Англияда «қизил дерби» ва Лопетегининг Мадридга қайтиши. Ҳафта ўйинлари анонси
|02:09 / 18.01.202022 79212 мин
Ниҳоят қишки танаффус тугаб, кучли бешлик ҳам тўлиқ таркибда тур ўйинларида давом этади. Бугундан бошланаётган дам олиш кунларининг қизиқарли ўйинлари анонси анъанавий тарзда эътиборингизга ҳавола қилинади.
АРСЕНАЛ – ШЕФФИЛД ЮНАЙТЕД (18 январь, 20:00)
«Арсенал» Артета бошчилигида ижобий томонга ўзгаришни бошлаганини айта бошлашганди, зеро янги йилни икки ғалаба билан бошлаган «тўпчилар» ўз дарвозалари дахлсиз сақлай олишганди. Мағлублардан бири айниқса, топ-рақибларга қарши яхши ўйнайдиган «Манчестер Юнайтед» эканини эътиборга олсак, бу ғалаба Артета учун ҳам биринчи, ҳам катта ғалаба эди. Аммо ўтган турда Лондон дербисида «Кристал Пэлас» билан ўйинда дуранг қайд этилди ва энди «Арсенал»нинг кучли тўртликдан фарқи 11 очкони ташкил қилмоқда.
«Шеффилд» эса, турнир жадвалида айнан «Арсенал»нинг олтиликдаги ўрнини эгаллаб турибди. Крис Уилдер шогирдлари «Этиҳад» ва «Энфилд»да бир хил ҳисобдаги мағлубиятлардан (0:2) кейин, яна эски режимга ўтиб олишди ва ўтган турда «Вест Ҳэм» мағлуб этилди. Умуман олганда, «Шеффилд» сафарда, айниқса, Лондонда жуда яхши натижа кўрсатишини эътироф этиш керак. «Челси» ҳам, «Тоттенҳэм» ҳам уй ўйинида «Шеффилд» устидан ғалаба қозона олишмаганди. Жамоа лигадаги энг яхши ҳимояга эга: «Шеффилд» атиги 21 гол қўйиб юборган ва фақат «Ливерпуль» яхшироқ кўрсаткичга эга. Иккинчидан, дарвозабон Деан Ҳендерсоннинг қуруқ ўйинлари сони – 8та, у ҳам «Лестер» посбони Каспер Шмайхел билан биргаликда, энг яхши кўрсаткичга эга бўлиб турибди.
Бундан ташқари, «Арсенал» бу ўйинда асосий қуроли, 14та гол билан тўпурарлар баҳсида етакчи ўринларда бораётган Пьер-Эмерик Обамеянгдан фойдалана олмайди. Габонлик ҳужумчи ўтган турда ҳакам томонидан майдондан четлатилганди. Шунингдек, Лукас Торрейра ва Сеад Колашинац ҳам жароҳатланган. Фақат Эктор Беллерин ҳақида яхши хабарлар бор: у машғулотларни бошлади ва балки бу ўйинда ҳам тайёр бўлиши мумкин. Меҳмонлар таркибида йўқотишлар йўқ.
Дарвоқе, жамоаларнинг биринчи даврадаги тўқнашувида мезбонлар – «Шеффилд Юнайтед» 1:0 ҳисобида ғалаба қозонган. Айнан ўша ўйиндан кейин «Арсенал»нинг ижобий сериясига барҳам берилган ва лондонликлар пастга шўнғишни бошлаганди. Шу мағлубиятдан кейин АПЛдаги 12 учрашувда «Арсенал» атиги 2 марта ғалаба қозона олди, холос.
«РЕАЛ» МАДРИД – «СЕВИЛЬЯ» (18 январь, 20:00)
Мавзуга оид
Баҳор яқинлашган сари Зиданнинг «Реал»и жуда юқори спорт формага кира бошлаши одатий ҳолга айланиб улгурди. Биринчидан, жамоа анча ишончли ўйнай бошлаганини натижалар ҳам кўрсатиб турибди: барча мусобақаларда 16 ўйинда кетма-кет мағлубият нималигини билмаслик, бу ўйинларнинг 10тасида ўз дарвозасини дахлсиз сақлаш ажойиб натижадир. Иккинчидан, аста-секин жароҳатланган футболчилар ҳам сафга қайта бошлашди – Марко Асенсио, Эден Азар каби футболчиларнинг тез тикланмоқда. Унгача эса «Реал» қолган жойидан давом этиши ва «Барселона» билан ҳал қилувчи паллага йўқотишларсиз кириб бориши керак. «Севилья» – бу палладаги жиддий синовлардан бири.
Андалусияликлар фақат «Реал» учун синов эмас, Испанияда юқори ўринлар учун курашаётган жамоалардан бири ҳамдир. «Севилья» тўрт ўйиндан бери Ла Лигадаги сўнгги 11 ўйинда атиги 1 марта мағлубиятга учради ва турнир жадвалида 35 очко тўплаб, пешқадамлардан 5 очко орқада боряпти. Чемпионлар Лигаси ўринлари учун курашда «Севилья» ҳам албатта, бу ўйинда камида бир очко олишга ҳаракат қилиши шубҳасиз.
Бундан ташқари, жамоани Хульен Лопетеги бошқариши ҳам бу ўйинга алоҳида интрига тақдим этади. Ушбу мутахассис ўтган мавсумни «Реал» бош мураббийи сифатида бошлаган, лекин бир неча ойдан кейин истеъфога чиқарилганди. Мураббий собиқ раҳбарларига ўзини кўрсатиб қўйишга ҳам уриниши турган гап. Жамоаларнинг биринчи даврадаги ўйини 1:0 ҳисобида меҳмонларнинг ғалабаси билан якунланган, ягона гол Карим Бензема ҳисобига ёзилганди.
Лекин франциялик футболчи бу учрашувда майдонга туша олмаслиги ҳақиқатга яқинроқ. Унда кичик жароҳат бор. Бу шароитда Лука Йовичнинг тикланиб сафга қайтгани айни муддао бўлди. Шунингдек, Гарет Бэйл ҳам бу ўйинда майдонга туша олади. Катта эҳтимол билан Зидан ҳужумда Бэйл – Родриго – Йович учлигидан фойдаланса керак. Ярим ҳимояда сўнгги ўйинларда ўта юқори савияни намойиш қилиб, ҳатто Пересга Погбани унуттиришга сабаб бўлаётган Вальверденинг иштирок этиши шубҳа остида.
Меҳмонлар сафида Серхио Эскудеро машғулотларга қайтди. Тажрибали футболчи икки ойлик танаффусдан сўнг майдонга тушиши мумкин. Лукас Окампос эса «Атлетик»ка қарши ўйинда навбатдаги сариқ карточкасини олди ва бир ўйинни дисквалификация туфайли ўтказиб юборади.
Ўзаро ўйинларга эътибор берсак, охирги 25 ўйиннинг 18тасида мадридликлар устун келган. Айнан «Бернабеу»даги охирги беш ўйинда ҳам «Реал» ғалаба қозонган, хусусан, тўрттаси йирик ҳисобда мезбонлар ғалабаси билан якунланган. Умуман, «Севилья»нинг «Реал» майдонидаги муваффақиятли ўйинини қидирсак, аввалги ўн йилликка қайтиш лозим бўлади. 2008 йилнинг декабрида «Севилья» 4:3 ҳисобида Мадридда ғалаба қозонган. Шундан кейинги 14 учрашув мезбонларнинг ғалабаси билан тугаган. Тўплар нисбати – 50-10.
«Ливерпуль» Премьер Лигада охирги марта ўтган йилнинг январида ўз уйида очко йўқотган. Ўшанда Клопп шогирдлари «Лестер» билан 1:1 ҳисобини қайд этганди. Қарийб бир йил ўтди ва «Ливерпуль» уй учрашувларини юз фоиз ғалаба билан якунлаяпти.
Меҳмонларнинг имконияти жуда ҳам оз эканига яна бир сабаб, Сульшернинг таркибда муаммоларга дуч келаётганидир. Аслида, «Манчестер Юнайтед» ушбу мавсумда «Ливерпуль»дан очко олган ягона жамоа бўлиб турибди, аммо ўша ўйин биринчидан «Олд Траффорд»да бўлиб ўтганди, иккинчидан эса ўша «МЮ»га нисбатан ҳам ҳозиргиси бироз муаммоларга эга бўлиб турибди. «Олд Траффорд»даги тўқнашувда асосий вазифалардан бирини бажарган Скотт Мактомини ҳали жароҳатидан тикланиб улгурмади. Бунинг устига, Маркус Рэшфорд кубок ўйинида захирадан майдонга тушиб, жароҳат олди. Рэшфорднинг ўзи ҳар қандай ҳолатда ҳам жамоасига ёрдам бермоқчи эканини айтаётган бўлса-да, Сульшер ҳужумчига камроқ умид боғламоқда ва «Энфилд»да Рэшфорд яхши спорт формасида бўлишига ишонмаяпти. Тактик жиҳатдан Марсиял ёки Гринвуд эмас, айнан тезкор Рэшфорд «Ливерпуль» ҳимоясига ноқулайлик туғдириши мумкин эди. Клопп жамоаси дарвозасига «МЮ» ўйиндан урган охирги уч гол ҳам айнан Рэшфорд ижросида амалга оширилганди.
Бунинг устига «Ливерпуль» ҳам ўша биринчи даврадаги ўйин палласига нисбатан анча ўзгарган. Энди улардан очко олиш тугул, Алисон дарвозасига гол уриш ҳам иложсиз ҳолатга келиб қолди. Қаторасига 6 ўйиндан бери «Ливерпуль» АПЛда гол ҳам ўтказмаяпти. Бундай шароитда «МЮ» яна бир бор «Ливерпуль»ни тўхтатиб қолишига ишониш қийин.
Лекин одатда Сульшер жамоаси айнан энг имконсиз шароитларда бизни ҳайрон қолдириб келаётганини ҳам унутмаслик керак. Париж ва «Этиҳад»даги ғалабалар ҳам ёрқин мисол – бу ўйинларда жамоанинг ҳолати янада оғирроқ бўлса-да, ғалаба қозонишнинг уддасидан чиққандилар. Умуман, Сульшер мураббий сифатида Клоппга қарши икки марта ўйин ўтказиб, ҳали мағлубиятга учрамаган. Тўғри, икки ўйин ҳам «Олд Траффорд»да бўлиб ўтган. «Энфилд»даги охирги тўқнашув эса «МЮ»нинг ўша пайтдаги устози Жозе Моуриньонинг истеъфоси билан якун топганди.
Таркиблар борасида сўз юритилса, юқорида тилга олинганлардан ташқари, Люк Шоу, Пол Погба каби футболчилар ҳам жароҳатда. Эшли Янг «Интер»га кетди. Фақат Эрик Байи ўтган ҳафтада ёшлар таркибида ўзини синаб кўргани ва Сульшер ундан фойдаланиши мумкинлиги яхши хабар холос. «Ливерпуль» сафида марказдаги асосий фигуралардан бири бўлган Фабиньо ҳамда марказий ҳимоячи Матип жароҳатидан фориғ бўлди.
Айтганча, «Ливерпуль» сўнгги учрашувини ўтган якшанба куни ўтказган бўлса, «Манчестер Юнайтед» чоршанба оқшомида кубок учун такрорий ўйинда «Вулверҳэмптон»га қаршилигини синдиришга ҳаракат қилди. Яъни тикланиш учун ҳам меҳмонларда уч кун камроқ вақт бўлди.
А Сериядан қизиқарли ўйин қидириладиган бўлса, эътибор мана шу учрашувга тушиши табиий. «Ювентус» тушунарли, «Парма»дан ҳам туринликларга қарши муносиб ўйнай олишларини тахмин қилиш мумкин. «Парма» бу мавсумда жуда барқарор ўйин намойиш этяпти ва еврокубоклар зонасидан ўрин олиш учун яхши имкониятга эга. Шунингдек, «Парма» айнан топ-жамоаларга қарши яхши натижалар қайд этади.
«Аталанта» майдонидаги йирик мағлубиятни айтмаса, «Парма» сафарда «Интер» билан дуранг қайд этди, «Наполи» устидан ғалаба қозонди. Шунингдек, ўз майдонида «Рома» ҳам мағлубиятга учратилганди. «Ювентус» билан биринчи даврадаги ўйин ҳам кескин курашлар остида кечган ва туринликлар фақат Кьеллинининг голи эвазига ғалаба қозонишганди. Шу ўринда жамоаларнинг Туриндаги ўтган мавсум учрашувини ҳам эслаш мумкин. Ўшанда жанговар 3:3 ҳисоби қайд этилган – ҳакам томонидан қўшиб берилган пайтда Жервиньо ҳисобни тенглаштирганди.
Меҳмонлардан йўқотишлар йўқ. «Ювентус» таркибида Роналдунинг майдонга тушиши сўроқ остида қолган. Криштиану икки кун олдин Италия Кубогида «Удинезе»га қарши ўйинда майдонга туширилмади.
«Роналдуни муҳим ўйинлар учун асрашимиз керак, унинг «Олтин тўп»и бир футболчидан камроқ экани менга ёқмаяпти», – дея қарорини изоҳлади Сарри. Бу ўйинда Криштиану тайёр бўладими ёки «Рома» билан келаси ҳафта бўладиган кубок ўйини учун асраб туриладими, бу номаълум. Аслида Игуаин ва Дибаладан ташкил топган жуфтлик ҳам жуда яхши ўйин намойиш қилишмоқда.
