Трампда коронавирус аниқланмагани маълум қилинди   

Бу ҳақда Оқ уй матбуот котиби Стефани Гришем маълум қилди.

“Бразилия делегацияси билан Мар-а-Лаго қароргоҳида ўтказилган учрашувдан кейин президентда касалликнинг ҳеч қандай аломатлари намоён бўлмади”, деб маълум қилган Гришем.

Ушбу маълумотни Трампнинг шахсий шифокори Шон Конли ҳам тасдиқлаган. “Бугун мен Трампнинг коронавирусга тести манфий чиққанининг тасдиғини олдим”, деб айтган Конли.  

Трампнинг саломатлиги борасида хавотир унинг касалланганлар билан мулоқотда бўлган конгрессменлар билан учрашувлари ва Бразилия делегацияси билан мулоқотидан кейин пайдо бўлган. Аввалроқ АҚШга келган Бразилия делегацияси аъзоларидан бири – Бразилия президенти маъмуриятининг жамоатчилик алоқалари котибияти раҳбари Фабио Вайнгартенда коронавирус аниқланган. Жумладан, Трамп учрашув вақтида Вайнгартен билан ёнма-ён суратга тушган.

АҚШ президенти 14 март куни коронавирусга тест топширгандан кейин у ва вице-президент Майк Пенс билан мулоқот қилган барча ходимларнинг саломатлиги текширилишини таъкидлаб ўтган. Бундан ташқари, Трамп иштирокидаги матбуот анжуманларига ташриф буюрувчи журналистларнинг тана ҳарорати ўлчанмоқда.

Шунингдек, Бразилия президенти Жаир Болсонаруда ҳам коронавирус аниқланмаган. Болсонару коронавирусга топширган тест натижалари олингандан кейин ёлғон хабарларга ишонмасликка чақирган. Аввалроқ Бразилия президентидан олинган биринчи тестлар унда коронавирус борлигини кўрсатгани ҳақида хабарлар тарқалганди.