Оттава суди россиялик разведкачиларнинг икки ўғли Канада фуқаролари эканлигини тасдиқлади

Оттавадаги Канада олий суди россиялик собиқ агентлар Андрей Безруков ва Елена Вавилованинг икки ўғли Канада фуқаролари эканлигини тасдиқлади. Бу ҳақда CBC телерадикорпорацияси хабар берди.

Аввалроқ Канада федерал апелляция суди ҳам 1990-йилларда Канадада туғилган Александр ва Тимоти Вавиловлар канадалик эканлигини билдирганди. 

Канада ҳукумати ўтган йили Александр Вавиловнинг Канада паспортини бекор қилиш жараёнини бошлаганди. Ҳукуматнинг қайд этишича, унинг Канада ҳудудида туғилгани унга фуқароликка даъво қилиш ҳуқуқини бермайди, чунки унинг ота-онаси хорижий давлат учун ишлаган ва ўша давлат вакиллари бўлган.  

Александр ва Тимотининг ота-онаси, россиялик разведкачилар Андрей Безруков ва Елена Вавилова Канадага 1980-йилларда келишган. Улар Шимолий Америка ҳудудида фаолият олиб борган разведка тармоғига киришган.

2010 йил июнда АҚШ ҳукумати Россиянинг ўнлаб агентларини жосусликда гумонлаб қўлга олган. Улар орасида Безруков ва Вавилова, Анна Чапман, Ричард ва Синтия Мерфи, Хуан Лазаро ва бошқалар бўлган. Улар ҳибсга олинганидан бир оз вақт ўтиб, Россияда жосусликда айбланган олим Игорь Сутягин, махсус хизматларнинг собиқ ходимлари Сергей Скрипаль, Александр Запорожский ва Геннадий Василенкога айирбошланган. Айирбошлаш Вена аэропортида бўлиб ўтган.