Хубэй провинциясидаги 10та шаҳарда, шу жумладан, Уханда янги чекловлар жорий этилди. Фуқароларнинг ҳаракатини чеклашни назарда тутувчи бундай чоралар шаҳардан шаҳарга қараб ўзгариб боради.
Хитойда ушбу вирус билан зарарланиш билан боғлиқ жами 830 ҳолат қайд этилган, 26 киши ушбу вирусдан ўлим топган. Аввалроқ Хитой соғлиқни сақлаш давлат қўмитаси вафот этганларнинг энг ёши 48 ёшда, энг кексаси эса 89 ёш бўлгани ҳақида маълум қилди.
Янги коронавирус Хитойнинг бошқа шаҳарларида ҳам аниқланди. У қандай тарқалмоқда?
Пайшанба куни илк марта Хубэй провинцияси ҳудудидан ташқарида, қўшни Хэбэй провинциясида ўлим ҳолати қайд этилди. Яна бир ўлим мамлакат шимолида, Ухандан 2 минг километр узоқликда, Россияга чегарадош бўлган Хэйлунцзян провинциясида рўй берган.
Вирусга қарши қатъий чоралар Пекинда ва Ҳонгконгда ҳам жорий этилган. Хитой пойтахтида Янги йил байрами билан боғлиқ барча оммавий тадбирлар бекор қилинган, шунингдек шаҳар марказидаги қадимий ҳудудга зиёрат учун кириш тақиқланган. Ҳонгконгда футбол бўйича премьер-лига ўйинлари ва халқаро карнавал бекор қилинган.
Хитойдаги ўлим вируси: Икки шаҳар карантинда, Пекинда байрам бекор қилинди
Макаода ҳам вирусдан зарарланиш ҳолати қайд этилди. Бу ҳудудда ҳам янги йил байрами тадбирлари бекор қилинган. Шунингдек, Буюк Хитой деворининг аксар ҳудудлари зиёратчилар учун ёпилган.
Уханда, шунингдек, нисбатан кичикроқ бўлган шаҳарлар бўлмиш Эчжоу ва Эньшида карантин ҳолати давом этмоқда. Уханда автобуслар, паромлар ва метро ҳаракати тўхтатилган, шаҳардан чиқувчи барча авиарейслар бекор қилинган, шаҳардан чиқувчи йўллардаги блокпостлар беркитилган. Шунингдек, шаҳардан чиқувчи барча рейслар ва поезд йўналишлари бекор қилинган. Ресторанлар, кафелар ва кинотеатрлар ёпиб қўйилган.
Шаҳар марказида шошилинч равишда минг нафар беморга мўлжалланган касалхона қурилмоқда.
