Бизнесга қўллов, SMS-рекламалар назорати ва суюлтирилган газ таъминотида янги тизим: 1 ноябрдан нималар ўзгаради?

• реклама қўнғироқлари ва хабарномаларини телекоммуникация тармоқлари (мобил алоқа) орқали соат 18:00 дан 09:00 гача тарқатиш тақиқланади;

• мобил алоқа операторларига ўзлари томонидан тарқатиладиган реклама қўнғироқлари ва хабарномаларини абонент сўровига кўра тўлиқ ёки қисман блоклаш мажбурияти юклатилади.

Бу талабларга риоя этмаслик реклама ҳамда шахсга доир маълумотлар тўғрисидаги қонунчиликни бузиш ҳисобланади ва тегишли чоралар кўриш учун асос бўлади.

Патрул-пост ва қўриқлаш хизматларида янги ваколат

Президентнинг тегишли қарори билан 2026 йил 1 ноябрдан ички ишлар органларининг патрул-пост ва қўриқлаш хизматлари йўлларда содир этилган ҳуқуқбузарлик ва жиноятларнинг олдини олиш ҳамда жамоат тартибини сақлашда ҳам иштирок этади.

Ҳужжат билан патрул-пост ва қўриқлаш хизматларига йўл ҳаракати хавфсизлигини таъминлашга доир айрим ваколатлар берилмоқда.

Қарорга кўра, 2026 йил 1 ноябрдан патруллик йўналишида бўлган ички ишлар органлари патрул-пост ва қўриқлаш хизматлари нарядлари томонидан “112” тизими орқали келиб тушган, нафақат жамоат жойларида, балки аҳоли яшаш хонадонларида содир этилган жиноят ва ҳодисалар тўғрисидаги хабарлар бўйича ҳам тезкорлик билан етиб бориш амалиёти йўлга қўйилади.

Шунингдек, 24/7 режимдаги гастрономик кўчаларда жамоат тартибини сақлаш ички ишлар органлари ва ҳудудий ҳокимликлар ўртасида тузиладиган шартнома асосида патрул-пост хизмати бўлинмалари томонидан амалга оширилади. Оммавий тадбирларда жамоат тартибини бузган шахсларга нисбатан келгуси оммавий тадбирларга киришига вақтинча чеклов қўйилади.

Бундан ташқари, “Ҳар хил вазифалар – ягона ваколат” тамойили асосида қуйидаги тартиб ўрнатилади:

• йўл ҳаракати хавфсизлигини таъминлашга доир қуйидаги айрим функция ва ваколатлар ички ишлар органларининг патрул-пост ҳамда қўриқлаш хизматларига ҳам берилади:

— йўналишдаги чорраҳалар, бозорлар, йирик савдо мажмуалари, таълим муассасалари атрофлари ҳамда марказий кўчаларида юзага келадиган тирбандликларни бартараф этиш;

— йўлларда содир этилган ҳуқуқбузарлик ва жиноятларга дарҳол муносабат билдириш, уларнинг олдини олиш, жамоат тартибини сақлаш, жабрланувчиларга биринчи тиббий ёрдам кўрсатиш;

• жамоат тартибини сақлашга доир қуйидаги айрим функция ва ваколатлар ички ишлар органларининг йўл-патрул хизматига ҳам берилади:

— кўча ва жамоат жойларида содир этиладиган жамоат тартибига тажовуз қилувчи ҳуқуқбузарликларга чек қўйиш, уларни содир этаётган шахсларни таъқиб қилиш, ушлаш ҳамда ички ишлар органларига олиб бориш;

— белгиланмаган жойларга қаттиқ маиший чиқиндиларни ва қурилиш чиқиндиларини ташлаш, шунингдек, суюқ маиший чиқиндиларни тўкиш ҳамда жамоат жойида алкогол маҳсулотини истеъмол қилиш билан боғлиқ маъмурий ҳуқуқбузарликлар тўғрисидаги ишларни кўриб чиқиш ва маъмурий жазо қўллаш.

Суюлтирилган газ таъминотида янги тартиб жорий этилади

2026 йил 12 сентябрда президентнинг “Аҳолини суюлтирилган газ билан таъминлаш тизимини ислоҳ қилиш ва бозор механизмларини босқичма-босқич жорий этиш чора-тадбирлари тўғрисида”ги қарори қабул қилинганди.

Ҳужжатда қайд этилишича, аҳоли эҳтиёжлари учун етказиб бериладиган суюлтирилган газ таъминоти тизимида ислоҳотларни амалга ошириш ва хусусий секторни жалб қилиш орқали соҳада рақобат муҳити босқичма-босқич шакллантирилади ҳамда кросс-субсидиялаш амалиёти босқичма-босқич бекор қилинади.

Қарорга кўра, аҳолини суюлтирилган газ билан таъминлаш соҳасидаги функцияларни ихтисослаштириш, фаолиятнинг молиявий шаффофлигини таъминлаш ва бозор механизмларини жорий этиш мақсадида “Ҳудудгазтаъминот” АЖ таъсисчилигида “LPG-Trade” МЧЖ ташкил этилади. Аҳолига суюлтирилган газни давлат томонидан тартибга солинадиган чакана нархларда етказиб бериш билан боғлиқ нархлар тафовути ҳамда иқтисодий жиҳатдан асосланган харажатлар “LPG-Trade” МЧЖга бюджет маблағлари ҳисобидан қоплаб берилади.

2026 йил 1 ноябрдан бошлаб қуйидаги тартиб ўрнатилади:

— “LPG-Trade” МЧЖ томонидан суюлтирилган газни биржа орқали сотиб олиб, аҳолига етказиб бериш тизими жорий қилинади. Бунда хусусий тадбиркорлик субъектлари импорт ҳисобидан ҳам аҳолига суюлтирилган газ етказиб беради;

— “Ўзбекнефтгаз” АЖ ва “Lukoil Overseas Supply and Trading Ltd” компанияси томонидан ишлаб чиқариладиган суюлтирилган газ тўлиқ ҳажмда товар-хомашё биржаларининг алоҳида савдо майдончаси орқали савдога қўйилади. Бунда бошқа тадбиркорлик субъектлари, жумладан, импорт қилувчи корхоналар суюлтирилган газни ихтиёрий равишда биржанинг алоҳида савдо майдончасида сотишлари мумкин;

— биржанинг алоҳида савдо майдончасида сотиладиган суюлтирилган газ “LPG-Trade” МЧЖ томонидан аҳолига етказиб бериш учун харид қилинади;

— биржанинг алоҳида савдо майдончасидан харид қилинадиган суюлтирилган газ ҳажмлари аҳоли эҳтиёжлари учун етарли бўлмаган тақдирда, “LPG-Trade” МЧЖ суюлтирилган газни биржанинг очиқ савдолари орқали харид қилади;

— ижтимоий соҳа объектлари эҳтиёжлари учун суюлтирилган газ бозор тамойилларига асосан шаклланадиган биржа нархларида “LPG-Trade” МЧЖ томонидан етказиб берилади.

Бошқа ўзгаришлар

2026 йил 1 ноябрдан бошлаб:

• яйловларда тик қудуқларни “Ўзбекгидрогеология” давлат муассасаси томонидан бериладиган гидрогеологик хулосаларга кўра Чорвачилик агентлиги томонидан тасдиқланадиган қудуқларнинг энг мақбул жойлашув харитаси асосида қазишга рухсат этилади;

• 2030 йил 1 апрелга қадар иссиқлик энергиясини тежовчи махсус қоплама “кўрпа” билан қопланган ва (ёки) энергия самарадор ва экологик тоза “яшил” иситиш воситаларидан фойдаланаётган иссиқхона хўжаликларига октябр — март ойларида иссиқхона фаолияти учун истеъмол қилинган электр энергияси қийматининг 50 фоизи миқдорида Аграр соҳада тўловлар агентлиги томонидан субсидия ажратилади;

• халқаро курьерлик жўнатмаларини божхона расмийлаштирувидан ўтказганлик учун амалдаги божхона йиғими ставкаси 20 фоизга пасайтирилади;

• Урбанизация ва уй-жой бозорини барқарор ривожлантириш миллий қўмитаси томонидан мастер режаларнинг ягона электрон реестри юритилади ва уларнинг рақамлаштирилган нусхалари Миллий қўмитада сақланади. Бунда рўйхатдан ўтказилмаган мастер режаларни амалга оширишга, шунингдек, улар асосида шаҳарсозлик, қурилиш, инвестиция ва бошқа фаолиятни амалга оширишга йўл қўйилмайди;

• ташкилотлар, шу жумладан, нодавлат архивлар ўзларида сақланаётган архив ҳужжатлари тўғрисидаги маълумотларни давлат архивларига Архив ахборот тизими орқали онлайн тақдим этади. Шунингдек, давлат архивларининг жамлаш манбалари бўлган ташкилотларга нодавлат архивлар томонидан пулли хизматлар кўрсатишда давлат архивининг розилигини олиш амалиёти бекор қилинади;

• реабилитация қилишнинг техник воситаларига муҳтожлик белгиланган шахсларни мазкур воситалар билан таъминлаш уларнинг ижтимоий карталарига харид қилиш учун маблағларни ўтказиб бериш орқали амалга оширилади;

• пенсионерларга банк картасини очиш билан боғлиқ хизматларни фуқароларни биометрик идентификация қилиш (Face-ID) орқали амалга ошириш тартиби жорий этилади;

• маҳаллий ишлаб чиқарувчиларнинг кўмир маҳсулотлари биржа савдолари орқали сотилади. Аҳоли ва бюджет ташкилотларига етказиб бериладиган маҳаллий кўмир учун ягона тариф жорий этилади;

• 2026 йил ноябрдан бошлаб биринчи босқичда Тошкент шаҳри ва Тошкент вилоятида ўта оғир жиноятларни халқ вакиллари ҳайъати иштирокида кўриб чиқиш амалиёти йўлга қўйилади (тинчлик ва хавфсизликка қарши жиноятлар бундан мустасно);

• жинсий зўравонликка оид жиноятлар бўйича терговга қадар текширув ва дастлабки тергов прокуратура органларига ўтказилади.