Фуқаролар йиғинлари фаолияти баҳоланади

Вазирлар Маҳкамасининг “Фуқаролар йиғинлари ва профилактика инспекторлари фаолияти самарадорлигини баҳолашнинг рейтинг тизимини такомиллаштириш тўғрисида”ги қарори лойиҳаси эълон қилинди.

Ҳужжат билан фуқаролар йиғинлари ва профилактика (катта) инспекторлари фаолияти самарадорлигини баҳолашнинг рейтинг тизими тўғрисидаги низом тасдиқланади.

Вазирликлар, идоралар ва бошқа ташкилотлар Фуқаролар йиғинлари ва профилактика (катта) инспекторлари фаолияти самарадорлигини баҳолашнинг рейтинг тизими тўғрисидаги низомда назарда тутилган маълумотларни туман (шаҳар) маҳалла ва оилани қўллаб-қувватлаш бўлимининг сўровига мувофиқ тақдим этилиши ва уларнинг ҳаққонийлигини таъминлаш чораларини кўради.

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳамда туман (шаҳар) ҳокимликлари рейтинг баҳолаш натижалари бўйича фуқаролар йиғинлари, уларнинг ходимлари, профилактика (катта) инспекторлари ва жамоатчилик асосида меҳнат қилаётган шахсларни рағбатлантириш учун зарур бўлган маблағлар маҳаллий бюджетнинг орттирилган қўшимча маблағлари ҳисобига ажратилишини таъминлайдилар.

Маҳалла ва оилани қўллаб-қувватлаш вазирлигининг Фуқаролар йиғинлари ва профилактика (катта) инспекторлари фаолияти самарадорлигини баҳолашнинг рейтинг тизими тўғрисидаги низом талабларига мувофиқ фуқаролар йиғинлари ходимлари, профилактика (катта) инспекторлари ва жамоатчилик асосида меҳнат қилаётган шахсларга республика ҳудудидаги санаторийлардан бирида соғлиғини тиклаш учун бир маротабалик бепул йўлланма бериш тўғрисидаги таклифи маъқулланиши мумкин.

Фуқаролар йиғинлари ва профилактика (катта) инспекторлари фаолияти самарадорлигини баҳолашнинг рейтинг тизими тўғрисидаги низомга кўра, фуқаролар йиғинлари фаолиятини рейтинг баҳолашда (кейинги ўринларда рейтинг баҳолаш деб аталади) фуқаролар йиғинида яшовчи аҳолининг ижтимоий ҳаётида мавжуд бўлган жами муаммолар (улар хонадонма-хонадон юриш орқали) аниқланади.

Ушбу муаммолар – ечими фуқаролар йиғинлари ходимларининг саъй-ҳаракати билан ҳал этилган муаммоларга ҳамда фуқаролар йиғинларининг ташаббуси билан мутасадди идора ва ташкилотлар ёрдамида ҳал этилган муаммоларга сараланиб, мазкур кўрсаткичлар умумлаштирилган ҳолда баҳоланади.

Фуқаролар йиғинлари ва профилактика (катта) инспекторлари фаолияти баҳолашда энг муҳим кўрсаткичлар этиб қуйидагилар белгиланади:

Тегишли ҳудудда яшовчи фуқароларга тадбиркорлик фаолиятини ташкил этишга кўмаклашиш;

Тадбиркорлик фаолияти учун кредит олишга кўмаклашиш;

Аҳолини иш билан таъминлашга кўмаклашиш;

Аҳолининг бандлигини расмийлаштиришга кўмаклашиш;

Оилавий ажралишлар;

Эҳтиёжманд ва кам таъминланган оилалар;

Нотинч оилалар;

Содир этилган жиноятлар;

Содир этилган маъмурий ҳуқуқбузарликлар;

Ўз жонига қасд ва суиқасд қилиш ҳолатлари;

Томорқа ер участкаларидан унумли фойдаланиш;

Ҳашар йўли билан ўтқазилган дарахтлар;

Мутасадди идора ва ташкилотлар томонидан ҳал этилган муаммолар.

Фуқаролар йиғинлари ва профилактика (катта) инспекторлари фаолиятини рейтинг баҳолаш ярим йиллик ва йил якуни бўйича ўтказилади.

Рейтинг баҳолаш қонунийлик, ошкоралик, холислик, адолатлилик, тенглик ва шаффофлик принципларига асосланади.

Рейтинг баҳолаш натижасида «намунали», «яхши», «қониқарли» ва «қониқарсиз» фуқаролар йиғинлари аниқланади ҳамда «намунали» деб топилган фуқаролар йиғинларининг ходимлари (маҳалла раиси, ўринбосарлари, оила ва хотин-қизлар масалалари бўйича мутахассис, жамоатчилик асосида фаолият юритаётган шахслар) ва фаоллар моддий рағбатлантирилади.

Фаолияти «яхши» деб баҳоланган фуқаролар йиғинлари намунали қилиш ҳамда фаолияти «қониқарли» ва «қониқарсиз» деб баҳоланган фуқаролар йиғинлари фаолиятини яхшилаш чора-тадбирлари белгиланади.

Фуқаролар йиғинлари фаолиятини рейтинг баҳолаш туман (шаҳар) маҳалла ва оилани қўллаб-қувватлаш бўлими томонидан амалга оширилади.

Фуқаролар йиғинлари фаолиятининг асосий кўрсаткичлари қуйидаги тартибда баҳоланади:

тегишли ҳудудда яшовчи фуқароларга тадбиркорлик фаолиятини ташкил этишга кўмаклашиш — фуқаролар йиғини томонидан (тадбиркорлик субъектининг (фуқаролар йиғини ходимлари ёрдамида тадбиркорлик фаолиятини бошлаган фуқаронинг) маълумотлари) тақдим этилган ҳисоботга туман (шаҳар) маҳалла ва оилани қўллаб-қувватлаш бўлими томонидан тадбиркорлик субъектларини давлат рўйхатидан ўтказиш

ва ҳисобга қўйишнинг автоматлаштирилган тизими орқали олинган ҳужжатларни солиштириш орқали аниқлик киритилади;

тадбиркорлик фаолияти учун кредит олишга кўмаклашиш — фуқаролар йиғини томонидан тадбиркорлик фаолияти учун берилган тавсияномалар ҳамда шу асосда тижорат банклари томонидан ажратилган кредитлар тўғрисидаги маълумот туман (шаҳар) маҳалла ва оилани қўллаб-қувватлаш бўлими томонидан таҳлил қилиш орқали аниқланади (зарур ҳолларда жойларга чиқиб ўрганилади);

аҳолини иш билан таъминлашга кўмаклашиш — фуқароларнинг янги ёки мавжуд иш ўринларига жойлаштирилганлиги бўйича фуқаролар йиғини томонидан берилган ҳисобот туман (шаҳар) маҳалла ва оилани қўллаб-қувватлаш бўлими томонидан иш берувчи томонидан берилган ёзма маълумот ҳамда иш берувчи, ишга жойлашган шахс ва фуқаролар йиғини томонидан тузилган уч томонлама шартномани ўрганиш орқали аниқланади;

аҳолининг бандлигини расмийлаштиришга кўмаклашиш қуйидаги тартибда аниқланади:

деҳқон хўжалиги, томорқа ерида банд бўлган ёки қорамол боқаётган ёхуд парранда парваришлаётган жисмоний шахсларни белгиланган тартибда расмийлаштиришга кўмаклашилганлиги фуқаролар йиғини томонидан амалга оширилган ишлар (ўтказилган суҳбат ва йиғилишлар, олиб борилган тарғибот-ташвиқот ва тушунтириш ишлари ҳамда уларнинг натижаси сифатида) тадбиркорлик билан шуғулланувчи фуқароларнинг солиқ тўловчи сифатида рўйхатдан ўтганлиги тўғрисида солиқ идораси томонидан туман (шаҳар) маҳалла ва оилани қўллаб-қувватлаш бўлимига тақдим этган маълумот билан солиштириш орқали аниқланади;

юридик шахс ташкил этмаган ҳолда оилавий тадбиркорлик шаклида (якка тартибдаги тадбиркор) фаолиятини амалга оширувчи фуқаролар ва уларнинг давлат рўйхатига олиш тўғрисида гувоҳномада кўрсатилган оила аъзоларини белгиланган тартибда расмийлаштиришга кўмаклашганлиги фуқаролар йиғини томонидан берилган маълумотларни, туман (шаҳар) аҳоли бандлигига кўмаклашиш маркази ва давлат солиқ инспекцияси томонидан туман (шаҳар) маҳалла ва оилани қўллаб-қувватлаш бўлимига расман тақдим этилган маълумотлар билан солиштириш орқали аниқланади;

оилавий ажралишлар — фуқаролик ҳолати далолатномаларини қайд этиш органлари томонидан расмийлаштирилган далолатномалар (суд томонидан бедарак йўқолган, муомалага лаёқатсиз деб топилган, содир қилган жинояти учун уч йилдан кам бўлмаган муддатга озодликдан маҳрум қилинганлиги сабабли қайд этилган ажримлар бундан мустасно) фуқаролар йиғинининг оилавий қадриятларни мустаҳкамлаш комиссияси томонидан амалга оширилган ишлар (ўтказилган суҳбатлар, йиғилишлар ва ҳоказо саъй-ҳаракатлар) юзасидан туман (шаҳар) маҳалла ва оилани қўллаб-қувватлаш бўлимига тақдим этилган маълумотлар билан солиштириш орқали аниқланади;

эҳтиёжманд ва кам таъминланган оилалар — фуқаролар йиғини томонидан моддий ва мулкий ҳолатини инобатга олган ҳолда белгиланган тартибда аниқланган оилаларни, ушбу тоифадан чиқариш борасида олиб борилган манзилли ишлар (кўрсатилган моддий ва молиявий ёрдамлар, маҳаллий ҳокимликларнинг ижтимоий қўллаб-қувватлаш марказлари, давлат ташкилотлари ва жамоат тузилмалари орқали тадбиркорликка йўналтирилганлиги, ўтказилган суҳбат, учрашув, йиғилиш ва ҳоказо амалий тадбирлар) натижасида эҳтиёжманд ва кам таъминланганлар тоифасидан чиқарилган оилалар тўғрисида тақдим этилган ҳисобот ҳамкор ёки ҳомий ташкилотлар томонидан туман (шаҳар) маҳалла ва оилани қўллаб-қувватлаш бўлимига тақдим этилган маълумотлар билан солиштириш орқали аниқланади;

нотинч оилалар — туман (шаҳар) маҳалла ва оилани қўллаб-қувватлаш бўлими, тиббиёт бирлашмаси ва ички ишлар бўлимларидан фуқаролар йиғинларидаги оила аъзолари, қариндошлар ёки қўни-қўшнилар ўртасида мунтазам равишда низоли ҳолатлар мавжуд бўлган оилалар, фарзанд тарбиясига салбий таъсир кўрсатаётган ота-оналар, ички ишлар органлари, соғлиқни сақлаш муассасалари ва фуқаролар йиғинлари ҳисобида турувчи шахслар тўғрисидаги маълумотлар олинади. Ушбу маълумотлар фуқаролар йиғини томонидан «нотинч оилалар» ва улардаги салбий муҳитни соғломлаштириш борасида олиб борган ишлари (ўтказилган суҳбатлар, учрашувлар, кўрсатилган амалий ёрдамлар) юзасидан ҳисоботлари билан таққослаш орқали аниқланади;

содир этилган жиноятлар — маҳалла ҳудудида содир этилган жиноятлар бўйича (алоҳида маъмурий бино, ҳудудда жойлашган корхона, ташкилот, муассасалар, умумий овқатланиш объектлари ва савдо мажмуаларида ушбу маҳаллада истиқомат қилмайдиган фуқаролар томонидан содир этилган жиноятлар (уларни содир этган фуқароларнинг яшаш манзилидаги фуқаролар йиғини ҳисобига қайд этилади) бундан мустасно) фуқаролар йиғини томонидан берилган маълумот туман (шаҳар) ички ишлар бўлими томонидан туман (шаҳар) маҳалла ва оилани қўллаб-қувватлаш бўлимига тақдим этилган расмий ҳисобот билан солиштириш орқали аниқланади;

содир этилган маъмурий ҳуқуқбузарликлар — маҳалла ҳудудида вояга етмаганлар, ёшлар томонидан ва оила турмуши доирасида содир этилган маъмурий ҳуқуқбузарликлар назарда тутилади, бунга оид маълумотлар фуқаролар йиғини томонидан амалга оширилган ишлар юзасидан тақдим этилган маълумотлар туман (шаҳар) ички ишлар бўлими томонидан туман (шаҳар) маҳалла ва оилани қўллаб-қувватлаш бўлимига тақдим этилган ҳисоботлар билан таққосланади ва асослантирилган кўрсаткичлар орқали аниқланади;

ўз жонига қасд ва суиқасд қилиш ҳолатлари — маҳалла ҳудудида содир этилган ўз жонига қасд ва суиқасд қилиш ҳолатлари бўйича фуқаролар йиғини томонидан берилган маълумот туман (шаҳар) маҳалла ва оилани қўллаб-қувватлаш бўлими орқали аниқланади;

томорқа ер участкаларидан унумли фойдаланиш — аҳоли хонадонларининг томорқа ер участкаларидан унумли фойдаланиш ва кўп қаватли уйларнинг атрофидаги ер майдонларини ободонлаштириш борасида фуқаролар йиғини томонидан амалга оширилган ишлар (ўтказилган суҳбатлар ва йиғилишлар, олиб борилган тарғибот-ташвиқот ва тушунтириш ишлари, тайёрланган фото-альбомлар ва ҳоказо тасдиқловчи ҳужжатлар) бўйича маълумотлар туман фермер, деҳқон хўжаликлари ва томорқа ер эгалари кенгаши томонидан туман (шаҳар) маҳалла ва оилани қўллаб-қувватлаш бўлимига тақдим этилган ҳисоботлар билан солиштирма-таҳлил қилиш (зарур ҳолларда жойларга чиқиб ўрганилади) орқали аниқланади;

ҳашар йўли билан ўтқазилган дарахтлар — маҳалла фаоллари ва аҳоли томонидан ҳашар йўли билан экилган дарахт кўчатлари (туман (шаҳар) ободонлаштириш бошқармаси томонидан олиб борилган ободонлаштириш ишлари, ўтқазилган дарахт кўчатлари бундан мустасно) бўйича фуқаролар йиғини томонидан тақдим этилган маълумотлар (маҳалла ҳудудида ҳашар, ободонлаштириш ва кўкаламзорлаштириш ишларини ўтказиш юзасидан фуқаролар йиғинининг ободонлаштириш ва кўкаламзорлаштириш бўйича комиссиясининг қарори ва унинг ижроси бўйича фото-альбом, экилган дарахт кўчатлари бўйича тузилган далолатномалар ва бошқа тасдиқловчи ҳужжатлар) туман фермер, деҳқон хўжаликлари ва томорқа ер эгалари кенгаши томонидан туман (шаҳар) маҳалла ва оилани қўллаб-қувватлаш бўлимига тақдим этилган ҳисоботлар билан солиштирма-таҳлил қилиш (зарур ҳолларда жойларга чиқиб ўрганилади) орқали аниқланади;

фуқаролар йиғинларининг ташаббуси билан мутасадди идора ва ташкилотлар ёрдамида ҳал этилган муаммоларни баҳолашда фуқаролар йиғинларининг ваколати доирасидан ташқари масалалар бўйича мутасадди ташкилотларга қилган мурожаатлари ва киритган тақдимномаларидан ижобий ҳал этилган муаммолар бўйича баҳоланади.

Туман (шаҳар) маҳалла ва оилани қўллаб-қувватлаш бўлими фуқаролар йиғинлари фаолиятини рейтинг баҳолаш даврида (ярим йиллик ва йил якуни бўйича) мазкур низомда қайд этилган ташкилот ва идоралар, шунингдек, жамоат тузилмаларига тегишли маълумотларни олиш ва фойдаланиш юзасидан мурожаат қилиб, тегишли маълумот ва ҳисоботларни йиғиш, таҳлил қилиш, шунингдек, ҳар бир кўрсаткичнинг асослантирилишини назорат қилади.

Рейтинг баҳолаш фуқаролар йиғинларининг қуйидаги географик жойлашувини инобатга олган ҳолда амалга оширилади:

шаҳарда;

туман марказида;

туман марказигача 30 км бўлган масофада;

туман марказидан 30 км ва ундан олис масофада, тоғли ва чўл ҳудудида;

чегара (ёки анклав) ҳудудда жойлашганлиги.