Сайловда давомат 70 фоизга яқинлашди

Олий Мажлис Қонунчилик палатаси ва маҳаллий кенгашлар сайлови бўйича Ўзбекистондаги участкаларда соат 18:20 ҳолатига кўра 68,7 фоиз сайловчилар овоз бериб бўлди. Бу ҳақда Марказий сайлов комиссияси хабар берди.

Сайлов бошланганидан 10 соат ўтиб, рўйхатга олинган жами 18 миллион 797 минг 810 нафар сайловчидан 12 миллион 922 минг 429 нафари овоз бериб улгурган.

Энг юқори иштирок ҳозирча Қорақалпоғистонда кузатилмоқда, у ерда 73,1 фоиз сайловчи овоз бериб бўлган. Энг паст кўрсаткич эса Тошкент шаҳрида - 57,3 фоиз.

Сайловчилар участкаларга келишда давом этмоқда. Сайлов 20:00 га қадар давом этади.