Ўзбекистон бензин ишлаб чиқаришни кўпайтирди, нефть қазиб олишни қисқартирди

2019 йилнинг шу даврида 151,6 минг тонна бензин ишлаб чиқарилган бўлса, 2020 йилда - 190,3 минг тонна

Фото: AP

Давлат статистика қўмитаси хабарига кўра, 2020 йилнинг январь-февраль ойларида республикада автомобиль бензини ишлаб чиқариш ҳажми 2019 йилнинг шу даврига нисбатан кўпайди.

Қайд этилишича, 2019 йилнинг шу даврида 151,6 минг тонна бензин ишлаб чиқарилган бўлса, 2020 йилда - 190,3 минг тонна.

Дизель ёқилғисини ишлаб чиқариш ҳажмида ҳам ўсиш кузатилди. 2019 йилда 169,8 минг тонна дизель ишлаб чиқарилган бўлса, 2020 йилда - 195,9 минг тонна.

Шу билан бирга, Ўзбекистон 2020 йил январь-февраль ойларида нефть қазиб олишни 2019 йилнинг шу даврига нисбатан (115,5 минг тонна) қисқартирди - 111,3 минг тоннагача.

2020 йил январь-февраль ойларида табиий газ қазиб олиш 9,1 миллиард куб метрни ташкил этди, бу 2019 йилнинг шу даврига нисбатан кам (10,1 миллиард куб метр).

2020 йил январь-февраль ойларида Ўзбекистон 266,8 минг тоннадан ортиқ газ конденсати қазиб олди, бу 2019 йилнинг шу даврига нисбатан бироз кўпроқ (265,2 минг тонна).