 4 та йирик қўйчилик ва эчкичилик кластерларини ташкил этилишини;
“Паррандасаноат” уюшмаси, Ўзсаноатқурилишбанк, Сурхондарё вилояти ҳокимлиги билан биргаликда 2020-2021 йилларда қуввати 1 млн. бошга тенг бўлган 2 та паррандачилик комплексини ташкил этилишини;
“Ўзчармсаноат” уюшмаси, Асака банк, Сурхондарё вилояти ҳокимлиги билан биргаликда 2020-2021 йилларда тери хом ашёсини тўлиқ ва чуқур қайта ишлашга мўлжалланган чарм-пойабзал ишлаб чиқариш корхонасини маҳаллий ва хорижий инвесторларни жалб этган ҳолда ташкил этилишини;
Боғдорчилик ва иссиқхона хўжалиги ривожлантириш агентлиги, Лимон етиштирувчилар ва экспорт қилувчилар уюшмаси, тижорат банклари, Сурхондарё вилояти ҳокимлиги билан биргаликда майдони 1 гектарни ташкил этувчи замонавий типдаги 10 та, шундан 2020 йилда 4 та ва 2021 йилда 6 та иссиқхона ташкил этилишини;
Қишлоқ хўжалиги вазирлиги, Боғдорчилик ва иссиқхона хўжалиги ривожлантириш агентлиги, Агросаноат мажмуи ва озиқ-овқат таъминоти соҳасидаги лойиҳаларни амалга ошириш агентлиги Бандихон туманида ресурс тежовчи технологиялар асосида интенсив боғ ва токзорларни барпо этиш, мева-сабзавот маҳсулотларини қайта ишлашни йўлга қўйиш бўйича 2020-2021 йилларга мўлжалланган дастур ишлаб чиқилишини ва амалга оширилишини таъминлайди.
Ўзбекистон Республикаси Фавқулодда вазиятлар вазирлиги (Худойбергенов), Ўзбекистон Республикаси Геология ва минерал ресурслар Давлат қўмитаси (Тўрамуродов), Ўзбекистон Республикаси Экология ва атроф-муҳитни муҳофаза қилиш Давлат қўмитаси (Қўчқоров), Сурхондарё вилоят ҳокимлиги (Боболов) янгидан ташкил этилаётган Бандихон туманида саноатни ривожлантириш, тадбиркорларни кенг жалб этиш мақсадида тумандаги мавжуд дарё, сойлардан ҳамда қум-тош конларидан, тош-шағал билан ишловчи корхоналарга имтиёзлар яратиш борасида “Хавфсиз дарё” давлат унитар корхонаси билан тўғридан тўғри шартномалар тузишига рухсат этилади.
Ўзбекистон Республикаси Уй-жой коммунал хизмат кўрсатиш вазирлиги, Иқтисодиёт ва саноат вазирлиги, Молия вазирлиги ва Сурхондарё вилояти ҳокимлиги, Бандихон туманида ижтимоий соҳа объектлари ва кўп қаватли турар жой бинолари, ишлаб чиқариш ва хизмат кўрсатиш объектлари учун оқова сув тизими ва тозалаш иншоотларини қуриш ишларини 2020 йилдан бошлаб, 2022 йил май ойига қадар тўлиқ якунлайди.
“Ўзбекистонтемирйўллари” АЖ Бандихон тумани аҳолисига қулайлик яратиш мақсадида “Тошкент-Бойсун-Қумқўрғон-Термиз” темир йўл линиясининг “Тангимуш” станциясида йўловчиларни поездларга чиқиш-тушишларини ташкиллаштиради.
Ўзбекистон Республикаси Энергетика вазирлиги Уй-жой коммунал хизмат кўрсатиш вазирлиги, Сурхондарё вилояти ҳокимлиги билан биргаликда аҳолини электр энергия, табиий ва суюлтирилган газ, ичимлик сув ва канализация тизими билан таъминлаш бўйича муҳандислик-коммуникация инфратузилмасини ривожлантириш, шунингдек, Дастур доирасида амалга ошириладиган инвестиция лойиҳалари асосида ишлаб чиқариш корхоналарини муҳандислик тармоқларига белгиланган тартибда улашга техник ресурс имкониятларидан келиб чиқиб, техник шарт бериш ҳамда ажратилган лимит доирасида газ билан таъминлаш чораларини кўради.
Ўзбекистон Республикаси Бош прокуратураси ва Ички ишлар вазирлиги ташкил этилаётган вилоятга бўйсунувчи Бандихон туманида ҳуқуқни муҳофаза қилувчи органларнинг тузилмаларини ташкил этиш масаласини кўриб чиқади.
Ўзбекистон Республикаси Адлия вазирлиги Молия вазирлиги билан биргаликда Бандихон туманида фуқаролик ҳолати далолатномаларини ёзиш органлари ва давлат нотариал идораларини, «Давлат хизматлар» марказни ташкил этиш масаласини кўриб чиқиб, тегишли тадбирларни амалга оширади.
