Kun.uz сайти 2020 йил 1 февралдан бошлаб кутилаётган айрим ўзгаришларни эътиборингизга ҳавола этади.
«Тўловлар ва тўлов тизимлари тўғрисида»ги қонун кучга киради
Қонунчилик палатаси томонидан 2019 йил 19 сентябрда қабул қилинган, Сенат томонидан 2019 йил 11 октябрда маъқулланган ва Ўзбекистон Республикаси президенти томонидан 2019 йил ноябрда имзоланган «Тўловлар ва тўлов тизимлари тўғрисида»ги қонун шу йилнинг 1 февралидан бошлаб кучга киради.
Ушбу қонун тўлов хизматларини етказиб берувчи ва тўлов хизматларидан фойдаланувчи бўлган жисмоний ва юридик шахслар ўртасида тўловларни амалга ошириш ҳамда тўлов хизматлари кўрсатиш чоғида юзага келадиган муносабатларни тартибга солади.
Қонуннинг 63-моддасида у расмий эълон қилинган кундан эътиборан уч ой ўтгач кучга кириши белгиланган эди.
Иш ҳақи, пенсиялар, стипендиялар ҳамда нафақалар миқдори ошади
Ўзбекистон Республикаси Президентининг 2019 йил 31 декабрдаги «Ўзбекистон Республикасининг «2020 йил учун Ўзбекистон Республикасининг давлат бюджети тўғрисида»ги қонуни ижросини таъминлаш чора-тадбирлари тўғрисида»ги ПҚ-4555-сонли қарорига асосан, 2020 йил 1 февралдан бошлаб бюджет муассасалари ва ташкилотлари ходимларининг иш ҳақи, пенсиялар, стипендиялар, нафақалар ҳамда кам таъминланган оилаларга бериладиган моддий ёрдам миқдори 1,07 баробарга оширилади.
Шунинг билан, 2020 йил 1 февралдан бошлаб:
- меҳнатга ҳақ тўлашнинг энг кам миқдори — ойига 679 330 сўм;
- пенсияни ҳисоблашнинг базавий миқдори — ойига 238 610 сўм;
- энг кам ёшга доир пенсиялар — ойига 466 680 сўм;
- болаликдан ногиронларга бериладиган нафақа — ойига 466 680 сўм;
- зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақа — ойига 286 390 сўм этиб белгиланади.
Базавий ҳисоблаш миқдори ўзгаришсиз - 223 000 сўм миқдорда қолдирилган.
