Қўқондаги ЙТҲ юзасидан расмий маълумот берилди

Интернетда Қўқон шаҳрида юз берган ЙТҲ тасвирланган видеолавҳалар тарқалди.  Ўзбекистон Республикаси ИИВ ҳузуридаги Тергов департаменти расмий маълумот билан чиқди.

Қайд этилишича, 2020 йилнинг 7 февраль куни соат 21:00ларда ҳайдовчи, 24 ёшли А.Р. бошқарувида бўлган Spark русумли автомашинасида Қўқон шаҳар Туркистон кўчасидан Ғишткўприк кўчаси йўналиши томон ҳаракатланиб чорраҳага келганида, ўзига нисбатан йўлнинг ўнг томонидан ҳаракатланиб келаётган 37 ёшли А.Х.нинг бошқарувидаги Nexia русумли автомашина билан тўқнашув содир қилган. 

Натижада, Spark автомашинасининг мотор қисми Nexia автомашинасининг олд қисмига урилиши оқибатида қисқа туташув ҳосил бўлган ҳамда ёнғин келиб чиққан. Ҳайдовчилар ҳеч қандай тан жароҳати олмаган ҳамда шифохонага мурожаат қилмаган.

Қўқон шаҳар ИИО ФМБ ҳузуридаги ТБ томонидан мазкур ҳолат юзасидан терговга қадар текширув ҳаракатлари олиб борилмоқда.