HydroLAKES маълумотлари асосида тузилган рейтингда майдони камида 0,1 квадрат километр бўлган табиий кўллар ҳисобга олинган. Сув омборлари ҳамда оқими инсон томонидан тартибга солинадиган кўллар статистикага киритилмаган. Чегарадош кўллар эса улардан сув оқиб чиқадиган давлат ҳисобига ёзилган.
Рейтингда Канададан кейин Россия жойлашган — мамлакатда 201 240 та кўл бор. Учинчи ўринни 102 519 та кўл билан АҚШ эгаллаган. Хитойда эса 23 751 та кўл қайд этилган ва у тўртинчи ўринда.
Канада, Россия ва АҚШнинг ўзи ушбу маълумотлар базасига киритилган 1,42 миллиондан зиёд кўлнинг 83 фоиздан ортиғига тўғри келади.
Бироқ кўллар сони улар эгаллаган умумий майдон ҳақида тўлиқ тасаввур бермайди. Масалан, Канада кўлларининг умумий майдони тахминан 812,7 минг квадрат километрни ташкил этса, Россияда бу кўрсаткич қарийб 622,6 минг квадрат километрга тенг.
Статистикада кўл деб ҳисобланадиган сув ҳавзасининг минимал майдони ҳам натижага жиддий таъсир қилади. Масалан, Финландияда майдони камида 0,0005 квадрат километр бўлган қарийб 168 мингта кўл мавжуд. Аммо HydroLAKES рейтингидаги 0,1 квадрат километрлик мезон қўлланганда, уларнинг сони 7 898 тагача камаяди.
Канада ва Россияда кўлларнинг бунчалик кўплиги, аввало, уларнинг шимолий географик жойлашуви ва қадимги музлик даврлари билан боғлиқ. Минглаб йиллар давомида улкан муз қатламлари шимолий ҳудудлар рельефини қайта-қайта ўзгартирган. Музликлар чекингач, улар ҳосил қилган пастлик ва чуқурликларда сув тўпланиб, минглаб кўллар пайдо бўлган.
Россияда дунёдаги энг ноёб чучук сув ҳавзаларидан бири — Байкал кўли ҳам жойлашган. У дунёдаги энг чуқур кўл ҳисобланади. Манбага кўра, Байкал сувларида сайёрадаги музламаган чучук сув захираларининг қарийб 20 фоизи мужассам.
Шу тариқа, бугунги кунда кўллар энг кўп тўпланган ҳудудлар харитаси кўп жиҳатдан қадимги музликлар ҳаракатланган ҳудудлар билан мос келади. Бир вақтлар улкан муз қатламлари қоплаб турган ерларда ҳозир ўн минглаб, айрим мамлакатларда эса юз минглаб ва миллиондан ортиқ кўллар мавжуд.
